پارلامەنت مەن ماسليحاتقا جاڭا دەپۋتاتتار 7 پارتيانىڭ قاتىسۋىمەن سايلانىپ قانا قويماي, ولاردىڭ ءبىر بولىگىنىڭ ءوزىن-ءوزى ۇسىنۋ جولىمەن باسەكەگە ءتۇسۋى سىندارلى قادام.
بىراق سايلاۋ بارىسىندا انىقتالعان كەيبىر كوزگە تۇسكەن نارسە – كوپتەگەن كانديداتتىڭ ءوز باعدارلامالارىن جەتكىلىكتى دەڭگەيدە ناسيحاتتاي المادى. اقپاراتتىڭ سايلاۋشىلارعا تولىققاندى جەتپەگەنى, ولار تۋرالى مالىمەتتىڭ ازدىعى كەيبىر ۇمىتكەرلەردىڭ ساياسي رەيتينگىن تومەندەتتى دەۋگە بولادى. الماتى قالاسىنداعى سايلاۋشىلار سانىنىڭ ازدىعى ۇگىت-ناسيحات جۇمىسىنىڭ تولىققاندى جۇرگىزىلمەگەنىن كورسەتەدى.
بيىل ەل ايماقتارى مەن ەلدى مەكەندەرىندەگى 10 مىڭنان اسا سايلاۋ ۋچاسكەسىندە, 62 باسقا ەلدەردەگى سايلاۋ پۋنكتتەرىندە قازاقستان پارلامەنتى پەن ءماسليحاتتارىنا دەپۋتاتتاردى سايلاۋ جوعارى دەڭگەيدە ءوتتى دەپ ناقتى ايتا الامىز. بۇل سايلاۋدىڭ تاعى ءبىر وزىندىك ەرەكشەلىگى دەپ ەكى ءتۇرلى باعىتتاعى سايلاۋدىڭ ءبىر كۇنگە بىرىكتىرىلىپ, ءبىر ۋاقىتتا وتكىزىلۋىن اتاۋعا بولادى. ناتيجەسىندە, قازىرگى الەۋمەتتىك سيپاتى كۇردەلى زاماندا وسى ارەكەت ەلىمىز ءۇشىن ۇلكەن قارجىلىق جانە ۋاقىتتىق تيىمدىلىگى بار قادام دەپ باعالانادى. جاڭا تاريحي كەزەڭدە نۇرلى اقىلعا, ناقتى ناتيجەلەرگە, الەۋمەتتىك جانە تۇلعالىق جاۋاپكەرشىلىككە سۇيەنگەن پراگماتيزم زامانى تۋدى. سول قيسىنمەن العا قاراي ۇيلەسىمدى جىلجىعان ورىندى.
«Amanat» ساياسي كەڭىستىكتە باسىمدىق تانىتاتىن پارتيا ەكەنىن تاعى دا دالەلدەدى, «اۋىل» پارتياسىنىڭ ەكىنشى ورىنعا شىعىپ, جاڭادان قۇرىلعان «رەسپۋبليكا» پارتياسىنىڭ ءۇشىنشى ورىنعا جايعاسۋى – بيىلعى سايلاۋدىڭ وزىندىك جاڭالىعى. بىراق بۇل جاعدايدى كەزدەيسوق ناتيجەلەر دەپ تە اتاۋعا بولمايدى. دەمەك, ەلىمىزدە بارلىق دەڭگەيدە دەموكراتيالانۋ ۇدەرىستەرى ءوزىنىڭ ەرەكشە كەلبەتىن بايقاتا باستادى. تەك ەندى بارلىعىمىزعا ادىلەتتىلىك قاعيداتىن پارتيالىق جانە دارا تۇلعالىق جاۋاپكەرشىلىكپەن تىكەلەي استاستىرىپ وتىرۋ ماڭىزدى.
سەرىك نۇرمۇراتوۆ,
فيلوسوفيا, ساياساتتانۋ جانە ءدىنتانۋ ينستيتۋتى فيلوسوفيا ورتالىعىنىڭ ديرەكتورى