وڭدەۋ ونەركاسىبىندەگى ەكسپورتقا باعدارلانعان جوبالاردى قولداۋ ءۇشىن قازاقستان دامۋ بانكى 100 ملرد تەڭگە بولمەك. قاراجات ورتا جانە جوعارعى شەكتى تاۋارلاردىڭ ەكسپورتىن, ياعني قوسىلعان قۇنى جوعارى وڭدەۋ ونەركاسىبىنىڭ ونىمدەرىن قولداۋعا ارنالعان.
قارىزدىڭ ەڭ تومەنگى سوماسى 1 ملرد تەڭگەنى قۇرايدى, ول اينالىم كاپيتالىن تولىقتىرۋعا, ياعني شيكىزات پەن ماتەريالداردى ساتىپ الۋعا, سونداي-اق ەكسپورتتالاتىن ءونىمدى وندىرۋگە بايلانىستى اعىمداعى شىعىستاردى تولەۋگە باعىتتالۋى مۇمكىن. قارىز مەرزىمى – قارجىلاندىرۋدى ۇزارتۋ نەمەسە باعدارلامالارعا قايتا قاتىسۋ مۇمكىندىگىمەن 1 جىلدان 3 جىلعا دەيىن.
«شەتەلدىك وتكىزۋ نارىقتارىندا جۇمىس ىستەۋدى جوسپارلاپ وتىرعان نەمەسە وسى جۇمىستى جاڭادان باستاعان ورتا كاسىپورىندارعا باسا نازار اۋدارىلادى. ءبىز بيزنەسكە قولجەتىمدى قاراجات بەرەتىن بولامىز, بۇل رەتتە باعدارلامالارعا قاتىسۋشىلارعا قىزمەتكەرلەردىڭ جالاقىسىن ءوسىرۋ, ەكسپورتتىق ءتۇسىم كولەمى جانە قازاقستاندىق قامتۋ ۇلەسى سياقتى قارسى مىندەتتەمەلەر ۇسىنىلاتىن بولادى. وسىلايشا, ءبىز وڭدەۋشى ونەركاسىپ كاسىپورىندارىن عانا ەمەس, سونىمەن قاتار ىلەسپە تاۋارلار مەن قىزمەتتەردىڭ وتاندىق جەتكىزۋشىلەرىن, ياعني شاعىن جانە ورتا بيزنەستى دە قولداي الامىز», دەپ ءتۇسىندىردى قدب باسقارما توراعاسى نۇرلان بايبازاروۆ.
كاسىپورىنداردى قولداۋ باعدارلامالارى ۇزاقمەرزىمدى جانە وڭدەۋشى ونەركاسىپتىڭ ەكسپورتتالاتىن ءونىمىنىڭ كولەمىن وسىرۋگە, سالاداعى جۇمىس ورىندارىن ساقتاۋعا جانە ۇلعايتۋعا, مەملەكەتتىك بيۋدجەتكە سالىق تۇسىمدەرىن ارتتىرۋعا مۇمكىندىك بەرەدى.
دامۋ بانكى باعدارلامالارعا قاتىسۋعا ءوتىنىمدى www.kdb.kz رەسمي سايتى نەمەسە كليەنتتەرمەن جۇمىس جونىندەگى ديرەكتسيانىڭ سايتتا كورسەتىلگەن بايلانىس تەلەفوندارى ارقىلى بەرۋگە بولاتىندىعىن حابارلايدى.