جولداعى جاۋاپسىزدىق

ارينە, سەبەپسىز ەشنارسە بولماي­دى. وسى تۇرعىدان ايتقاندا, جول اپا­تىنىڭ كوبەيۋىنىڭ سەبەبى نەدە؟ جەر­گىلىكتى پولي­تسيا قىزمەتى باس­قار­ماسىنىڭ باس­تىعى, پوليتسيا پول­كوۆ­ني­گى ەرلان بيعامباەۆتىڭ ايتۋىنشا, جول اپاتىنىڭ ەڭ باستى سەبەبى – كولىك جىلدامدىعىن شامادان تىس اسىرۋ.

– قازىر كولىك جۇرگىزۋشىلەرىنىڭ دەنى دىتتەگەن جەر­گە جىلدام جەتۋ ءۇشىن جىلدامدىقتى ۇدەتۋدى ادەت­كە اينالدىرىپ الدى. بىراق سول جىل­دامدىقتىڭ وكىنىشكە ۇلاسار جول اپاتىنا ۇرىندىراتىنىن, ءتىپتى كولىكتەگى جولاۋشىلاردى اجال قۇش­تىرىپ, ومىرىنە قاتەر توندى­رە­تى­نىن ەسكەرمەيدى. اسىرەسە زاڭسىز تاكسي قىزمەتىمەن اينالىساتىن جۇرگىزۋ­شى­لەردىڭ قاتىسۋىمەن بولاتىن جول اپاتى جيىلەدى. وبلىس جانە اۋداندار ورتالىعىندا جينالىپ تۇراتىن تاكسي جۇرگىزۋشىلەرىنىڭ سانى كۇننەن-كۇنگە ارتىپ وتىر, – دەيدى ەرلان بيعامباەۆ.

ونىڭ دەرەگىنە سۇيەنسەك, تاكسي جۇر­گىزۋشىلەرىنىڭ كىنا­سىنەن ءبىر ەمەس بىرنەشە ادامنىڭ اجال قۇش­قانىنا دايەك رەتىندە كەلتىرەر دەرەك كوپ. ماسەلەن, بىلتىر قاڭتاردا جىلىوي اۋدانىندا «Honda Odyssey» مەن «ۆاز-211540» كولىكتەرى سوق­تى­عىسقان. جول-كولىك وقيعاسىنىڭ سالدارىنان رە­سەيدە شىعارىلعان كولىكتىڭ جۇرگىزۋشى مەن ءۇش جو­لاۋشىسى, «Honda Odyssey» كولىگىندەگى ءبىر جو­لاۋ­شى كوز جۇمعان. بۇعان «Honda Odyssey» جۇر­گىزۋشىسىنىڭ كىناسى سوت-مەديتسينالىق ساراپتاما قو­رى­تىندىلارىمەن, كۋالاردىڭ ايعاق­تا­رى­مەن تولىق دالەلىن تاپقان. سول سەبەپتەن جىلىوي اۋداندىق سوتى­نىڭ ۇكىمىمەن وعان 7 جىل مەرزىمگە كولىك قۇرال­دارىن جۇرگىزۋ قۇقىعىنان, 5 جىل مەرزىمگە باس­ بوستاندىعىنان ايىرۋ جازاسى تاعايىندالعان.

وسىنداي بىرنەشە ادام قازاسىنا اكەلەتىن تاعى ءبىر ءىرى جول-كولىك وقي­عا­سى بىلتىرعى قازاندا «يندەر – قا­را­باۋ – ميالى – ساعىز» تاس جولىن­دا تىركەلگەن. بۇل جول اپاتى­نان دا بەس ادام مەرت بولىپ, ء­­ۇش ادام اۋىر دەنە جاراقاتىن العان. وكى­نىشكە قاراي, جول اپاتىنا ۇشى­را­عان كولىك جۇرگىزۋشىسى پولي­تسيا قىز­مەتكەرلەرىنىڭ ەسكەرتۋىنە قۇلاق اس­پا­عا­نى انىقتالىپ وتىر. ويتكەنى وعان جول-كولىك وقيعا­سىنان ءبىر ساعات بۇرىن پوليتسيا قىزمەت­كەر­­لەرى­ جىلدامدىقتى اسىرعانى ءۇشىن اكىم­شىلىك حاتتاما تولتىرىپ, ەسكەر­تۋ­ بەرگەن. بىراق سودان كەيىن دە جول قوز­عالىسى ەرەجەسىن ساقتاماعان جۇر­گى­زۋشى قارسى باعىتقا شىعىپ, جول-كو­لىك وقيعاسىنا ۇرىنعان. تاعى ءبىر دەرەك­كە­ توقتالساق, 28 اقپاندا «اقتوبە – اتىراۋ – رەسەي فەدەراتسياسىنىڭ شە­كاراسى» باعى­­تىنداعى تاس جولدىڭ 491-شاقىرىمىندا «تويوتا يپسۋم» شا­عىن اۆتوبۋسى قارسى باعىتتاعى جۇك كولى­گىمەن تۇيىسكەن. قىزىلقوعا اۋدانى­نا بارا جات­قان شاعىن اۆتو­بۋس­تىڭ رۋلىندە 31 جاستاعى جۇر­گىزۋشى بول­عان. جول اپاتىنان بەس جولاۋشى ءجان­­تاسىلىم ەتىپ, ەكى ادام اۋىر جاراقات العان. جو­لاۋ­شى تاسىمالداپ جۇرگەن جۇر­گىزۋشىنىڭ بۇعان دەيىن ءۇش رەت جىل­دامدىقتى اسىرعانى, ءبىر مارتە جول تاڭباسى قاعيداسىن بۇزعانى انىق­­تالىپ وتىر. ال 9 ناۋرىزدا دا بەس ادامنىڭ و دۇنيەگە اتتانۋى­نا سەبەپ­­كەر بولعان جول-كولىك وقيعاسى تىر­كەلدى. وزەكتى ورتەيتىن ءبىر جايت, «لارگۋس» پەن «ۋاز» كولىكتەرىنىڭ سوق­تىعىسۋىنان بولعان جول اپاتىنان­ ەرلى-زايىپتى جۇپ ءتورت ايلىق نارەستەسىمەن بىرگە كوز جۇمدى. تاعى ءۇش جولاۋشى وبلىستىق اۋرۋ­ح­ا­نا­نىڭ كەرەۋەتىنە تاڭىلدى.

جولدا ءجۇرۋ ەرەجەسىن ساقتاماي, بارار جەرىنە تەز جەتۋ ءۇشىن اسىعىپ-اپتى­عىپ, جىلدامدىقتى ارتتىرۋدىڭ سوڭى تالايدىڭ ەڭىرەگەندە ەتەگىن جاس­قا­ تولتىرعان وكىنىشكە ۇرىندىرىپ جا­تىر. بۇل – جول اپاتىنىڭ باستى سەبەبى. ال سالدارى قانداي؟ كۇرە جول­دىڭ بويىندا تالاي جولاۋشىنى­ اجال قۇشتىرعان جول اپاتىنان كە­يىن تالاي اتا-انا باۋىر­ ەتى بالاسىن,­ جاقىن تۋىسى مەن باۋى­رىن ماڭ­گى­لىككە جوعالتتى. ءتىپتى ءبىر وتبا­سى­نىڭ­ ەندى عانا مازداي باستاعان شا­ڭى­راق وتى سونگەنىن جاسىرۋ مۇمكىن ەمەس. اكەسى مەن اناسىنان ايىرىلعان بالا­لار­دىڭ شىرقىراعان داۋىسى توبە قۇي­قاڭدى شىمىرلاتادى. بىراق مۇنى تۇسى­نەتىن, كولىگىندەگى جولاۋشىنىڭ قاۋىپ­سىزدىگىنە كەپىلدىك, امان-ەسەن جەت­ۋىنە جاناشىرلىق تانىتاتىن جۇر­گىزۋشى قايدا؟ ارينە, ءبارى دەمە­سەك تە جولاۋشىلاردى و دۇنيەگە ات­تان­دىرۋعا سەبەپكەر بولىپ جۇرگەن جۇر­گىزۋشىلەردىڭ كەيبىرى جول-كولىك وقي­عاسىنىڭ وسىنداي ورنى تولماس سال­دارىنا كوز جۇما قارايتىن سەكىلدى. ايت­پەسە, پوليتسەيلەردىڭ ەسكەرتۋىنەن كە­يىن جىلدامدىقتى ارتتىرماس ەدى. اتتەڭ...

اتىراۋ وبلىسى