2017 جىلعى جاڭا جىل مەرەكەسىن ارىپتەسىمىز, وبلىستىق «اراي» جاستار گازەتىنىڭ ءفوتوتىلشىسى التىنبەك قارتاباي ايرىقشا قۋانىشپەن قارسى الدى. سول جىلدارى ءوڭىردى باسقارعان كارىم كوكىرەكباەۆ سالتاناتتى ءىس-شارادا ۇزاق جىلدار بويى جەمىستى ەڭبەك اتقارىپ كەلە جاتقان ارىپتەسىمىزگە قالانىڭ قاق ورتاسىنان ءۇش بولمەلى پاتەردىڭ كىلتىن تابىستادى.
وبلىس اكىمى ارىپتەسىمىزگە پاتەردىڭ كىلتىن تاپسىرۋىن تاپسىرعانىمەن, جاڭا ءۇيدى زاڭداستىرىپ بەرە المادى. انىعىراق ايتار بولساق, وبلىس اكىمى اۋىسىپ كەتتى دە, پاتەردىڭ ماسەلەسىن شەشۋگە ءتيىس ازاماتتار تۇلكىبۇلاڭعا سالدى. جۋرناليستەر بۇل ماسەلەنى سان مارتە كوتەرگەنىمەن كارىم كوكىرەكباەۆتان كەيىن ءوڭىر باسشىسى بولعان بەردىبەك ساپارباەۆ تا, اسقار مىرزاحمەتوۆ تە ءتورت قىزدى تاربيەلەپ وتىرعان ارىپتەسىمىزدىڭ ماسەلەسىن بىرجاقتى ەتە العان جوق.
«ەر كەزەگى – ۇشكە دەيىن». كارىم كوكىرەكباۆتان كەيىن ءوڭىر تىزگىنىن قولعا العان ءۇشىنشى اكىم نۇرجان نۇرجىگىتوۆ التىنبەك قارتابايدىڭ التى جىل بويى اسىعا كۇتكەن ارمانىن ورىنداپ, ورتالىقتاعى جاڭا ۇيدەن العان پاتەرىن زاڭداستىرىپ بەرىپ, كوپبالالى اكەنىڭ العىسىن ارقالادى. وسىلايشا, 2017 جىلدىڭ جاڭا جىلىندا جاڭا پاتەرگە كىرگەن ارىپتەسىمىز 2023 جىلدىڭ ناۋرىز مەرەكەسىندە ونىڭ زاڭدى يەسى اتاندى.
وبلىستىق «اراي» جاستار گازەتى اشىلعالى بەرى تىنىمسىز ەڭبەك ەتكەن التىنبەكتىڭ ەڭبەگى راسىمەن دە زور. جاستار باسىلىمى جارىق كورمەي تۇرىپ, باس رەداكتور بولات بەكجانوۆ ورتالىق الاڭدا جينالىس وتكىزىپ تۇراتىن. گازەتتى كوشەدە جوسپارلاعان ۇجىمنىڭ ىشىندە التەكەڭ دە بار. ەشكىم تاپسىرما بەرمەسە دە, التەكەڭ گازەتكە كەرەكتى سۋرەتتەردى ءوزى ءتۇسىرىپ كەلەدى ەكەن. ال باسىلىم رەسمي تۇردە وقىرمان ولجاسىنا اينالعاننان كەيىن دە التىنبەك قارتاباي ءبىراز ۋاقىت تەگىن ەڭبەك ەتكەن.
«سوڭعى بىرنەشە جىلدىڭ بەدەرىندە باس اۋرۋىما اينالعان پاتەر ماسەلەسىنە نۇكتە قويىلىپ, توبەم كوككە جەتكەندەي كۇيدە ءجۇرمىن. ەستەرىڭىزدە بولسا, 2017 جىلى, جاڭا جىل مەرەكەسى قارساڭىندا ماعان ءۇش بولمەلى پاتەردىڭ كىلتى سالتاناتتى جاعدايدا تاپسىرىلعان ەدى. باسپانالى بولعانىممەن باسشىلار اۋىسىپ كەتىپ, پاتەر تولىق زاڭداستىرىلماي قالدى. وسى كۇنگە دەيىن پاتەر تۇرعىنۇيدى سالعان قۇرىلىس كومپانياسىنىڭ مەنشىگىندە تۇردى.
«كۇندەردىڭ كۇنىندە پاتەردى بوسات دەسە قايتەمىن؟» دەگەن سارى ۋايىممەن تالاي تاڭدى اتىرىپ, تالاي كەشتى باتىردىم. وسى ماسەلەمەن قانشاما كىسىلەردەن كومەك سۇراعانىمدى ساناي الماسپىن. قاقپاعان ەسىگىم قالمادى. امالىم تاۋسىلعانداي كۇيدە ءجۇردىم. ءتىپتى بۇل ماسەلە جاقىن ارادا شەشىلەدى دەگەنگە سەنىم دە بۋالدىرلانا باستادى.
«بىتەر ءىستىڭ باسىنا, جاقسى كەلەر قاسىنا» دەگەندەي, جامبىل وبلىسىنىڭ اكىمى نۇرجان نۇرجىگىتوۆتىڭ تىكەلەي تاپسىرماسىمەن بۇل ماسەلە وڭىنان شەشىلدى. ءتيىستى قۇجاتتى قولىمىزعا الىپ, قۋانىشتان كوككە ۇشىپ كەتەردەي كۇيدە ءجۇرمىز. ءوڭىردىڭ اقپارات سالاسىنداعى ازدى-كوپتى ەڭبەگىمىزدى باعالاپ, ازاماتتىق تانىتقان نۇرجان مولديار ۇلىنا ايتار العىسىم شەكسىز», دەيدى التىنبەك قارتاباي.
وڭىردە بىرنەشە مارتە فوتوكورمەسى ۇيىمداستىرىلعان التىنبەك قارتاباي تالاي مارتە حالىقارالىق بايقاۋلاردا جەڭىستىڭ بيىك تۇعىرىنان كورىنگەن بولاتىن. جيىرما جىلعا جۋىق ۋاقىت تىنىمسىز ەڭبەك ەتىپ كەلە جاتقان ارىپتەسىمىزدىڭ ماسەلەسىن ءوڭىر باسشىسى نازاردان تىس قالدىرماي وڭىنان شەشكەنى راسىندا دا قۇپتارلىق ءىس.
تاراز