19 ناۋرىز پارلامەنت ءماجىلىسى مەن ءماسليحاتتار دەپۋتاتتارىن سايلاۋ كۇنىنە وراي وبلىس بويىنشا بىرنەشە باعىتتا قوعامدىق كولىكتەر تەگىن قاتىنايدى, دەپ حابارلايدى Egemen.kz قوعامدىق كوممۋنيكاتسيا ورتالىعىنا سىلتەمە جاساپ.
اتاپ ايتقاندا, №103, 104, 105, 106, 107 مەن «اقتاۋ-قىزىلتوبە-2-اقتاۋ» جانە «اقتاۋ-باتىر-اقتاۋ», «اقتاۋ-اقشۇقىر-اقتاۋ», سونداي-اق «اقتاۋ-سايىن شاپاعاتوۆ-اقتاۋ» باعىتتارىندا جولاۋشىلار تەگىن قاتىناۋدا.
«بۇگىن قوعامدىق كولىكتەر جولاۋشىلارعا تەگىن قىزمەت كورسەتىپ جاتىر. ولار وزدەرىنىڭ داۋىس بەرۋ ۋچاسكەلەرىنە تەگىن جەتە الادى», دەيدى ماڭعىستاۋ وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادايبەك قاليەۆ.
ونىڭ ايتۋىنشا, 22 ناۋرىزدا ءدال وسى باعىتتاعى قوعامدىق كولىكتەردە جول ءجۇرۋ تۇرعىندار ءۇشىن تەگىن بولماق.
يگى ىسكە شاھار تۇرعىندارى ريزاشىلىعىن ءبىلدىردى. اقتاۋ قالاسى تۇرعىنى ايگۇل ماقسىموۆانىڭ ايتۋىنشا, بۇل سايلاۋ كۇنىندە تۇرعىندار ءۇشىن جاسالعان وتە دۇرىس شەشىم.
«تاڭەرتەڭ تۇرىپ, سايلاۋ ۋچاسكەسىنە قوعامدىق كولىكپەن تەگىن باردىم. دەمالىس كۇنى بولعان سوڭ, تۋىسىمنىڭ ۇيىنە قوناققا بارۋ ءۇشىن №105 اۆتوبۋسىنا ءمىندىم. قوعامدىق كولىك جۇرگىزۋشىسى بۇگىنگى سايلاۋ كۇنىنە وراي جولاقى المايتىنىن ايتتى. قۋانىپ قالدىم», دەيدى ايگۇل ماقسىموۆا.