اقتاۋ قالاسىنداعى №8 ورتا مەكتەپ عيماراتىندا ورنالاسقان №18 سايلاۋ ۋچاسكەسىندە «اق جول» دەموكراتيالىق پارتياسى اتىنان سايلاۋ ۇدەرىسىنە باقىلاۋشى رەتىندە داريعا نازاروۆا قاتىسىپ جاتىر. ونىڭ ايتۋىنشا, اتاۋلى كۇنى تاڭ قىلاڭ بەرە سايلاۋ ۋچاسكەلەرىنە ءوز تاڭداۋىن جاساۋعا بەتتەگەن حالىق قاراسى كورىنە باستادى. ۋاقىت وتە داۋىس بەرۋشىلەر قاتارى دا ارتا تۇسكەن, دەپ حابارلايدى Egemen.kz.
«تاڭعى ساعات 7-دەن بەرى داۋىس بەرۋ بارىسىن باقىلاپ وتىرمىن. ەشقانداي زاڭ بۇزۋشىلىق ورىن العان جوق. ازاماتتار كونستيتۋتسيالىق قۇقىعىن پايدالانىپ, ءوز تاڭداۋىن جاساپ جاتىر. كوميسسيا مۇشەلەرى سىپايى ءارى مادەنيەتتى تۇردە ءوز مىندەتتەرىن اتقارۋدا», دەدى داريعا نازاروۆا.
داريعا نازاروۆا سايلاۋ ۇدەرىسىندە باقىلاۋشىنىڭ باستى مىندەتى بەيتاراپ بولۋ ەكەندىگىن ايتادى.
«باقىلاۋشىلار ءۇشىن ءبىر پارتيانىڭ جەڭىپ, جەڭىلگەنى ەمەس, سايلاۋدىڭ اشىق ءارى ءادىل ءوتۋى ماڭىزدى. ءبىز سايلاۋشىلاردىڭ داۋىسىن قورعايمىز», دەدى داريعا نازاروۆا.