«كۇمىس ۋنيۆەرسيتەت» جوباسى زەينەت جاسىنداعى جانە ەگدە تارتقان ادامداردىڭ ءومىر ءسۇرۋ ساپاسىن جاقسارتۋ ماقساتىندا ۇيىمداستىرىلعان. بۇل – ۋنيۆەرسيتەتتىڭ ءۇشىنشى ميسسياسىن ىسكە اسىرۋى عانا ەمەس, ءومىر بويى ءبىلىم الۋ كونتسەپتسياسىن جۇزەگە اسىرۋدىڭ جارقىن ۇلگىسى.
ءىس-شارا بارىسىندا «زەينەت جاسىنداعى ادامدارعا ارنالعان تسيفرلىق ساۋاتتىلىق», «ساياحاتقا ارنالعان اعىلشىن ءتىلى», «پسيحوتەراپيا – ارت-تەراپيا» كۋرستارى جانە «سكانديناۆ ءجۇرىسى» ۇيىرمەسى بويىنشا وقۋىن ءساتتى تامامداعان 46 قاتىسۋشىعا سەرتيفيكات تابىستالدى.
سەرتيفيكات تابىستاۋ راسىمىنە وقۋ ورنىنىڭ الەۋمەتتىك سەرىكتەستەرى – قالالىق دوستىق ءۇيىنىڭ, «سەمەي قالاسىنىڭ ارناۋلى الەۋمەتتىك قىزمەتتەر كورسەتۋ جانە بەلسەندى ۇزاق ءومىر ءسۇرۋ ورتالىعى» كمم, وبلىستىق ارداگەرلەر كەڭەسىنىڭ وكىلدەرى, سونىمەن قاتار ۋنيۆەرسيتەت ارداگەرلەرى, ۇەۇ جانە باق وكىلدەرى قاتىستى.
«كۇمىس ۋنيۆەرسيتەت» جوباسىن بوكەيحان ۋنيۆەرسيتەتىنىڭ بىلىكتىلىكتى ارتتىرۋ جانە قوسىمشا ءبىلىم بەرۋ ينستيتۋتى بەيرەسمي ءبىلىم بەرۋ باعدارلامالارىن ىسكە اسىرۋ اياسىندا جۇرگىزىپ كەلەدى.
وقىتۋ ءاليحان بوكەيحان ۋنيۆەرسيتەتىنىڭ كامپۋسىندا, ىڭعايلى دا جايلى جاعدايلاردا جۇرگىزىلەدى. قاتىسۋشىلار جاڭا ءبىلىم مەن جاڭا داعدىلاردى يگەرىپ قانا قويماي, ءوزارا قارىم-قاتىناس جاساپ, بوس ۋاقىتتارىن ءتيىمدى ءارى پايدالى وتكىزەدى. سونىمەن قاتار جوباعا قاتىسۋشىلار ۋنيۆەرسيتەت كىتاپحاناسى, كومپيۋتەرلىك كلاسستار, سپورت جانە ترەناجەر زالدارىن ەركىن پايدالانا الادى.