كەشە پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ توراعالىق ەتۋىمەن كەدەن وداعى ماسەلەلەرىنە ارنالعان دوڭگەلەك ۇستەل بولىپ ءوتتى. وعان ەكونوميكالىق دامۋ جانە ساۋدا ءمينيسترى جانار ايتجانوۆا, قارجى ءمينيسترى بولات جامىشەۆ, پارلامەنت دەپۋتاتتارى جانە بىرقاتار ۆەدوموستۆولار مەن ىسكەر توپ وكىلدەرى قاتىستى.
وتىرىستا ءو.شوكەەۆ ەلىمىز ازاماتتارىنىڭ جەڭىل اۆتوكولىكتەردى تاسىمالداۋ كەزىندە بەلارۋستەگىدەي جەڭىلدىكتى رەجىم جۇمىس ىستەيتىنىن, قازاقستاندىقتار ءۇشىن جەڭىل اۆتوكولىكتەردى تاسىمالداۋ جەڭىلدىكتى رەجىم ارقىلى ىسكە اسىرىلاتىندىعىن ايتتى. بىزدىڭشە, بۇل جان-جاقتى ويلاستىرىلعان ءىس. اتالمىش رەجىم جاڭا ءارى قىمبات اۆتوكولىكتى الۋعا مۇمكىندىگى از ازاماتتار ءۇشىن قولايلى بولماق, دەدى ول. بۇل رەجىم اۆتوكولىكتىڭ جىلىنا جانە قوزعالتقىش كولەمىنە قاراي يكەمدى ستاۆكالاردى قاراستىرادى. سونداي-اق, 3-10 جىل مەرزىمدە شىعارىلعان اۆتوكولىكتەر ءۇشىن جەڭىلدىكتى ستاۆكالار بەلگىلەنبەك.
قاراعاندى اۋماعىندا اۆتوكولىك قۇراستىرۋعا ارنالعان زاۋىت بويىنشا بۇگىندە ماركەتينگتىك شارالار جۇرگىزىلۋدە. ءو.شوكەەۆتىڭ ايتۋىنشا, رەسەي تاراپى بۇل ماسەلەنى تاعى ءبىر مارتە پىسىقتاپ وتكەن.
قازىرگى كەزدە اۆتوكولىك قۇراستىرۋ زاۋىتىنىڭ ارنايى كەستەسىن بەكىتۋ شارالارى جۇرگىزىلۋدە ەكەن. 50 مىڭ اۆتوكولىك شىعارۋعا ارنالعان بۇل زاۋىت قاراعاندى اۋماعىندا ورنالاساتىن بولادى.
قازىرگى تاڭدا ماركەتينگ ءجۇرگىزىلۋدە جانە قانداي ماركانى شىعارۋ ماسەلەسى ناقتىلانۋ ۇستىندە. ءو.شوكەەۆتىڭ پىكىرىنشە, مۇندا 50 مىڭ اۆتوكولىك قۇراستىرىلاتىن بولسا, بۇل كورسەتكىش رىنوكتىڭ ەلەۋلى بولىگىن قامتاماسىز ەتۋگە مۇمكىندىك بەرمەك.
كەدەن وداعىن قۇرۋ بويىنشا پرەزيدەنتتەردىڭ قورىتىندى كەزدەسۋى شىلدەنىڭ باسىندا استانادا وتەتىندىگى دە وسى باسقوسۋدا ايتىلدى. “كەلىسسوزدەردىڭ سوڭعى كەزەڭى ماۋسىمنىڭ 17-18-ءى كۇندەرى, ياعني كەدەن وداعى كوميسسياسىنىڭ قورىتىندى وتىرىسى بارىسىندا وتەدى. وسىدان سوڭ شىلدەنىڭ باسىندا پرەزيدەنتتەر جينالىپ, بارلىق ۇدەرىستەر بويىنشا سوڭعى نۇكتەنى قويادى”, دەدى ۇكىمەت باسشىسىنىڭ ءبىرىنشى ورىنباسارى.
ءابدىراحمان قىدىربەك.