كوشباسشى ەلدەردىڭ دامۋ ۇدەرىسىنە ىلەسىپ, وزىندىك ورنىن ايشىقتاعان قازاقستان ءۇشىن ساياسي وزگەرىستەردىڭ ورىن الۋى زاڭدىلىق. ۋاقىت كوشى العا جىلجىپ, الەمدىك ساياسات جاڭا ساتىعا كوتەرىلگەن تۇستا ەلىمىزدە ايتۋلى وزگەرىستەر بولىپ جاتىر.
جاسامپازدىق جولىندا جەتى جىلعا پرەزيدەنتىمىزدى سايلاپ الدىق. بيىل قاڭتاردا زاڭ شىعارۋ قىزمەتىن جۇزەگە اسىراتىن رەسپۋبليكانىڭ وكىلدى ورگانى – پارلامەنت سەناتىنىڭ دەپۋتاتتارىن سايلاۋ ءوتتى. ەندى الدا پارلامەنت ءماجىلىسى جانە جەرگىلىكتى ءماسليحاتتار دەپۋتاتتارىن كەزەكتەن تىس سايلاۋ ناۋقانى وتەدى. بۇل سايلاۋلاردىڭ ەرەكشەلىگى – رەفەرەندۋم ناتيجەسى بويىنشا قابىلدانعان تۇزەتۋلەرگە سايكەس ولاردىڭ ارالاس سيپاتقا يە بولۋى. ازاماتتار كانديداتتارعا پارتيالىق ءتىزىم بويىنشا تاڭداۋ جولىمەن عانا ەمەس, سونىمەن قاتار ءوزىن-ءوزى ۇسىنعان كانديداتتارعا دا داۋىس بەرە الادى. تاعى ءبىر جاڭاشىلدىق – ناقتى ءبىر سايلانۋشىنىڭ جۇمىسىنا كوڭىلى تولماسا ازاماتتار ونىڭ كانديداتۋراسىن قايتارىپ الۋعا قۇقىلى. جالپى, سايلاۋ ناۋقانى ەلىمىزدەگى بۇكىل ساياسي ۇدەرىستىڭ دامۋىنىڭ وڭ ترەندىنە يە. ەگەر ءبىز قوعامدا وزگەرىستەر بولعانىن قالاساق, ەگەر مەملەكەتتىلىگىمىزدى نىعايتا ءتۇسۋدى كوزدەسەك, وندا ەلىمىزدەگى وتە ماڭىزدى مەملەكەتتىك جانە ساياسي اكتسيالار – ءماجىلىس پەن ءماسليحاتتار سايلاۋىنا بەلسەندى قاتىسۋىمىز كەرەك.
ساياسي پارتيالار مەن قوعامدىق ۇيىمداردىڭ, حالىقتىڭ اتقارار ءرولى ۇلكەن. ەل بولاشاعى ءۇشىن ماڭىزدى ساتتە حالىق سايلاۋ ۇدەرىسىنە بەلسەنە قاتىسىپ, ەل تاڭداۋىن بىرگە جاساۋى قاجەت. ەلىمىزدىڭ بولاشاعىنا بەيجاي قارامايتىن ءار ازامات سايلاۋ ۋچاسكەسىنەن تابىلادى دەگەن سەنىمدەمىن.
رىمتاي شوكەەۆ,
پاۆلودار وبلىستىق ارداگەرلەر
كەڭەسىنىڭ توراعاسى