جولاقى تولەۋدەن جالتارعاندار كوپ

سونىمەن وسى بريفينگتە تاسىمالداۋشىلار الماتىلىقتاردى جولاقىنى تولەۋدىڭ بالاما ادىستەرىن قولدانۋعا شاقىردى.

بۇگىندە الماتىدا قوعامدىق كولىكپەن ءجۇرۋ اقىسىن تولەۋدىڭ بىرنەشە ءتۇرى بار. «ONAY» كولىك كارتاسى, «ONAY» ءموبيلدى قوسىمشاسى, QR كودتى سكانەرلەۋ نەمەسە ءموبيلدى قوسىمشادا قوعامدىق كولىكتە كورسەتىلگەن 7 تاڭبالى ساندىق كودتى ەنگىزۋ, SMS, Beeline ابونەنتتەرى تەلەفوننان *9909# نەمەسە *202# كومانداسىن تەرۋ ارقىلى جولاقىنى تولەۋگە بولادى. سونداي-اق كولىك جۇرگىزۋشىسىنە قولما-قول تولەم جاساي الاسىز. مۇنداي جاعدايدا جولاقى 150 تەڭگە بولادى. ودان كەيىن جۇرگىزۋشى جولاۋشىعا «ONAY»-دىڭ قاعاز بيلەتىن بەرۋگە ءتيىس.

«الماتىەلەكتروترانس» تاسىمال­داۋ­شىسىنىڭ مالىمەتى بويىنشا, قا­لالىق باعىتتاردا جولاقىنى تو­لەۋدەن جالتارۋ شامامەن 20 پايىزدى قۇ­رايدى. 4 جىل بۇرىن قالالىق با­عىت­تار بويىنشا تو­لەمەۋ 30 پايىزعا جۋىق بولسا, قالا ماڭىن­داعى مارشرۋتتاردا بۇل كورسەتكىش 70 پايىزعا جەتكەن.

«بىراق وسى كورسەتكىشتىڭ ءوزى از ەمەس. بۇل كومپانيانىڭ, كو­بىرەك اۆتوبۋس الۋىنا, قوسالقى بولشەكتەردى ساتىپ الۋىنا اسەر ەتەدى. سونداي-اق جوسپارلاۋ ولشەمدەرىنىڭ ءبىرى – جولاۋشىلار اعىنىن ءدال انىقتاۋعا مۇمكىندىك بەرمەيدى. ول بارلىق ۇدە­رىسكە اسەر ەتەدى. ياعني تولەمنەن جال­تارۋ ارقىلى مۇنداي جولاۋشىلار ءبىرىنشى كەزەكتە وزدەرىنە عانا ەمەس, باسقا دا ءوزى سياقتى جولاۋشىلارعا زيان كەلتىرەدى. بىراق بارلىق جولاۋشى جولاقىنى تولەۋدەن جالتارادى دەۋگە بولمايدى. تەگىن ءجۇرۋ دەگەن بولمايتىنىن دا جاقسى تۇسىنەتىن جۇرت بار. ماسەلەن, جەدەل جەلى تەلەفونىنا تولەم جاساماعان جولاۋشىلاردىڭ سۋرەتتەرى ءجيى تۇسەدى. جولاقى تولەمەگەن­دەر­دى جولاۋ­شىلاردىڭ وزدەرى سوگىپ, بە­تىنە ايتىپ جاتاتىن جاعدايلار بار», دەيدى پايدالانۋ جو­نىندەگى ديرەك­تور­دىڭ ورىنباسارى ابىلايحان ومارحان.

قازىرگى ۋاقىتتا بيلەتسىز جول جۇرگەنى ءۇشىن سالىناتىن ايىپپۇل مولشەرى – 2 اەك. بيلەتسىز جۇرەتىن جولاۋشىلاردى كۇندەلىكتى باقىلاۋ جانە تەكسەرۋ جۇمىستارىن 50 مامان جۇرگىزەدى. ولاردىڭ مىندەتىنە جولاۋشىلاردىڭ تولەم جاساۋ فاكتىلەرىن تەكسەرۋ, سونداي-اق قولدانىستاعى تولەم تۇرلەرىن ءتۇسىندىرۋ كىرەدى.

سونىمەن قاتار بيلەت تەكسەرۋشى جولاۋشى تاراپىنان تاسىمالداۋ ەرەجەلەرىن بۇزۋ فاكتىلەرى ورىن السا, مىسالى, جولاۋشى ءيتىن تۇمىلدىرىقسىز, قارعى باۋسىز الىپ جۇرسە نەمەسە ءوزى ماس بولسا, ءتۇسىرىپ كەتۋگە قۇقىلى.

جولاۋشى تولەۋدەن, تەكسەرۋشىنىڭ تالاپتارىنا باعىنۋدان باس تارتقان جاعدايلاردا, نۇسقاۋلىققا سايكەس ول پوليتسيانىڭ اكىمشىلىك ايىپپۇل سالۋى ءۇشىن 102 نومىرىنە قوڭىراۋ شالۋعا قۇقىلى. وسىلايشا, جىل باسىنان بەرى تاسىمالداۋ بارىسىن تەكسەرۋشى 113 رەت قوڭىراۋ شالىپ, پوليتسەيلەر مۇنداي جولاۋشىلارعا تيىسىنشە 113 حاتتاما تولتىرعان.

تولەمەۋ فاكتىلەرىنىڭ ازايۋ ىرعا­عىنا قاراماستان, قالاداعى احۋال وزگەرە قويماعان. تاسىمالداۋشىلار جولاۋشىنىڭ جولاقىنى ۋاقىتىندا تولەۋ مىندەتىن قاتاڭ تۇردە ەسكەرتۋگە ءماجبۇر بولىپ وتىر. سەبەبى بۇل اۆتوبۋس پاركىن ۇستاۋعا تىكەلەي اسەر ەتەدى.

الماتى