ورتاعاسىرلىق سارايشىق قالاشىعى كونە تاريحتىڭ كومبەسىندەي كورىنەدى. ويتكەنى جىل سايىن قۇندى جادىگەرلەر تابىلاتىن تاريحي مەكەننىڭ جۇمباققا تولى سىرى ءالى تولىق اشىلعان جوق.
اتىراۋ وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ ايتۋىنشا, بىلتىردان بەرى مۇندا ساپار ورتالىعىنىڭ قۇرىلىسى ءجۇرىپ جاتىر. ونى وتكەن جىلدىڭ سوڭىنا دەيىن اياقتاۋ كوزدەلگەن ەكەن. الايدا وبلىس اكىمدىگى قازاقستاننىڭ وزگە وڭىرلەرىندەگى وسىنداي نىسانداردان وزگەشە بولۋى ءۇشىن ساپار ورتالىعىنىڭ سىرتقى كەلبەتىنە وزگەرىس ەنگىزۋ جونىندە ۇسىنىس جاساعان. سول سەبەپتەن, قۇرىلىس جۇمىسىنىڭ مەرزىمى ۇزارتىلعان.
– قازىر ساپار ورتالىعىنىڭ قۇرىلىسى اياقتالدى دەپ ايتۋعا بولادى. ەندى جاڭا نىساننىڭ ىرگەلەس اۋماعىن اباتتاندىرۋ ءۇشىن تاس توسەۋ, كوشەت ەگۋ, سىرتقى جارىقتاندىرۋ, ورىندىقتاردى ورناتۋ سەكىلدى جۇمىستار اتقارىلىپ جاتىر. ءبىز قۇرىلىس نىسانىنا قاداعالاۋ جۇرگىزىپ, الدىمەن ساپاسىنا نازار اۋدارىپ وتىرمىز. مەردىگەرگە قۇرىلىس بويىنشا ەسكەرتۋلەر جاسالىپ, ناتيجەسىندە قاتەلىكتەر تۇزەتىلدى, – دەيدى نۇربەرگەن قۇسايىنوۆ.
باسقارما باسشىسىنىڭ دەرەگىنە سۇيەنسەك, ساپار ورتالىعىنىڭ قۇرىلىسىنا 780 ملن تەڭگە بولىنگەن. وسى كەزگە قارجىنىڭ 90 پايىزى يگەرىلىپتى. ەندى قارجىنىڭ 10 پايىزى نىسان تولىق تاپسىرىلعاننان كەيىن مەردىگەرگە اۋدارىلادى.
ساپار ورتالىعىن اشۋ كوزدەلىپ وتىر. ورتالىقتاعى جاڭا مۋزەيدە التى ەكسپوزيتسيالىق زال مەن كورمە پاۆيلونى بولادى. مۋزەي ەكسپوزيتسيالارىن ورناتۋ «قازاق ماتەريالدىق مادەنيەت عىلىمي-زەرتتەۋ جانە جوبالاۋ ينستيتۋتى» جشس-عا جۇكتەلگەن. سەرىكتەستىكتىڭ دامۋ جونىندەگى ديرەكتورى رينات كۋتدۋسوۆتىڭ ايتۋىنشا, «سارايشىق» ساپار ورتالىعى – التىن وردا كەزەڭىنە ارنالعان ەلىمىزدەگى بىرەگەي نىسان.
– سارايشىق – ۇلى جىبەك جولى بويىنداعى ورتاعاسىرلىق قالا. ساپار ورتالىعىندا موڭعولعا دەيىنگى, موڭعول كەزەڭى, سونداي-اق نوعاي ورداسى مەن قازاق حاندىعىنا ارنالعان بىرنەشە ەكسپوزيتسيالىق ايماق بولادى. بۇل ەكسپوزيتسيالارعا بىرقاتار قۇندى دۇنيەلەر, ونىڭ ىشىندە سارايشىق قالاشىعىنىڭ ماتەريالدىق مۇرالارى, ءدال وسى جەردەن ءار كەزەڭدە تابىلعان جادىگەرلەر, التىن وردا تۋى نەمەسە بۇگىندە كەيبىر ەلدەردىڭ مەملەكەتتىك ەلتاڭبالارىندا كورىنىس تاپقان قوس باستى بۇركىت بەلگىسى قويىلادى. بۇرىن بۇل بەلگى سارايشىقتان تابىلعان ەدى. قاسىم حان مەن باتۋ حاننىڭ بەينەلەرى العاش رەت وسىندا كورسەتىلەدى. بۇل تۇلعالاردىڭ بەينەلەرىن جاساۋ ءۇشىن عالىمدارمەن بىرلەسكەن جۇمىس اتقارىلدى, – دەيدى رينات كۋتدۋسوۆ.
ونىڭ ايتۋىنشا, ساپار ورتالىعىندا عىلىمي نەگىزدە قايتا جاسالعان سارايشىقتىڭ بىرەگەي ماكەتى ۇسىنىلادى. التىن وردا كەزەڭىندەگى سارايشىقتىڭ ماكەتىن جاساۋعا عالىمدار كومەكتەسكەن. ال بارلىق ەكسپوزيتسيانىڭ مۋلتيمەديالىق نۇسقاسى جاسالعان. بۇل ساپار ورتالىعىنا كەلەتىن قوناقتاردىڭ قازاق, ورىس جانە اعىلشىن تىلدەرىندە اقپارات الۋعا مۇمكىندىك بەرەدى.
اتىراۋ وبلىسى