«بايتاق» جاسىلدار پارتياسىنىڭ بەلسەندىلەرى الماتىدا جاستارمەن كەزدەستى. باسقوسۋعا ساياسي ۇيىم مۇشەلەرى – بەلگىلى زاڭگەرلەر, ديپلوماتتار مەن ساياساتتانۋشىلار قاتىستى.
جۇزدەسۋ اياسىندا پارتيا باعدارلاماسىنىڭ نەگىزگى باعىتتارى ءتۇسىندىرىلىپ, الداعى ناۋقاننىڭ ماڭىزدىلىعى ايتىلدى. الدىڭعى تولقىن اعالار قوعامدا ەكولوگيالىق مادەنيەت قالىپتاستىرۋ توڭىرەگىندە اڭگىمە ءوربىتىپ, جاستاردىڭ وي-پىكىرلەرىن تىڭدادى. شاھاردا ۇگىت-ناسيحات جۇمىستارى كەستەگە ساي جۇرگىزىلىپ جاتىر. پارتيا بەلسەندىلەرى الداعى كۇندەرى دە قاراپايىم سايلاۋشىلارمەن جانە ەڭبەك ۇجىمدارىمەن بىرقاتار كەزدەسۋ ۇيىمداستىرۋدى جوسپارلاپ وتىر. ايتا كەتەيىك, الماتى قالاسى بويىنشا ءماجىلىس دەپۋتاتتىعىنا پارتيالىق ءتىزىم بويىنشا 3 كانديدات تىركەلگەن. ءماسليحات سايلاۋىندا 13 ۇمىتكەر باق سىنايدى.
پارتيا ساياسي كەڭەسىنىڭ مۇشەسى اينۇر ءسابيتوۆا: «ەركىن ديالوگ فورماتىندا وتكەن كەزدەسۋ ناتيجەلى بولدى. جاستار تاراپىنان كوپ سۇراق قويىلدى. ولارعا جان-جاقتى جاۋاپ بەرىلدى. اعا بۋىن مەن بۇگىنگى جاستار اراسىنداعى قارىم-قاتىناس وسىلاي جالعاسا بەرۋگە ءتيىس دەپ ەسەپتەيمىز», دەدى.
سونداي-اق «بايتاق» پارتياسىنىڭ مۇشەلەرى ءاليحان بوكەيحاننىڭ رۋحىنا تاعزىم ەتتى. ناقتىلاساق, «بايتاق» جاسىلدار پارتياسىنىڭ باسشىلىعى مەن ساياسي قۇرىلىم وكىلدەرى «الاش» قوزعالىسى كوشباسشىلارىنا ارنالعان ەسكەرتكىش ماڭىنا جينالىپ, تاريحي تۇلعالاردىڭ رۋحىنا تاعزىم جاسادى.
ەلوردادا وتكەن ءىس-شاراعا قالاداعى قوعامدىق قورلاردىڭ ءبىرى مۇرىندىق بولدى. ءاليحان بوكەيحان, احمەت بايتۇرسىن ۇلى جانە مىرجاقىپ دۋلات ۇلى سىندى ۇلتىمىزدىڭ ۇلى تۇلعالارىنا ارنالعان ەسكەرتكىش 2021 جىلى جازدا اشىلعان بولاتىن.
ايتا كەتەيىك, «بايتاق» پارتياسىنىڭ رەسپۋبليكالىق جانە وڭىرلىك شتابتارى كەستەگە ساي جۇمىس ىستەپ جاتىر. حالىقپەن كەزدەسۋلەردە سايلاۋالدى باعدارلامانىڭ نەگىزگى باعىتتارى كەڭىنەن ءتۇسىندىرىلىپ, قويىلعان ساۋالدارعا ناقتى جاۋاپتار بەرىلىپ جاتىر. «ۇگىت-ناسيحات توبى ءار ايماقتا, ءار وڭىردە حالىقپەن كەزدەسۋ ۇيىمداستىردى. وسىنداي قىرۋار جۇمىس اياسىندا ءبىز ارنايى الاشتىقتارعا تاعزىم ەتىپ كەلىپ وتىرمىز. ولارعا تاعزىم ەتۋ – تاريحقا تاعزىم جاساۋ», دەدى «بايتاق» جاسىلدار پارتياسىنىڭ توراعاسى ازاماتحان امىرتاەۆ.