ەلباسىنىڭ ۇلى جىبەك جولىن جاڭعىرتۋعا بايلانىستى بەرگەن تاپسىرمالارى جۇزەگە اسىپ جاتىر. كەشە كورشى قىتاي ەلىنىڭ گونكونگ قالاسىنداعى ارنايى اكىمشىلىك اۋدانىندا «قازاقستان تەمىر جولى» ۇك» اق ەنشىلەس كومپانياسى – «KTZ Express» كوممەرتسيالىق قۇرىلىمىنىڭ سالتاناتتى اشىلۋ ءراسىمى بولدى.
ۇلتتىق تاسىمالداۋشىنىڭ جاڭا ءوفيسى ازياداعى جەتەكشى ورتالىقتىڭ الەم ەلدەرىمەن كولىكتىك-لوگيستيكالىق ماقساتتاعى قارجىلىق وپەراتسيالار جاساۋىنا وكىلەتتىلىك ەتەتىن بولادى. گونكونگتەگى بۇل كوممەرتسيالىق وفيس ۇلتتىق كومپانيانىڭ كولىكتىك-لوگيستيكالىق حاب قۇرۋداعى, ۇلى جىبەك جولىن جاڭعىرتۋداعى, رەسپۋبليكانىڭ ترانزيتتىك الەۋەتىن ارتتىرۋداعى تىڭ قادامى بولىپ وتىر.
كوممەرتسيالىق قۇرىلىم قازاقستان اۋماعى ارقىلى ەكسپورتتىق ترانزيتتىك جۇكتەردىڭ تۇراقتى وتكىزىلۋىن قامتاماسىز ەتۋ ءۇشىن ءبىر ورتالىققا جۇمىلدىرادى. ماسەلەن, قىتايدىڭ ليانيۋنگان, چۋنتسين, سيان, شەنجەن وكرۋگتەرىنەن شىققان تاۋارلاردى ەكسپورتتاۋ ءۇشىن وسى حابتىڭ قىزمەتى پايدالانىلاتىن بولادى. قۇرىلىم كولىكتىك-لوگيستيكالىق قىزمەت تاپسىرىستارى پاكەتىن ازىرلەيدى. كوممەرتسيالىق ۇسىنىستاردىڭ العا جىلجۋىنا ماركەتينگتىك شارالاردىڭ ۇيىمداستىرىلۋىن قامتاماسىز ەتىپ, قازاقستان اۋماعى ارقىلى تاسىمالداۋدى جاساقتاۋ ىستەرىمەن اينالىسادى.
بۇگىنگى تاڭدا قىتاي ەلىنەن ەۋروپاعا قازاقستان اۋماعى ارقىلى جۇك تاسىمالداۋ مەرزىمى تەڭىز جولىمەن سالىستىرعاندا ءۇش ەسەگە ازايىپ, 14-16 كۇندە مەجەلى جەرگە جەتكىزىلىپ ءجۇر. ەندى, بۇدان بىلاي «قازاقستان تەمىر جولى» ۇك» اق پەن «KTZ Express» اق بىرلەسكەن كوممەرتسيالىق جوباسى قىتايمەن اراداعى كولىكتىك-لوگيستيكالىق نارىقتىڭ دامۋىنا زور ىقپال ەتەدى. مىسالى, وتكەن مامىر ايىندا قازاقستان قىتايدىڭ ليانيۋنگان پورتىندا اۋماعى 21,6 گەكتار كولىكتىك-لوگيستيكالىق تەرمينال اشتى. تەرمينالدا قىتايدىڭ ماگيسترالدىق جەلىسىنە شىعا الاتىن قويمالىق ورىندار بار. باستاپقى وتكىزۋ مۇمكىندىگى شامامەن جىلىنا 500 مىڭ دفە, تاۋلىكتىك ءتۇسىرىپ-تيەۋ قۋاتى 10 پويىز دەپ جوسپارلانىپ وتىر.
وسى ورايدا ايتا كەتەرىمىز, قىتاي مەن قازاقستان ارالىعىندا 2012 جىلى پايدالانۋعا بەرىلگەن ەكى ترانزيتتىك تەمىرجول جۇك وتكەلى دوستىق – الاشاڭقاي مەن التىنكول – قورعاس قازىرگى تاڭدا جۇك تاسىمالىندا جەمىستى جۇمىس جاساپ تۇر. ەكى ەل شەكاراسىندا «قورعاس – شىعىس قاقپاسى» ارنايى ەكونوميكالىق ايماعى قىتايدان كەلەتىن جۇكتەردى ۇيلەستىرۋدىڭ وڭىرلىك ورتالىعى بولىپ قالىپتاسپاق.
قازاقستاننىڭ كولىكتىك-لوگيستيكالىق وپەراتورى رەتىندە قتج ەل اۋماعى عانا ەمەس, شەتەلدەردە دە جۇكتەردى جەتكىزۋدىڭ «ەسىكتەن ەسىككە دەيىنگى» ءتارتىبىن ەنگىزبەك. وسى ماقساتتا اقتاۋ پورتىنىڭ حالىقارالىق وتكىزۋ قابىلەتى وسىرىلەدى. قوسىمشا بارلىق كولىك تۇرلەرىن شوعىرلاندىراتىن ترانزيتتىك تەمىرجولدار سالىنادى.
كومپانيانىڭ گونكونگتەگى جاڭا ءوفيسى قازاقستان مەن قىتاي اراسىنداعى جۇك تاسىمالىنىڭ ارتۋىنا عانا ەمەس, گونكونگتىڭ جاھاندىق جۇك جەتكىزۋ تىزبەگىندەگى قارجى سەكتورى مەن لوگيستيكالىق سەرىكتەسىگىنە تىڭ سەرپىن بەرەدى.
نۇرباي ەلمۇراتوۆ,
«ەگەمەن قازاقستان».