كۇمىس كولدەردى ومىراۋىنا جاقۇت مونشاقتاي جارقىراتا تاعىپ, كوركىمەن كورگەن جاننىڭ تاڭدايىن قاقتىراتىن كوكشەتاۋ مەن قورعالجىننىڭ اراسىنداعى سۋ ايدىندارىنىڭ باسىم كوپشىلىگى – دالالىق كولدەر ەسەبىندە. تايىز بولعاندىقتان قاقاعان قىستا بالىققا دا قاۋىپ كوپ.
بيىل قىس قاتتى بولدى. ساقىلداعان سارى اياز سۋ تۇبىندەگى تابيعات بايلىعىنا دا قاتەرىن ءتوندىرىپ جاتىر. كەيبىر كولدەردەگى مۇزدىڭ قالىڭدىعى – ءبىر مەترگە جۋىقتادى. سولتۇستىككە كوكتەم كەلىپ, كول بىتكەن مۇز قۇرساۋىنان قۇتىلعانشا ءالى دە تابانداتقان اي جارىمعا جۋىق ۋاقىت بار. مامانداردىڭ ايتۋىنا قاراعاندا, مۇزدىڭ اس-تىڭعى قاباتىندا وتتەگىنىڭ تولايىم سارقىلىپ, كوپ بالىقتىڭ قىناداي قىرىلاتىنى دا – وسى مەزگىل. قازىر وڭىردە بۇل تاراپتاعى قىرۋار جۇمىس قىزۋ قولعا الىنعان. ايتالىق, زەرەندى اۋدانىنىڭ كولدەرىندە مۇز ويۋ جۇمىستارى ۇيىمشىلدىقپەن جۇرگىزىلىپ جاتىر. دالالىق كولدەر ساناتىنداعى قۇركولدىڭ دە مۇزى قالىڭ. ءبىر ايتا كەتەرلىگى, بالىق تا كوپ كورىنەدى. بالىقتى ساقتاپ قالۋ ءۇشىن كۇن سايىن مۇز ويىلادى.
– ءبىز مۇنداي جۇمىستاردى قىس بويى جۇرگىزىپ كەلەمىز. باستى ماقسات تابيعاتتىڭ يەن بايلىعىن ساقتاپ قالۋ عوي. ءدال وسىنداي يگىلىكتى ءىس «ەسىل» باسسەينىنىڭ اۋماعىندا دا ۇيىمداستىرىلىپ جاتىر, – دەيدى وبلىستىق بالىق ينسپەكتسياسىنىڭ باس مامانى ەرلان قوسماعانبەتوۆ.
وبلىستا بالىق شارۋاشىلىعىن دامىتۋعا ابدەن جارامدى 600-گە جۋىق سۋ ايدىنى بار. وسى جىلى وسىناۋ كولدەردىڭ 132-سىندە اەراتسيا جۇرگىزىلدى. ماماندار 7 مىڭنان اسا ويىق ويىپتى. وعان قوسا بالىق «پاتشالىعىن» وتتەگىمەن قامتاماسىز ەتۋ ءۇشىن 400-دەن اسا تۇسىن كەسىپ, اۋا وتكىزەتىن ورىن ازىرلەگەن.
– مۇز استىنا وتتەگىن جىبەرۋمەن قاتار, كول بەتى قوقىس پەن قامىستان دا تازارتىلادى. تاماشا تابيعاتىمىزدى ايالاپ, قامقورلىق كورسەتىپ وتىراتىن بولساق, جۇدەمەس ەدى. كەلەر ۇرپاققا قالدىراتىن مۇرامىز دا وسى ەمەس پە؟ – دەيدى بالىق ينسپەكتسياسىنىڭ باس مامانى اقان سىزدىق.
كولدەردى تازارتۋعا جۇزگە جۋىق ادام كۇشى تارتىلىپتى, ارنايى تەحنيكا دا بولىنگەن. ءدال وسىلاي جاناشىرلىقپەن كۇش بىرىكتىرىلسە, بالىقتىڭ دا باعى تايمايتىن شىعار.
اقمولا وبلىسى