ءىىم مەن ۇقك ۆەدومستۆوارالىق جەدەل-تەرگەۋ توبى رەداكتسيالار مەن باق وكىلدەرىنە جاسالعان شابۋىلدار دەرەگى بويىنشا قىلمىستىق ءىستى تەرگەۋدى جالعاستىرىپ جاتىر, دەپ حابارلايدى Egemen.kz Polisia.kz سايتىنا سىلتەمە جاساپ.
جۋرناليستەرگە جاسالعان شابۋىلداردى ۇيىمداستىرۋشى جانە باستاماشى قازاقستان ازاماتى كلەبانوۆ (مانەۆيچ) اركادي سەرگەەۆيچ ەكەنى انىقتالدى. ول ۇستالىپ, سوتتىڭ رۇقساتىمەن قاماۋعا الىندى.
وعان قر قىلمىستىق كودەكسىنىڭ 115-ءشى «قاۋىپ-قاتەر», 147-ءشى «جەكە ومىرگە قولسۇعىلماۋشىلىقتى بۇزۋ», 158-ءشى «جۋرناليستىك قىزمەتكە كەدەرگى جاساۋ», 202-ءشى «بوتەن م ۇلىكتى قاساقانا جويۋ نەمەسە ءبۇلدىرۋ» جانە 293-ءشى «بۇزاقىلىق» باپتارىمەن قاراستىرىلعان ايىپتار تاعىلدى.
ۇستالعان ادام ىستەگەن ارەكەتىن مويىندادى. جاۋاپ الۋ بارىسىندا بارلىق شابۋىلداردى ءوز بەتىنشە ۇيىمداستىرعانىن, ويتكەنى جەكە سەبەپتەر مەن بىرقاتار قازاقستاندىق تانىمال باق وكىلدەرىنە بۇرىنعى تالاپتارىنىڭ بولعانىن مالىمدەدى.
كلەبانوۆ-مانەۆيچ قۇقىققا قايشى جوسپارلارىن ىسكە اسىرۋ ءۇشىن حاكەرلەر توبى مەن اكتسيالاردى ورىنداۋشىلاردى جالداعان. ارانداتۋ ماقساتتارى مەن نۇسقالارىن ءوز بەتىنشە تاڭداعان. ورىنداۋشىلارعا بەرىلەتىن قاراجاتتى كريپتوۆاليۋتا وپەراتسياسىنان تۇسكەن پايدا ەسەبىنەن تولەپ وتىرعان.
تەرگەۋ جالعاسىپ جاتىر, ونىڭ ناتيجەلەرى تۋرالى قوسىمشا حابارلاناتىن بولادى.