بۇگىن قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قانات تۋمىش ەفيوپيا پرەمەر-ءمينيسترىنىڭ ورىنباسارى – سىرتقى ىستەر ءمينيسترى دەمەكە مەكوننەنمەن كەزدەسۋ وتكىزدى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
كەزدەسۋ قوسىلماۋ قوزعالىسىنىڭ COVID-19-عا قارسى كۇرەس بويىنشا بايلانىس توبىنىڭ ءسامميتى شەڭبەرىندە ۇيىمداستىرىلدى.
ءوتىپ جاتقان ءسامميتتىڭ كۇن تارتىبىندەگى پاندەمياعا جاۋاپ جانە پوستكوۆيدتىك كەزەڭدەگى كووپەراتسيا ماسەلەسى تالقىلاۋدىڭ نەگىزگى تاقىرىپتارىنىڭ ءبىرى بولدى. ەفيوپيالىق تاراپ بۇل تۇرعىدا, ەڭ الدىمەن, افريكا قۇرلىعى ءۇشىن قازاقستان پرەزيدەنتى قاسىم-جومارت توقاەۆتىڭ بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ جونىندەگى باستاماسىنىڭ وزەكتىلىگىن اتاپ ءوتتى.
سونىمەن قاتار تاراپتار ساياسي, ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ جاي-كۇيى مەن پەرسپەكتيۆالارىن تالقىلادى. ءوزارا ساۋدانى دامىتۋ, ەكىجاقتى ءىس-شارالاردى وتكىزۋ, سونداي-اق كوپجاقتى قۇرىلىمدار شەڭبەرىندە بىرلەسكەن جۇمىس ماسەلەلەرىنە ەرەكشە نازار اۋدارىلدى.
ق. تۇمىش قازاقستاننىڭ افريكا وداعىنىڭ ساياسي ورتالىعى ورنالاسقان ەفيوپيامەن جان-جاقتى ىنتىماقتاستىعىن نىعايتۋدىڭ ماڭىزدىلىعىن اتاپ ءوتىپ, ەلىمىز ادديس-ابەبانى افريكا قۇرلىعىنداعى ءوزىنىڭ نەگىزگى سەرىكتەستەرىنىڭ ءبىرى رەتىندە قاراستىراتىنىن ايتتى.
سونداي-اق ەفيوپيالىق ارىپتەسىن بيىلعى 18-19 اقپاندا ادديس-ابەبا قالاسىندا افريكا وداعىنىڭ 36-شى ءسامميتىنىڭ ءساتتى وتۋىمەن قۇتتىقتادى. سامميت قورىتىندىلارى افريكا ەلدەرىنىڭ كونتينەنتتەگى بەيبىتشىلىك پەن قاۋىپسىزدىكتى قامتاماسىز ەتۋ ماسەلەلەرىندەگى بىرلىگىن, سونداي-اق «افريكا ماسەلەلەرىنە ارنالعان افريكالىق شەشىمدەر» جانە «قارۋدى ءۇنسىز قالدىرۋ» قاعيداتتارىن جۇزەگە اسىرۋداعى پروگرەستى كورسەتتى.
كەزدەسۋ ناتيجەسىندە تاراپتار ءوزارا قىزىعۋشىلىق تۋدىراتىن ماسەلەلەر بويىنشا ءوزارا ءىس-قيمىلدى جالعاستىرۋعا ۋاعدالاستى.
ەفيوپيا – كونتينەنتتىڭ 55 مەملەكەتى مۇشە افريكا وداعىنىڭ شتاب-پاتەرى ورنالاسقان ەل.
قازاقستان ەفيوپيامەن 2011 جىلعى 5 قىركۇيەكتە ديپلوماتيالىق قارىم-قاتىناس ورناتتى. 2014 جىلعى 23 جەلتوقساننان باستاپ ەفيوپياداعى قازاقستان ەلشىلىگى جۇمىس ىستەيدى.