«Amanat» پارتياسىنىڭ رەسپۋبليكالىق سايلاۋالدى شتابىنىڭ مۇشەلەرى اتىراۋ وبلىسىندا كەزدەسۋلەر وتكىزدى. اتاپ ايتساق, ماقات اۋدانىنىڭ دوسسور كەنتىندە مۇناي سالاسىنىڭ ەڭبەك ارداگەرلەرى جانە قوعام وكىلدەرىمەن جۇزدەستى.
مۇنايشىلاردىڭ, گەولوگتەردىڭ, بۇرعىلاۋشىلاردىڭ, ينجەنەرلەردىڭ, تەحنولوگتەردىڭ, باسقا دا مامانداردىڭ جەمىستى جۇمىس ىستەۋىنىڭ ناتيجەسىندە سالا وتاندىق ەكونوميكانىڭ لوكوموتيۆىنە جانە قازاقستان حالقىنىڭ ءال-اۋقاتىنىڭ بەرىك ىرگەتاسىنا اينالدى. ارداگەرلەردىڭ ايتۋىنشا كوپتەگەن كاسىپورىندا, اسىرەسە وزگە ەلدىڭ كاپيتالى بار كومپانيالاردا شەتەلدىك جانە قازاقستاندىق قىزمەتكەرلەرگە جالاقى تاعايىنداۋ كەزىندە تەڭدىك ساقتالمايدى. اۋدان تۇرعىندارى ءۇشىن مەديتسينالىق قىزمەت پەن ءبىلىم بەرۋ ساپاسىن جاقسارتۋ, تۇرعىن ءۇي قۇرىلىسى, قورشاعان ورتانى قورعاۋ جانە حالىقتى جۇمىسپەن قامتۋ ماسەلەلەرى دە ماڭىزدى بولىپ وتىر.
پارتيا توراعاسى ەرلان قوشانوۆ اتاپ وتكەندەي, اۋداندا 2 مىڭعا جۋىق ادامدى جۇمىس ورنىمەن قامتاماسىز ەتەتىن گاز وڭدەۋ زاۋىتىن سالۋ جوسپارلانىپ وتىر. سونداي-اق پارتيا ءىرى ينۆەستورلاردىڭ بيزنەستىڭ الەۋمەتتىك جاۋاپكەرشىلىگى قاعيداتى بويىنشا وبلىستى دامىتۋعا قاراجات قۇيۋىن قاداعالايدى.
«كورپوراتسيالاردىڭ ۇستەمە تابىسى قاتارداعى قىزمەتكەرلەرگە لايىقتى ەڭبەكاقى تولەۋگە باعىتتالۋعا ءتيىس. ءبىز بىلىكتىلىگى شەتەلدىكتەرمەن بىردەي قازاقستاندىق ماماندارعا ولارمەن تەڭ ەڭبەكاقى تولەنۋىنە قول جەتكىزەمىز», دەدى ە.قوشانوۆ.
ال پارلامەنت ماجىلىسىنە ۇمىتكەر ەربول سالىقوۆ, باتىس قازاقستان وبلىستىق ماسليحاتقا ءبىرمانداتتى سايلاۋ اۋماعىنان كانديدات ازامات بيسەنوۆ جانە قالالىق ماسليحاتقا ۇمىتكەر رافحات داناعۇلوۆ «ورالتازاسەرۆيس» جشس ۇجىمىمەن كەزدەسىپ, ۇگىت-ناسيحات جۇرگىزدى. ەربول سالىقوۆ پارتيانىڭ سايلاۋالدى باعدارلاماسىندا ەڭ الدىمەن حالىقتىڭ تابىسىن ارتتىرۋ جانە جۇمىسسىزدىق دەڭگەيىن تومەندەتۋ مىندەتى تۇرعانىن اتاپ ءوتتى. ال بۇل ماقساتتى ورىنداۋدىڭ ءتيىمدى تەتىگى – شاعىن جانە ورتا بيزنەستى دامىتۋ.
وبلىستا قازىر 53 مىڭ كاسىپكەرلىك سۋبەكتىسى تىركەلگەن. وندا 118 مىڭنان استام ادام ەڭبەك ەتەدى. ەندى بۇل كورسەتكىشتى ودان ءارى ارتتىرۋ قولعا الىنادى. پارتيا شاعىن جانە ورتا بيزنەس ارقىلى جىلىنا كەمىندە 500 ادامدى جۇمىسقا تارتپاق.