ەلدى قورعاۋعا دايىنسىڭ با؟

بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى باۋىرجان ارتىقوۆ مالىمدەدى.

«جەرگىلىكتى اتقارۋشى ورگاندا­رىنىڭ 195 اسكەرگە شاقىرۋ پۋنكتىندە قالالىق جانە اۋداندىق اسكەرگە شاقىرۋ كوميسسيالارى ءوز جۇمىسىن باستايدى, وعان اكىمدەردىڭ ورىنباسارلارى باسشىلىق ەتەدى. اسكەرگە شاقىرىلۋعا ءتيىستى ەر ازاماتتاردى حاباردار ەتۋ دەربەس شاقىرتۋ قاعازىن جولداۋ ارقىلى جۇزەگە اسىرىلادى. شاقىرتۋ قاعازى ولاردىڭ تۇرعىلىقتى مەكەنجايىنا نەمەسە جۇمىس ورىندارىنا جەتكىزىلەدى. بۇل رەتتە وسى ۇدەرىستى اۆتوماتتاندىرۋ ماقساتىندا 2021 جىلدان باستاپ اس­كەرگە شاقىرىلۋشىلاردى SMS-حا­بار­لاما جولداۋ ارقىلى دا حاباردار ەتۋ جالعاسىپ جاتىر», دەدى سپيكەر.

جالپى, قارۋلى كۇشتەرگە 7 مىڭ­نان استام, ۇلتتىق ۇلانعا 6 مىڭنان استام, ۇقك شەكارا قىزمەتىنە 3 مىڭ­­نان استام, توتەنشە جاعدايلار مينيسترلىگىنە 300-دەن استام, مەم­لەكەتتىك كۇزەت قىزمەتىنە 80-نەن استام ادام شاقىرىلماق. جيىندا قور­عانىس مينيسترلىگى پيلوتتىق رەجىمدە پرواكتيۆتى فورماتتا اسكەرگە شاقىرۋدى كەيىنگە قالدىرۋدى ۇسىن­دى. مۇنداي جاڭاشىلدىق مەم­لە­كەتتىك ورگاندارمەن جانە تسيفر­لىق دامۋ جانە اەروعارىش ونەر­كا­سىبىنىڭ «SmartDataUkimet» اقپا­راتتىق-تالداۋ جۇيەسىمەن ءوزارا ءىس-قيمىل جاساۋدى ۇيىمداستىرۋدىڭ ناتيجەسىندە ىسكە قوسىلعان.

قورعانىس ءمينيسترىنىڭ ورىنباسارى دارحان احمەديەۆ مەرزىمدى اسكەري قىزمەتكە شاقىرۋدى كەيىنگە قالدىرۋ جانە ودان بوساتۋ «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 35 جانە 36-باپتارىنا سايكەس ەلەكتروندىق ۇكىمەت پورتالى ارقىلى كورسەتىلەتىن مەملەكەتتىك قىزمەت ەكەنىن ەسكە سالدى. «ەگەر بۇرىن ازاماتتار اسكەري كوميسسارياتتارعا بارىپ, اسكەرگە شاقىرۋدى كەيىنگە قالدىرۋعا قۇقىلى ەكەنىن دالەلدەۋ قاجەت بولسا, بيىلدان باستاپ مەملەكەتتىك ورگانداردىڭ دەرەكقورلارىن «SmartDataUkimet»-پەن ينتەگراتسيالاۋ ارقىلى ازاماتتاردى مەرزىمدى قىزمەتتەن اۆتوماتتى تۇردە بوساتۋعا مۇمكىندىك بار», دەدى سپيكەر.

قورعانىس ۆيتسە-ءمينيسترىنىڭ ايتۋىنشا, الىنعان مالىمەتتەر نەگىزىندە «SmartDataUkimet» سەگمەنتتەۋدى جۇرگىزەدى جانە ءبىلىم بەرۋ ۇيىم­دا­رىندا جالپى ورتا ءبىلىم الىپ جۇرگەن ازاماتتاردى; تەحنيكالىق جانە كاسىپتىك, ورتا بىلىمنەن كەيىنگى نەمەسە جوعارى ءبىلىم الىپ جۇرگەن ازاماتتاردى; نەكەدە تۇرعان جانە ءبىر جانە ودان دا كوپ بالاسى بار ازاماتتاردى; مەكتەپكە دەيىنگى ءبىلىم بەرۋ ۇيىمدارىندا, ورتا (باستاۋىش, نەگىزگى ورتا, جالپى ورتا), تەحنيكالىق جانە كاسىپتىك, ورتا بىلىمنەن كەيىن­گى ءبىلىم بەرۋ ۇيىمدارىندا كاسىپ­تىك قىزمەتىن جۇزەگە اسىراتىن پەدا­گوگتەردى اۆتوماتتى تۇردە الىپ تاس­تاي وتىرىپ, پوتەنتسيالدى اسكەرگە شاقىرىلۋشىلاردىڭ ءتىزىمىن جاسايدى. «ستۋدەنتتەر بۇگىننەن باستاپ اۆتوماتتى رەجىمدە اسكەري قىزمەتكە شاقىرۋدى كەيىنگە قالدىرۋعا نەگىز بار ەكەندىگى تۋرالى SMS-حابارلاما الادى. ولار بۇعان كەلىسۋى دە, كەلىسپەۋى دە مۇمكىن», دەدى سپيكەر.

قازىرگى ۋاقىتتا زاڭدى تۇردە اس­كەري قىزمەتكە شاقىرۋدى كەيىنگە قالدىرۋ قۇقىعى بار 300 مىڭنان استام ستۋدەنت انىقتالعان. مەملەكەت باسشىسى قويعان مىندەتتەردى ىسكە اسىرۋ اياسىندا قورعانىس مينيسترلىگى مەرزىمدى اسكەري قىزمەت وتكەرۋدىڭ تارتىمدىلىعىن ارتتىرۋ بويىنشا بىرقاتار ءىس-شارانى ىسكە اسىردى. ەڭ الدىمەن, بۇل مەرزىمدى اسكەري قىزمەت ساربازدارى قىزمەت وتكەرگەننەن كەيىن 2 جىل ىشىندە جوو-عا ۇبت-سىز, كونكۋرسسىز وقۋعا ءتۇسۋ مۇمكىندىگى. «بىلتىر قورعانىس ءمينيسترى جوعارى وقۋ ورىندارىنىڭ باسشىلىعىمەن بىرقاتار كەزدەسۋلەر وتكىزدى. مەرزىمدى قىزمەتتەگى ساربازدار ءۇشىن 3 مىڭ گرانت بەرەتىن ەلىمىزدىڭ 41 جوو-مەن مەموراندۋم جاسالدى. اسكەري بورىشىن وتەۋ كەزىندە ۇزدىك ناتيجە كورسەتكەندەر جوعارى وقۋ ورىندارىنا تەگىن ءتۇسۋ مۇمكىندىگىنە يە بولادى», دەدى قورعانىس ۆيتسە-ءمينيسترى.

سونداي-اق اسكەري كافەدرالارعا كونكۋرستان تىس ءتۇسۋ مۇمكىندىگى بەرى­لەدى. «مەرزىمدى اسكەري قىزمەت سار­باز­دارىنا تۇتىنۋشىلىق نەسيە­لەردى, شاعىن قارىزداردى تولەۋ بويىن­شا تولەمدەردى 13 ايعا كەيىنگە قالدىرۋ مۇمكىندىگى بەرىلەدى. 12 اي اسكەردە بولۋ مەرزىمى جانە سارباز جۇمىسقا ورنالاسىپ, نەسيەلەرى بويىن­شا تولەمدى جالعاستىرا الۋىنا 1 اي قاراستىرىلعان. بۇگىندە 3,5 مىڭ اسكەري قىزمەتشى وسى مۇمكىندىكتى پايدالاندى, 5 مىڭعا جۋىق نەسيە بويىنشا تولەمدەر كەيىنگە قالدىرىلدى», دەدى سپيكەر.