قاراعاندى وڭىرىندە 2025 جىلعا دەيىن 18 مەكتەپ بوي كوتەرەدى. ال بيىل زامان تالابىنا ساي وزگەشە فورماتتاعى 10 مەكتەپتىڭ قۇرىلىسى باستالادى. جايلى مەكتەپتەردىڭ جەر تەلىمىن رەسىمدەۋ, ينجەنەرلىك كوممۋنيكاتسيالار جۇيەسىن تارتۋ, جىلدامدىعى كۇشتى ينتەرنەتپەن قامتۋ ماسەلەلەرىن جەرگىلىكتى بيلىك Samruk-Kazyna Construction كومپانياسىمەن بىرلەسە رەتتەمەك.
ۇكىمەت قاۋلىسىمەن Samruk-Kazyna Construction «جايلى مەكتەپ» ۇلتتىق جوباسى نەگىزىندە سالىناتىن مەكتەپتەر قۇرىلىسىنىڭ ديرەكتسياسى بولىپ انىقتالعانى بەلگىلى. كومپانيانىڭ باسقارما توراعاسى ماۋلەن ايمانبەتوۆتىڭ ايتۋىنشا, قازىر جوبانى جۇزەگە اسىرۋ ءۇشىن جەرگىلىكتى اتقارۋشى ورگاندارمەن كەلىسىمشارتتار جاسالىپ جاتىر.
«كەلىسىمشارتتىڭ ءمانى – اكىمدىكتەر تاپسىرىس بەرۋشىنىڭ مىندەتىن اتقاراتىندىعىندا. ءبىز بارلىق قاجەتتى كونكۋرستاردى وتكىزەمىز. ەرس-كەلىسىمشارتىندا جوبالاۋدان باستاپ, قۇرىلىس جانە قۇرال-جابدىقپەن قامتۋعا دەيىنگى بارلىق جۇمىس قاراستىرىلادى. بۇل اۋىل مەن قالادا, مەگاپوليستە سالىناتىن مەكتەپتىڭ ءبارى وقۋشىلارعا بىرىڭعاي ستاندارتتاعى جايلىلىقتى تەڭدەي قاراستىرادى», دەدى م.ايمانبەتوۆ.
مەكتەپ جوبالارى وقۋشى سانىنا قاراماستان ءبىر تيپتەس بولادى. ساۋلەتتىك ديزاينى دا ورتاق. زاماناۋي جيھازدار, قۇرال-جابدىقتار, بەينەباقىلاۋ جۇيەسى بولۋى شارت. ءاربىر مەكتەپتە STEM-زەرتحانا, روبوتتەحنيكا بولمەلەرى, سپورت جانە جاتتىعۋ زالدارى, كوۆوركينگ ورتالىقتارى بولادى. ەرەكشە بالالارعا كەدەرگىسىز ورتا قالىپتاستىرۋ دا نازاردا.
سونىمەن الداعى جىلدارى ايماقتا ءتۇرلى سىيىمدىلىقتاعى جايلى مەكتەپتەر سالىنادى. ولارداعى وقۋشى سانى 300-دەن باستاپ 2 مىڭ ورىنعا دەيىن جەتەدى. بيىل قاراعاندىدا – 4, بالقاشتا – 1, بۇقار جىراۋدا – 3, شەت اۋدانىندا 2 مەكتەپتىڭ قۇرىلىسىن باستاۋ جوسپاردا تۇر. وسى جىلى ىرگەتاسى قۇيىلعان ءبىلىم وردالارى 2024 جىلى تاپسىرىلۋعا ءتيىس. سونداي-اق 2024-2025 جىلدارعا تاعى 8 مەكتەپتىڭ قۇرىلىسى جوسپارلانعان. ولار قاراعاندىدا, ابايدا, قارقارالىدا, پريوزەرسكىدە, نۇرادا سالىنادى.
وبلىس اكىمى ەرماعانبەت بولەكپاەۆتىڭ ايتۋىنشا, ايماقتا «جايلى مەكتەپتى» جۇزەگە اسىرۋ ءۇشىن جول كارتاسى بەكىتىلمەك. ۇلتتىق جوبا ارقىلى ءۇش اۋىسىمداعى, اپاتتى جاعدايداعى مەكتەپتەر جويىلادى جانە ورىن تاپشىلىعى ماسەلەسى رەتتەلەدى.
جالپى, بۇل ۇلتتىق جوباداعى قۇرىلىستاردى ىسكە اسىرۋدا وتاندىق ونىمدەر قولدانىلماق. ماسەلەن, بۇگىندە قاراعاندى وبلىسىندا 500-گە جۋىق كومپانيا ىقتيمال ءونىم بەرۋشى تىزىمىندە تۇر. مۇنداي ءتىزىمدى وبلىستىڭ كاسىپكەرلەر پالاتاسى جاساقتايدى. «جيھاز شىعاراتىن وتاندىق وندىرۋشىلەردىڭ ءتىزىلىمى جاسالىپ جاتىر. الداعى ۋاقىتتا ولار «جايلى مەكتەپ» جوباسىن ىسكە اسىرۋ كەزىندە Samruk-Kazyna Construction-عا ۇسىنىلادى. بۇگىندە قاراعاندى وبلىسىنان وسى تىزىمدە 495 كومپانيا ەندى», دەپ حابارلادى وبلىستىڭ كاسىپكەرلەر پالاتاسى.
قاراعاندى وبلىسى