«بيپىل, بيپىل, بيپىل-اي, تارتشى قۇربىم ءبىر كۇي-اي...» سوناۋ الپىسىنشى جىلداردىڭ سوڭىندا قاز-قاتار تىزىلگەن قىزداردىڭ وسى انگە دومبىرا ۇستاپ بيلەگەنى كوزكورگەن جاننىڭ ءالى ەسىندە. كەيىن بۇل بي «گۇلدەردىڭ» اتىن ەل اراسىندا عانا ەمەس, شارتاراپقا دا شىعاردى. بىلتىر «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى اتى اڭىزعا اينالعان «گۇلدەر» ءانسامبلىن جاڭعىرتۋ جوباسىن قولعا العان ەدى.
تالانتتى جاستارمەن قايتا جاساقتالعان شىعارماشىلىق ۇجىم كۇنى كەشە عانا تۇساۋكەسەر-كونتسەرتىن وتكىزدى. ساحنادا – جاڭا ەسىمدەر, جاڭا ءۇن, زاماناۋي ستيل, وزگەشە وبراز. قازاق ونەرىنىڭ تاريحىندا تۇرەن سالعان ايگىلى ءانسامبلدىڭ جاڭا قۇرامى مادەني ساباقتاستىقتى جالعاي الاتىندارىن دالەلدەدى. ايتۋلى كەشكە «گۇلدەردىڭ» بارشا كورەرمەنى مەن پرەمەر-ءمينيستردىڭ ورىنباسارى التاي كولگىنوۆ, مادەنيەت جانە سپورت ءمينيسترى اسحات ورالوۆ, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قاتىستى.
بۇگىندە قايتا ءبۇر جارعان «گۇلدەردىڭ» ۇلان-عايىر قازاق دالاسىنىڭ ءار تۇكپىرىنە تاراعان اتاق-ابىرويى امبەگە ايان. ءوز ۋاقىتىندا قوعامدى ءدۇر سىلكىندىرگەن شىعارماشىلىق ۇجىمى قىتاي, ءۇندىستان, گەرمانيا, جاپونيا, كۋبا, بولگاريا, موڭعوليا, يزرايل, وڭتۇستىك-شىعىس ازيا مەملەكەتتەرىنە گاسترولدىك ساپارلارعا شىعىپ, ۇلت ونەرىنە ءتانتى ەتكەن ەدى. تاريحتى پاراقتاساق, انسامبل العاشىندا 71 ادامنان قۇرالىپتى. سارا تىنىشتىعۇلوۆا, روزا رىمباەۆا, قاپاش ق ۇلىشەۆا, قايرات بايبوسىنوۆ, ايجان نۇرماعامبەتوۆا, ماقپال ءجۇنىسوۆا, ناعيما ەسقاليەۆا, مايرا نۇركەنوۆا, سەمبەك جۇماعاليەۆ, جەڭىس ىسقاقوۆا, باقىت شاداەۆا باسقا دا ارتىستەر وسى انسامبلدەن شيرىعىپ شىقتى.
«گۇلدەر» ءانسامبلىن جاڭعىرتۋ جوباسىن جۇزەگە اسىرۋ ماقساتىندا ۇجىمعا شىعارماشىلىق وقۋ ورىندارىنىڭ تۇلەكتەرى الىندى. تاجىريبەلى تالىمگەرلەر – باس بالەتمەيستەر انۆارا سادىقوۆا مەن جوبانىڭ كوركەمدىك جەتەكشىسى ءارى ديريجەرى سەرىك داۋلەتوۆ شاقىرىلعان. ءدال وسى جىلدىڭ ماۋسىم جانە شىلدە ايلارىندا ءانسامبلدىڭ قۇرامىنا ونەرپازداردى قابىلداۋ ءۇشىن تالىمگەرلەر قازاقستاننىڭ بىرقاتار قالاسىندا كاستينگ جۇرگىزدى. كەيىن ۇجىمنىڭ جاڭاشا باعىتتاعى قىزۋ دايىندىق جۇمىستارى باستالىپ كەتتى. ءانسامبلدىڭ بۇرىنعى قۇرامىندا ونەر كورسەتكەن تالانتتى انشىلەر مەن كاسىبي بيشىلەر ارنايى شاقىرىلىپ, رەپەرتۋارى جاڭا مۋزىكالىق شىعارمالارمەن جاڭارتىلعان. ماسەلەن, ونەر ۇجىمىنىڭ برەندىنە اينالعان «بيپىل» (حورەوگرافياسى د.قياقوۆانىڭ), «اساتاياق» (حورەوگرافياسى ز.رايباەۆتىڭ), «مالايزيا ءبيى» (حورەوگرافياسى گ.يزمايلوۆانىڭ) جانە باسقا دا بيلەر حورەوگراف تاتيانا اۋتاليپوۆانىڭ قاتىسۋىمەن جۇرگىزىلسە, جاڭا حورەوگرافيالىق كومپوزيتسيالاردى گۇلنار سايتوۆا, كارينا حايتماتوۆا, گۇلدەن فاتكۋللا, ەۆگەني مويسەەۆ, كارينا جيرەنباەۆا, ءمولدىر نىعىمەت سىندى حورەوگرافتار قويدى. قازىر قايتا جاساقتالعان ءانسامبلدىڭ قۇرامىندا 15 ءبيشى مەن 9 مۋزىكانت بار.
ايتا كەتەيىك, قازىر «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ باستى ماقساتتارىنىڭ ءبىرى – وسى ءانسامبلدى جاڭا قۇراممەن كورەرمەنگە تانىستىرۋ بولىپ وتىر. سوندىقتان بيىل جالپى اتالعان ۇيىمعا قاراستى شىعارماشىلىق ۇجىمدارعا 5 حالىقارالىق جانە 3 رەسپۋبليكالىق, 8 باعىتتاعى شەت مەملەكەتكە جانە 5 باعىت بويىنشا رەسپۋبليكالىق گاسترولدىك ساپار جوسپارلانىپ وتىر. سوعان ساي «گۇلدەر» دە وڭتۇستىك كورەيا, فرانتسيا, بەلگيا, ۆەنگريا, قىرعىزستان, وزبەكستان جانە باسقا دا ەلدەردە ونەر كورسەتەدى. ال ەندىگى كونتسەرت الماتى قالاسىندا وتپەك.
اڭىز-ءانسامبلدىڭ جاڭا تولقىنىن دايىنداۋ جۇمىستارى دا وڭاي بولعان جوق. «گۇلدەردىڭ» بۇرىنعى ۆيدەوقۇجاتتارى ساقتالعانىمەن, ارحيۆتىك قۇجاتتاردى اقتارىپ وتىرىپ, سول كەزدەردەگى قازاق بي ونەرىندە قولدانىلعان قيمىل-قوزعالىستارى مەن بي تۇرلەرىنە قاتىستى قۇندى مالىمەتتەر تابىلماعان. سول سەبەپتەن ءانسامبلدىڭ باسى-قاسىندا جۇرگەن شىعارماشىلىق توپقا وسى باعىتتا دا كوپ ەڭبەك ەتۋگە تۋرا كەلدى.
جاڭا جوباعا دايىندىق كەزىندە ءانسامبلدىڭ مۇراعاتتىق ماتەريالدارى مۇقيات زەردەلەنىپ, توپتىڭ «التىن قورىنان» ەڭ ۇزدىك نومىرلەر ىرىكتەلىپ الىندى. ايتۋلى كەشكە ءانسامبلدىڭ العاشقى سوليستەرىنىڭ ءبىرى, قازاقستاننىڭ حالىق ءارتىسى روزا رىمباەۆا, كلارا تولەنباەۆا, جاس انشىلەر ءمادي سىزدىقوۆ, زارينا بوجاكوۆا, ديدار ابدىحالىق, سالتانات مەڭدىعاليەۆا, «Turan» فولكلورلى-ەتنوگرافيالىق ءانسامبلى مەن «Steppe Sons» التەرناتيۆ-فولك توبى قاتىستى.
«گۇلدەردىڭ» ورىنداۋىندا «بيپىل», «اساتاياق», «مالايزيا», «حورەزم», سونداي-اق مۋزىكالىق كومپوزيتسيالارعا ارنالعان ءتۇرلى باعىتتاعى بيلەرى ۇسىنىلدى. ءان مەن بي كەزەك ورىلگەن كەش بارىسىندا ايگىلى ۇجىمنىڭ تاريحىنان سىر شەرتەتىن ۆيدەوفيلمدەر كورسەتىلدى. وعان قوسا ءانسامبلدىڭ بۇرىنعى ونەرپازدارى ەكران ارقىلى ىستىق ەستەلىكتەرىمەن ءبولىسىپ, جاڭا قۇرامعا – جاس تالانتتارعا ساتتىلىك تىلەدى.