قر يندۋستريا جانە ينفراقۇرىلىمدىق دامۋ ءمينيسترى مارات قاراباەۆ ەلىمىزدەگى شەت مەملەكەتتەردىڭ ەلشىلەرىمەن كەزدەسىپ, ۆەدومستۆو قۇزىرىنداعى سالالار بويىنشا ءوزارا ىنتىماقتاستىقتى دامىتۋدىڭ جولدارىن تالقىلادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
تاراپتار ونەركاسىپ جانە جەر قويناۋىن پايدالانۋ سالاسىنداعى ارىپتەستىكتى نىعايتۋ ماسەلەلەرىن قاراستىردى. سونداي-اق اتالعان باعىتتارعا سايكەس قازاقستانعا ينۆەستيتسيا تارتۋدىڭ مۇمكىندىكتەرى پىسىقتالدى. اسىرەسە ۆەدومستۆو باسشىسى بيىل مينيسترلىك قاتتى پايدالى قازبالاردىڭ 25 كەن ورنى بويىنشا جەر قويناۋىن پايدالانۋعا قۇقىق بەرەتىن اۋكتسيون وتكىزەتىنىن جەتكىزىپ, ونىڭ ونلاين فورماتتا ۇيىمداستىرىلاتىنىنا باسا نازار اۋداردى.
«اتالعان اۋكتسيون ونلاين رەجىمدە, ياعني اشىق تۇردە وتكىزىلەدى. وعان ەلىمىز بەن شەتەلدىك ينۆەستورلار قاتىسا الادى. جەر قويناۋىن يگەرەتىن ينۆەستورلارعا قويىلاتىن باستى تالاپتاردىڭ ءبىرى – وندىرىلەتىن مينەرالدى رەسۋرستار حالىقتىڭ ءال-اۋقاتىن ارتتىرۋعا سەپتىگىن تيگىزۋى ءتيىس. دەمەك, ءبىرىنشى كەزەكتە جاڭادان اشىلاتىن ءوندىرىس ورىندارىندا جەرگىلىكتى تۇرعىندار جۇمىسپەن قامتىلۋى قاجەت. ەكىنشىدەن, سول حالىقتىڭ پىكىرىن ەسكەرىپ, جەرگىلىكتى الەۋمەتتىك ماسەلەلەردىڭ شەشىلۋىنە اتسالىسۋى كەرەك», دەدى مينيستر.
سونداي-اق ۆەدومستۆو باسشىسى اۋكتسيونعا قويىلاتىن پايدالى قازبالارعا بايلانىستى شاعىن اقپاراتتىق ماتەريالدار دايىندالعانىن قوسا ايتتى. بۇل ارقىلى الەۋەتتى جەر قويناۋىن پايدالانۋشى كەز كەلگەن كەن ورنىنا قاتىستى مالىمەتپەن تانىسىپ, سوعان سايكەس وزىنە قاجەتتى لوتقا قاتىسا الادى. اتالعان اشىق ساۋدانىڭ ارتىقشىلىعى – ادامي فاكتوردىڭ ورىن الۋىنا جول بەرمەيدى.
كەزدەسۋدىڭ سوڭىندا تاراپتار ىسكەرلىك اڭگىمەگە ريزاشىلىقتارىن جەتكىزىپ, ەكونوميكالىق قارىم-قاتىناستى ودان ءارى دامىتۋدىڭ ماڭىزدىلىعىن اتاپ ءوتتى.