پرەزيدەنت قاسىم-جومارت توقاەۆ 2025 جىلعا دەيىن رەسپۋبليكالىق مادەنيەت جانە ارحيۆ ءىسى ۇيىمدارى قىزمەتكەرلەرىنىڭ ەڭبەكاقىسىن 100%-عا كوتەرۋ تۋرالى تاپسىرماسى اياسىندا بيىل 1 قاڭتاردان سالا ماماندارىنىڭ ايلىعى ورتا ەسەپپەن تاعى 22%-عا ارتتى, دەپ حابارلايدى Egemen.kz مادەنيەت جانە سپورت مينيسترلىگى ءباسپاسوز قىزمەتىنە سىلتەمە جاساپ.
سوڭعى ەكى جىلدا 64 مىڭعا جۋىق مادەنيەت جانە ارحيۆ ءىسى قىزمەتكەرلەرىنىڭ ەڭبەكاقىسى ورتا ەسەپپەن 45%-عا كوتەرىلدى.
«2023 جىلدىڭ قاڭتارىنان بارلىق ساناتتاعى قىزمەتكەرلەردىڭ ايلىعى وسكەنىن اتاپ ءوتۋ كەرەك. بۇل باسشىلار مەن جەتەكشىلەر, نەگىزگى پەرسونالمەن قاتار, ەدەن جۋشى, كۇزەتشى, ۆاحتەر سەكىلدى جۇمىسكەرلەردىڭ دە ەڭبەكاقىسى كوتەرىلدى», دەدى مادەنيەت جانە سپورت ۆيتسە-ءمينيسترى ن. داۋەشوۆ.
مادەنيەت جانە سپورت مينيسترلىگى سالا ماماندارىنىڭ ايلىعىن ودان ءارى ۇلعايتۋعا باستاماشى بولادى. ماسەلەن, شىعارماشىلىق جوعارى وقۋ ورىندارىنداعى كونتسەرتمەيستەرلەردىڭ ەڭبەكاقىسىن كوتەرۋ جوسپاردا بار. ول ءۇشىن زاڭنامالىق اكتىلەرگە ءتيىستى وزگەرىستەر ەنگىزۋ بويىنشا بەلسەندى جۇمىس ءجۇرىپ جاتىر. سونداي-اق «ۇلتتىق» مارتەبەسى بار مادەنيەت ۇيىمدارى قىزمەتكەرلەرىنىڭ ەڭبەكاقىسى ەكى ەسەگە جۋىق ءوستى. بۇگىندە ەلىمىزدە وسى ساناتقا جاتاتىن 5 ۇيىم بار. مينيسترلىك الداعى ۋاقىتتا اتالعان نىسانداردىڭ ءتىزىمىن كەڭەيتۋدى جوسپارلاپ وتىر.