مۇنايلى ءوڭىردىڭ ورتالىعى – اتىراۋ قالاسىنان الىستاعى جانباي اۋىلىندا تۇراتىن اينۇر سيسەكەنوۆا جاڭا ءونىم شىعارۋدى قولعا الدى. جاڭا ءونىم دەگەندە, قالبىرعا سالىنعان تۇيە ەتى تۋرالى ايتىپ وتىرمىز.
باسقا ءوڭىردى قايدام, اتىراۋ وبلىسىندا بۇرىن-سوڭدى ءدال مۇنداي ءونىم شىعارىلعان جوق. ارينە, كەز كەلگەن دۇكەننىڭ سورەسىندە سيىر, جىلقى, قوي ەتى سالىنعان قالبىردىڭ ءتۇر-ءتۇرى سامساپ تۇر. بىراق قالبىرداعى تۇيە ەتى تۋرالى ەستىگەنىڭىز بار ما ەدى؟
«سۇرانىسقا يە وتاندىق ءونىم شىعارۋ ءۇشىن ۇلكەن شاھاردا تۇرۋ شارت ەمەس. حالىق تۇتىناتىن ساپالى ءونىمدى الىستاعى اۋىلدا دا جاساۋعا بولادى. مۇنداي ءىستى قولعا الۋ ءۇشىن الدىمەن ىنتا قاجەت. ىزدەنگەن ادامنىڭ ءىسى وڭعا باسادى», دەيدى جانباي اۋىلىندا تۇراتىن كاسىپكەر اينۇر سيسەكەنوۆا.
اۋىل كاسىپكەرىنىڭ ايتۋىنشا, بىرنەشە جىلدان بەرى جانباي اۋىلىنداعى «رىسپاي قۇراسوۆ» شارۋا قوجالىعىنىڭ قۇرامىنداعى «تەمىرلان» جەكە كاسىپكەرلىگى ەت جانە شۇجىق ونىمدەرىنىڭ وننان استام ءتۇرىن دايىندايدى. ەندى جاقىندا «نارىن» اتاۋىمەن تۇيە ەتىنەن جاسالعان ءونىمدى نارىققا شىعارا باستادى.
«العاش كاسىبىمدى «باستاۋ بيزنەس» جوباسىمەن شاعىن دۇكەن اشۋدان باستاعان ەدىم. كەيىن زاماناۋي تەحنولوگيا ورناتىلعان شاعىن تسەح اشىپ, 10-عا جۋىق اۋىلداسىمدى جۇمىسقا تارتتىم. قازىر شاعىن تسەحىمىزدا ەت جانە شۇجىق ونىمدەرىن دايىندايمىز. ءبارى – وتاندىق ءونىم. سول سەبەپتەن شىعار, تۇتىنۋشىنىڭ سۇرانىسى ارتىپ تۇر. مۇندا جارتىلاي فابريكات ونىمدەرى دە بار. الدىمەن تۇتىنۋشى تالابىنا ەرەكشە ءمان بەرىپ, ءونىم ساپاسىن ارتتىرۋدى كوزدەيمىز. جاقىندا تۇيە ەتىن كونسەرۆىگە سالىپ شىعارا باستادىق. قالبىردى الماتى قالاسىنان الدىرامىن. ءونىم ساپالى بولۋى ءۇشىن قالبىرلار مىندەتتى تۇردە زالالسىزداندىرىلادى. ارنايى قۇرىلعىمەن تۋرالعان تۇيە ەتىن تۇزداپ قويامىز. سودان كەيىن عانا قالبىرعا سالىنادى», دەيدى اۋىل كاسىپكەرى.
باعاسى 1000 تەڭگە تۇراتىن تۇيە ەتى سالىنعان كونسەرۆى ازىرگە يساتاي اۋدانىنىڭ تۇتىنۋشىلارىنا عانا ساتىلىپ جاتىر.
اتىراۋ وبلىسى