ماڭعىستاۋدا بيىلعى 1 ناۋرىز شىنىمەن-اق جۇرتتىڭ جاپپاي ءبىر-بىرىنە العىس ايتاتىن كۇن رەتىندە اتاپ وتىلمەك. ماڭعىستاۋ وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى گۇلنار بازاراليەۆانىڭ ايتۋىنشا, «العىس ايتۋ» كۇنىنە وراي وڭىردە 100-دەن استام مادەني ءىس-شارا ۇيىمداستىرىلادى.
اقتاۋ قالاسىنداعى قارتتار ۇيىندە وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعىنىڭ كونتسەرتىمەن باستالاتىن مەرەكە اباي اتىنداعى مادەني-دەمالىس كەشەنىندە «العىس ايتۋ – پارىزىم» مەرەكەلىك كونتسەرتى مەن م.وسكىنباەۆ اتىنداعى وبلىستىق فيلارمونيادا «اقشاعىل» ەتنو-فولكلورلىق ءانسامبلى مەن «جورعا» بي توبىنىڭ كونتسەرتىنە جالعاسادى.
– نۇرمۇحان ءجانتورين اتىنداعى ماڭعىستاۋ وبلىستىق مۋزىكالىق-دراما تەاترىندا «پەرزەنتحانا» قويىلىمى, 3 ناۋرىز كۇنى «وتپان» تاريحي-مادەني كەشەنىندە «اق جاۋلىقتى اجەلەر» اتتى كەزدەسۋ كەشى, وبلىستىق فيلارمونيادا كىشى سيمفونيالىق وركەستردىڭ كونتسەرتى ۇيىمداستىرىلادى, – دەدى گ.بازاراليەۆا.
سونداي-اق وبلىستىق مۋزەيلەر مەن كىتاپحانالاردا «بۇل الەمدى ادەمى ەتۋ ءۇشىن, جاقسى سوزدەر ايتىڭىز» تاقىرىبىندا العىس ايتۋ ساعاتتارى, «العىس ايتۋ – پارىزىم» كىتاپ كورمەسى مەن «مىڭ العىس» ەرتەڭگىلىگى, «جىلى لەبىز جان تەبىرەنتەر» كەزدەسۋ كەشتەرى وتكىزىلمەك. مۇنداي مادەني ءىس-شارالار جاڭاوزەن قالاسى مەن مۇنايلى, قاراقيا, تۇپقاراعان, بەينەۋ اۋدانىندا دا ۇيىمداستىرىلادى. جاڭاوزەن قالاسى بويىنشا «العىس ايتۋ – پارىزىم» اپتالىعى, «العىسىمىز شەكسىز» اتتى الەۋمەتتىك جەلىدە چەللەندج ەستافەتا, «العىس ايتام بارىڭە» اتتى مەرەكەلىك كونتسەرت, «شىن جۇرەكتەن العىس ايتامىن» تاقىرىبىندا مۇمكىندىگى شەكتەۋلى جاندارعا قايىرىمدىلىق ءىس-شاراسى وتەتىندىگىن ايتتى.
ال «قوعامدىق كەلىسىم» مەكەمەسىنىڭ جوسپارىندا دا ءبىراز ءىس-شارا قامتىلعان. «العىس ايتۋ – پارىزىم» اكتسياسى اياسىندا ءارتۇرلى سالالاردا جانە كاسىپتەردە ادال قىزمەت ەتىپ, ازاماتتىق جانە ەڭبەكتىك ەرلىك جاساپ, ەلدىڭ دامۋىنا ۇلەسىن قوسىپ جۇرگەن, سونداي-اق ءتۇرلى وقيعالار مەن جاعداياتتار كەزىندە بەلسەندىلىك پەن ازاماتتىق ۇستانىمىن تانىتقان جاندارعا العىس ايتىلسا, ءتۇرلى سپورتتىق سايىستار دا نازاردان تىس قالمايدى.
العىس ەستيتىندەر قاتارىندا زەينەتكەرلىككە شىققان ۇستازدار, پوليتسەيلەر مەن ءار سالا ارداگەرلەرى, قارتتار, كوشە سىپىرۋشىلار سىندى ءتۇرلى ساناتتاعى حالىق وكىلدەرى بار. كوكتەمنىڭ العاشقى كۇنىندە تۇرعىندار كوتەرىڭكى كوڭىل كۇيمەن ءبىر-بىرىنە العىس ايتىپ اقتارىلماق.
ماڭعىستاۋ وبلىسى