ەلىمىزدەگى رەسپۋبليكالىق ماڭىزداعى جولداردى تەكسەرۋدىڭ ناتيجەسىندە 396 قاۋىپتى ۋچاسكە, 68 كوپىر جانە 768 سۋ وتكىزۋ قۇبىرى انىقتالىپ, 700-دەن استام ارنايى تەحنيكا بەكىتىلدى, دەپ حابارلايدى Egemen.kz يدم باسپاسوزىنە سىلتەمە جاساپ.
بۇل تۋرالى پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قاراباەۆ ايتىپ بەردى. ۆەدومستۆو باسشىسى سۋ تاسقىنىنا قارسى ءىس-شارالاردى ۋاقتىلى قامتاماسىز ەتۋ ءۇشىن بارلىق قاۋىپتى ۋچاسكەدە تاۋلىكتىك كەزەكشىلىك پەن كۇندەلىكتى باقىلاۋ جۇرگىزىلىپ كەلە جاتقانىن جەتكىزدى. قاجەتتى جۇمىستاردى جەدەل ۇيىمداستىرىپ, تاسقىن قاۋپىن الدىن الۋ ماقساتىندا قاجەتتى ينەرتتى جانە باسقا دا ماتەريال تولىق كولەمدە دايىندالعان. اتاپ ايتقاندا, 20 مىڭ تەكشە مەتر قۇم, 6 مىڭ تەكشە مەتر شويتاس, 8 مىڭ تەكشە مەتر قيىرشىق تاس, سونداي-اق 18 مىڭ تەكشە مەتر قۇم-قيىرشىق تاس قوسپاسى ازىرلەنگەن.
«قازىر ەلىمىزدىڭ وڭتۇستىك وڭىرلەرىندەگى بارلىق سۋ وتكىزۋ قۇبىرى تاسقىن مەن ەرىگەن سۋدىڭ قالىپتى ءوتۋىن قامتاماسىز ەتىپ كەلەدى. سولتۇستىك وڭىرلەردە اۋا رايى جاعدايىنا بايلانىستى سۋ وتكىزۋ قۇبىرلارىنىڭ ساڭىلاۋلارىن اشىپ, قاردان تازارتۋ جۇمىستارى جۇزەگە اسىرىلىپ جاتىر», دەدى م.قاراباەۆ.
سونداي-اق اۆتوجولداردىڭ كۇتىمىن ساقتاپ, كولىك قوزعالىسىنىڭ قاۋىپسىزدىگىن قامتاماسىز ەتۋ ءۇشىن جول ينفراقۇرىلىمى ارقىلى تاسقىن جانە ەرىگەن سۋلاردىڭ كەدەرگىسىز وتۋىنە بايلانىستى جەدەل شارالار قابىلدانادى. وسى ورايدا سۋ تاسقىنىنا قارسى باعىتتالعان جۇمىستاردى قارجىلاندىرۋ جولداردى كۇتىپ ۇستاۋعا بولىنگەن قاراجاتتىڭ ەسەبىنەن جۇزەگە اسىرۋ كوزدەلگەنىن اتاپ وتكەن ءجون.
ايتا كەتەيىك, سۋ تاسقىنى كەزەڭى باستالعالى بەرى رەسپۋبليكالىق جەلى بويىنشا جولدىڭ شايىلىپ كەتۋىنە بايلانىستى جاعداي جامبىل وبلىسىندا بايقالعان. ناقتىراق ايتساق, ەرىگەن سۋدىڭ شامادان تىس جينالۋىنىڭ سالدارىنان 22-ءشى اقپاندا بۋرىلبايتال جانە اقسۇيەك ەلدى مەكەندەرىنىڭ اراسىنداعى ۋچاسكەنىڭ 3 جەرىندە اينالما جول شايىلىپ كەتىپ, كولىك قاتىناسى الماتى – قاينار – شۋ – بۋرىلبايتال باعىتى ارقىلى ىسكە اسىرىلدى. مەردىگەر ۇيىم قالپىنا كەلتىرۋ جۇمىستارىن جەدەل جۇرگىزدى.
تەمىرجول كولىگىنىڭ قوزعالىسىنا كەلسەك, «قازاقستان تەمىر جولى» ۇلتتىق كومپانياسى سۋ تاسقىنى كەزەڭىندە شويىن جول مەن جاساندى قۇرىلىستاردى ساقتاپ, سونىمەن قاتار پويىزداردىڭ ۇزدىكسىز قاتىناۋىن قامتاماسىز ەتۋگە ارنالعان تەحنيكالىق-ۇيىمداستىرۋ ءىس-شارالارىن بەكىتتى.
مارات كارىمجان ۇلىنىڭ ايتۋىنشا, الدىڭعى جىلداردىڭ تاجىريبەسىنە تالداۋ جاسالىپ, بارلىق وڭىردە تاسقىن سۋدى وتكىزۋ بويىنشا قاۋىپتى ورىنداردىڭ تىزبەسى انىقتالىپ وتىر.
«كوكتەمگى سۋ تاسقىنى كەزەڭىندە تاۋلىكتىك كەزەكشىلىك پەن قاۋىپتى ورىندارعا باقىلاۋ جۇرگىزىلەدى. تۇتاستاي العاندا, 3 578 كوپىردى, 6 مىڭنان اسا سۋ وتكىزۋ قۇبىرىن, تاۋلى ارىقتاردى جانە جول جىرالارىن قار مەن مۇزدان تازارتۋ جۇمىستارى باستالدى. ەلىمىز بويىنشا شويتاس پەن رەلستى پاكەتتەر جانە كونديتسياسىز تەمىربەتوندى شپالدارمەن جاراقتالعان تاسقىنعا قارسى 45 پويىز جاساقتالىپ جاتىر», دەدى يدم باسشىسى.