الماتى قالاسىندا «بايتاق» پارتياسىنىڭ وكىلدەرى, ءماجىلىس پەن قالالىق ءماسليحات دەپۋتاتتىعىنا ۇمىتكەرلەر ستۋدەنتتەرمەن بىرلەسىپ, ەكولوگيالىق تاربيەنىڭ ماڭىزى جايىندا دوڭگەلەك ۇستەل وتكىزدى.
پارتيا وكىلدەرى ازاماتتار اراسىندا وتكىزىلگەن ساۋالناما ناتيجەسىندە حالىقتىڭ تەك 47 پايىزى قورشاعان ورتانىڭ ماسەلەلەرىن ءتۇسىنىپ, ەكولوگيالىق ءومىر ءسۇرۋ سالتىنا كوشۋ ارقىلى عانا شەشۋگە بولاتىنىن تۇسىنەتىنىن انىقتاعان.
«بايتاق» پارتياسىنىڭ قولداۋىمەن ۇيىمداستىرىلعان اۋقىمدى ءىس-شاراعا الماتى جاستارىنىڭ جۇزگە جۋىق وكىلى قاتىستى. دوڭگەلەك ۇستەلدە پارلامەنت ءماجىلىسىنىڭ دەپۋتاتتىعىنا كانديداتتار ارمان قاشقىنبەكوۆ پەن اينۇر ءسابيتوۆا ءسوز سويلەدى. سونىمەن قاتار كەزدەسۋدە ەلوردالىق ءماسليحاتتىڭ دەپۋتاتتىعىنا كانديداتتار مەن الماتى قالاسى شتابىنىڭ مۇشەلەرى, ستۋدەنتتەر, قوعامدىق ۇيىمداردىڭ كوشباسشىلارى ورامدى ويلارىن ورتاعا سالدى.
كەزدەسۋ بارىسىندا حالىققا ەكولوگيالىق ءبىلىم بەرۋ جايىندا ۇسىنىستار ازىرلەنىپ, بايتاقتىقتار الداعى ۋاقىتتا وسى تاقىرىپتا جاڭا جوبا ۇسىنباق.
«بايتاق» پارتياسىنىڭ توراعاسى ازاماتحان امىرتاەۆ ەلوردالىق سپورتشىلارمەن, جاتتىقتىرۋشىلارمەن كەزدەستى. كەزدەسۋدە جاستاردى پاتريوتتىق جانە دەنە تاربيەسىنىڭ مىندەتتەرىمەن قاتار, ولاردىڭ ەكولوگيالىق ساۋاتىن دامىتۋ, قورشاعان ورتاعا جانە تابيعاتقا ۇقىپتى قاراۋ تۋرالى ءسوز بولدى. پارتيا مۇشەلەرى سايلاۋالدى تۇعىرناماسى تۋرالى, پارتيانىڭ بولاشاقتاعى ماقساتتارى مەن مىندەتتەرى تۋرالى حاباردار ەتتى.
سونداي-اق پارتيا باسشىلىعى استانادا وتكەن كەكۋشين بۋدوكاي كاراتەدەن جىل سايىنعى ءداستۇرلى ءتۋرنيردىڭ اشىلۋ سالتاناتىنا ارنايى كەلدى. ءتۋرنيردىڭ اشىلۋىنا «Kazakhstan Fullkontakt Karate Organization» رەسپۋبليكالىق قوعامدىق بىرلەستىگىنىڭ پرەزيدەنتى ەكرينبەك احماداليەۆ, ۇيىمنىڭ ۆيتسە-پرەزيدەنتتەرى كونستانتين ياكوۆەنكو مەن سايات ءابىلدين, استانا قالاسى بويىنشا كەكۋشين بۋدوكاي كاراتە فەدەراتسياسىنىڭ باسشىسى نۇرسۇلتان الياقباروۆ, الداعى سايلاۋعا العاش رەت قاتىساتىن شىعىس جەكپە-جەگىنىڭ جاس شەبەرلەرى قاتىستى.