اتىراۋ وبلىسى جاڭاتالاپ اۋىلىندا وتكەن قۇسبەگىلىكتەن ەرەسەكتەر اراسىندا XVI قازاقستان رەسپۋبليكاسىنىڭ چەمپيوناتى ءوز مارەسىنە جەتتى, دەپ حابارلايدى Egemen.kz.
ەڭ ۇزدىك كورسەتكىشتەرگە يە بولعان جەڭىمپازدار ارنايى جۇلدەلەرمەن ماراپاتتالدى. چەمپيونات مادەنيەت جانە سپورت مينيسترلىگى, ۇلتتىق سپورت قاۋىمداستىعى, رەسپۋبليكالىق «قۇسبەگىلىك» فەدەراتسياسى مەن اتىراۋ وبلىستىق اكىمدىگىنىڭ ۇيىمداستىرۋىمەن وتكەن.
ەرەسەكتەر اراسىندا «قۇسبەگىلىك» ۇلتتىق سپورت تۇرىنەن قازاقستان رەسپۋبليكاسىنىڭ XVI چەمپيوناتىندا بۇركىتشىلەر سايىسى بويىنشا «قاراشولاق» قۇسىن باپتاعان كۇنتۋعان ارمانبەك جەڭىمپاز اتاندى. ەكىنشى ورىندا اباي وبلىسىنان كەلگەن بايقاداموۆ ەرزات, ال ءۇشىنشى ورىندا كۇنتۋعان سەرىكبەك (استانا قالاسى) پەن قوشقاروۆ ارمان (اتىراۋ وبلىسى) تۇراقتادى.
قارشىعانى قولعا شاقىرۋدان تۇركىستان وبلىسىنىڭ وكىلى ارشاباي داۋرەن باس جۇلدەنى يەلەندى. جۇلدەلى ەكىنشى ورىنعا كەۋەنوۆ باعدات يە بولسا, ءۇشىنشى ورىندى ەلوردالىق كۇنتۋعان سەرىكبەك پەن راۋيل ۇلى قۇدايبەرگەن ءوزارا ءبولىستى.
ال يتەلگى سالۋدان اقمولا وبلىسىنان كەلگەن كەنجەتاەۆ ەرلانعا تەڭ كەلەر قۇسبەگى بولعان جوق. جۇلدەلى ەكىنشى ورىندا جامبىل وبلىسىنىڭ نامىسىن قورعاعان باباجان باقداۋلەت, ال ءۇشىنشى ورىندا تۇركىستان وبلىسىن باستاعان بازارباەۆ يبراگيم مەن كەۋەنوۆ باعدات تۇراقتادى.
وسىلايشا, كوماندالىق ەسەپتە تۇركىستان وبلىسىنىڭ قۇسبەگىلەرى 1 التىن, 1 كۇمىس, 2 قولا جۇلدە قانجىعىلاپ, كوش باستادى. استانا قالاسى جانە اقمولا وبلىسىنىڭ وكىلدەرى ەكىنشى جانە ءۇشىنشى ورىندارعا جايعاستى.
چەمپيوناتتىڭ العاشقى كۇنى «قولعا قوندىرۋ» سايىسىنىڭ قورىتىندىسى بويىنشا 18 بۇركىت كەلەسى اينالىمعا وتكەن بولاتىن. قاتىسۋشىلاردىڭ ايتۋىنشا, قۇستاردىڭ كورسەتكەن ناتيجەلەرىنە وڭىردە ورىن العان اۋا رايى دا ءوز اسەرىن تيگىزگەن. ايتا كەتسەك, چەمپيوناتتىڭ ەرەجەسىنە سايكەس تىكەلەي يەسىنىڭ قولىنا قونعان بۇركىت قانا ماكسيمالدى 10 ۇپايدى ەنشىلەيدى. وسى رەتتە اۋا رايىنىڭ قولايسىزدىعىن ەسكەرە وتىرىپ, قازىلار القاسىنىڭ شەشىمى بويىنشا 9 ۇپايدى ەنشىلەگەن قاتىسۋشىلار دا كەلەسى اينالىمعا ءوتتى. ال «شىرعاعا سالۋ» سايىسىندا 18 بۇركىت ەكىنشى كەزەڭگە ءوتتى. اتاپ ايتقاندا, اقمولا, الماتى, جامبىل, اباي, قاراعاندى, اتىراۋ وبلىستارى مەن استانا قالاسىنىڭ سپورتشىلارى جارتىلاي فينالعا جولداما الدى. جارىستىڭ ەكىنشى كۇنى قۇستار «قويانعا سالۋ» سايىسىندا باسەكەگە ءتۇستى.
ەسكە سالساق, جارىسقا ەلىمىزدىڭ 14 وبلىسىنان 50-گە جۋىق سپورتشى قاتىسىپ, چەمپيوناتتىڭ رەگلامەنتى بويىنشا 31 بۇركىت, 11 قارشىعا, 10 يتەلگى باسەكەگە ءتۇستى. چەمپيوناتقا قاتىسۋعا الماتى, اقمولا, قاراعاندى, جامبىل, شىعىس قازاقستان, تۇركىستان, ماڭعىستاۋ, پاۆلودار, اتىراۋ, اباي, جەتىسۋ, ۇلىتاۋ وبلىستارىنىڭ, سونداي-اق استانا قالاسىنىڭ سپورتشىلارى نيەت بىلدىرگەن.