كوتەرمە كومەك اۋىلعا بارعان جاس ماماندارعا بەرىلەدى

بۇل تۋرالى وبلىس ورتالىعىندا وتكەن بريفينگتە ماڭعىستاۋ وبلىستىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى لاۋرا مۇحامبەتوۆا مالىمدەدى. ونىڭ ايتۋىنشا, بيىل اۋىلدىق ەلدى مەكەندەرگە جۇمىس ىستەۋگە كەلگەن ماماندار 100 اەك, ياعني 345 مىڭ تەڭگە مولشەرىندە كوتەرمە جاردەماقى جانە ءۇي ساتىپ الۋ ءۇشىن 1500 اەك, ياعني 5 175 500 تەڭگەدەن اسپايتىن سومادا بيۋدجەتتىك كرەديت تۇرىندەگى الەۋمەتتىك قولداۋعا يە بولا الادى.

– «ديپلوممەن – اۋىلعا!» باعدار­لاماسىنا ءبىلىم بەرۋ, دەنساۋلىق ساقتاۋ, الەۋمەتتىك قامسىزداندىرۋ, مادەنيەت, سپورت جانە ۆەتەريناريا ماماندىعى, اۋىل, كەنت, اۋىلدىق وكرۋگتەر اكىمدەرى اپپاراتىنىڭ باس جانە جەتەكشى ماماندارى ۇمىتكەر بولا الادى. سونىمەن قاتار كوتەرمە جاردەماقى جانە تۇرعىن ءۇي ساتىپ الۋعا نەمەسە سالۋعا بيۋدجەتتىك كرەديت بەرۋ ءتيىستى قارجى جىلىنا قارجىلاندىرۋ جوسپارىنا سايكەس بولىنگەن سوما شەگىندە جۇزەگە اسىرىلادى, – دەدى لاۋرا مۇحامبەتوۆا.

بىلتىر وبلىس بويىنشا 2022 جىلى 423 مامانعا بارلىعى 131 ملن تەڭگە جاردەماقى بەرىلگەن. ال 208 مامان 15 جىلعا دەيىنگى مەر­زىمگە 0,01% مولشەرىندەگى سىياقى مولشەرلەمەسىمەن بيۋدجەتتىك نەسيە العان. سونىڭ ءبىرى – 2020 جىلى الماتى قالاسىندا وقۋىن ءبىتىرىپ كەلگەن جاس مامان گاۋحار تۇگەل. بۇگىندە جاس مامان مۇنايلى اۋدانىنىڭ داۋلەت ەلدى مەكەنىندەگى №4 جالپى ءبىلىم بەرەتىن مەكتەپتە پەداگوگ-لوگوپەد مامانى رەتىندە قىزمەت ەتەدى.

– «ديپلوممەن – اۋىلعا!» باعدار­لاماسىن ۇزاق ۋاقىت زەرتتەدىم. ونىڭ ارتىقشىلىقتارىن ىزدەپ, جاس ماماندار ءۇشىن تيىمدىلىكتەرىن قاراستىردىم. بۇل جوبا تەك جاس ماماندار ءۇشىن ەمەس, بىرنەشە جىل تاجىريبەسى بار قىزمەتكەرلەرگە دە كومەگى كوپ ەكە­نىن بىلگەننەن كەيىن باعدارلاما ار­قى­لى جۇمىسقا ورنالاسۋعا شەشىم قا­بىل­دادىم. سونىڭ ارقاسىندا, 2022 جىلداعى سوماعا سايكەس 306 300 تەڭگە قايتارىمسىز جاردەماقى جانە باسپانا الۋعا 4 ملن 594 مىڭ تەڭ­گە بيۋدجەتتىك كرەديت تۇرىندەگى الەۋ­مەتتىك قولداۋعا يە بولدىم, – دەيدى گاۋحار تۇگەل.