ازات پەرۋاشەۆ باستاعان «اق جول» پارتياسىنىڭ رەسپۋبليكالىق شتاب مۇشەلەرى الماتى وبلىسىنا باردى. ۇگىت-ناسيحات توبى «Rollton» جانە «Bigbon» برەندتەرىمەن ءونىم شىعاراتىن قوناەۆ قالاسىنداعى «مارەۆەن فۋد» كومپانياسىنىڭ ەڭبەك ۇجىمىمەن كەزدەستى.
مۇندا جىلىنا 40 مىڭ توننادان اساتىن 65 ءتۇرلى ءونىم شىعارىلادى. كاسىپورىندا 850 قىزمەتكەر جۇمىس ىستەيدى, وندىرگەن ونىمدەرى وننان استام الىس جانە جاقىن شەتەلگە ەكسپورتتالىپ وتىر.
– «اق جول» پارتياسى – كاسىپكەرلەر مەن وتاندىق تاۋار وندىرۋشىلەردىڭ وكىلى. ءبىز بيزنەستىڭ مۇددەلەرىن قورعاۋ جانە ىلگەرىلەتۋ ءۇشىن كوپ جۇمىس اتقارىپ كەلەمىز. بۇعان دەيىن سىزدەردىڭ كومپانيالارىڭىز «اق جول» پارتياسىنا كىرىستەر ورگاندارىنىڭ ەكسپورتتالاتىن ونىمگە قوسىمشا قۇن سالىعىن قايتارۋدان باس تارتۋ ماسەلەسىمەن جۇگىنگەن ەدى. ءبىز باس پروكۋرور مەن جوعارعى سوتقا دەيىن جەتتىك, كاسىپورىن تالابىنىڭ دۇرىستىعى دالەلدەندى. پارتيا الداعى ۋاقىتتا دا كومپانيانىڭ دامۋىن قاداعالاپ, قاجەت بولعان جاعدايدا مۇنداي ماڭىزدى ينۆەستيتسيالىق جوبانى جۇزەگە اسىرۋعا كومەكتەسەدى. ونىڭ ۇستىنە, ماسەلە ازىق-ت ۇلىك تاۋارلارى باعاسىنىڭ ينفلياتسياسى سوڭعى جىلدارى قاتتى بايقالعان تاماق ونەركاسىبى تۋرالى بولىپ وتىر, – دەدى ازات پەرۋاشەۆ.
كەزدەسۋ بارىسىندا «اق جول» ليدەرى پارتيانىڭ ساياسي باعدارلاماسىنىڭ باسىم باعىتتارىن اتاپ ءوتتى. ول ادال باسەكەلەستىك, الەۋمەتتىك ساياسات, سىبايلاس جەمقورلىقپەن كۇرەس, بىلتىرعى كونستيتۋتسيالىق رەفورما جانە شەتەلگە زاڭسىز شىعارىلعان قارجىنى ەلگە قايتارۋ ماسەلەلەرىنە جان-جاقتى توقتالدى. كەزدەسۋ ەمىن-ەركىن پىكىر الماسۋعا ۇلاسىپ, كومپانيا قىزمەتكەرلەرى نەسيەنىڭ قولجەتىمدىلىگى, تۇرعىن ءۇي باعاسى, بالالار جاردەماقىسى تۋرالى سۇراقتار قويدى. باعانى ۇستاپ تۇرۋ ماسەلەسىنە قاتىستى «اق جول» توراعاسى ۇلتتىق بانكتىڭ بازالىق مولشەرلەمەنى كوتەرىپ, نەسيەنى قىمباتتاتۋ ساياساتىن سىنعا الدى.
– بۇل جەردە ەكى ماڭىزدى جايت بار: ءبىرىنشىسى – نارىقتى وتاندىق تاۋارلارمەن تولتىرۋ. ەكىنشىسى – اقشانىڭ قۇنى. ويتكەنى نارىقتاعى جاعداي تاۋار مەن اقشا ماسساسىنىڭ اراقاتىناسىمەن انىقتالادى. اقشا كوپ, ال تاۋار از بولعان جاعدايدا, سايكەسىنشە تاۋار قىمباتتايدى. ال اقشا از, تاۋار كوپ بولعاندا, كەرىسىنشە, كەرى ۇدەرىس جۇرەدى. بىزدە مىناداي جاعداي: بۇگىندە ۇلتتىق بانك بازالىق مولشەرلەمەنى كوتەرۋ, ياعني اقشا ماسساسىن ازايتۋ ارقىلى باعانىڭ ءوسۋىن تەجەۋگە تىرىسىپ وتىر, – دەدى ا.پەرۋاشەۆ.