قازاقستاننىڭ اقش-تاعى ەلشىسى ەرجان اشىقباەۆتىڭ ايتۋىنشا, قازاقستان مەن اقش اراسىندا تىكەلەي اۋە قاتىناسى 2025 جىلدىڭ ەكىنشى جارتىسىندا اشىلۋى مۇمكىن, دەپ حابارلادى Egemen.kz.
تىكەلەي رەيستىڭ اشىلۋى ەكى ەل اراسىنداعى ساۋدا-ەكونوميكالىق بايلانىستاردىڭ كەڭەيۋىنە سەپتەسەدى.
«قازاقستاننىڭ اۋە اكىمشىلىگى, قازاقستاننىڭ ازاماتتىق اۆياتسيا كوميتەتىمەن بىرلەسىپ, امەريكانىڭ فەدەرالدىق اۋە اكىمشىلىگىنىڭ ستاندارتتارىنا سايكەس ءبىزدىڭ بۇكىل اۆياتسيالىق ونەركاسىپتىڭ, دەمەك اۋە كومپانيالاردىڭ, اۋەجايلاردىڭ امەريكا تاراپىنىڭ ستاندارتتارىنا سايكەس كەلەتىنىن دالەلدەيتىن تەكسەرىستەردەن ءوتۋىمىز كەرەك. بۇل جۇمىس قولعا الىندى», دەدى قازاقستاننىڭ اقش-تاعى توتەنشە جانە وكىلەتتى ەلشىسى ەرجان اشىقباەۆ.
ەلىمىزدەگى ەڭ ءىرى ۇلتتىق اۋە كومپانياسى اقش-تان ۇزاق قاشىقتىققا ۇشاتىن 3 Dreamliner ۇشاعىن ليزينگكە ساتىپ الۋ جونىندەگى كەلىسىمگە قول قويعان. قازىر فەدەرالدىق اۆياتسيا اكىمشىلىگىنىڭ سەرتيفيكاتتاۋ جۇمىستارى باستالدى.
وتكەن جىلى پرەزيدەنت قاسىم-جومارت توقاەۆ ۇكىمەتكە قازاقستان مەن اقش اراسىندا تەز ارادا اۋە قاتىناسىن اشۋ تۋرالى تاپسىرما بەرگەنىن اتاپ ءوتۋ كەرەك.