جامبىل وبلىسىن كوپشىلىك بۇرىننان دوتاتسيالىق ءوڭىر دەپ اتاپ ءجۇر. جەرگىلىكتى جۇرتشىلىقتىڭ تابىسى دا اۋىز تولتىرىپ ايتارلىقتاي دەڭگەيدە ەمەس دەگەندى ءجيى ەستيتىنبىز.
ايتكەنمەن, كەيىنگى جىلدارى وڭىردە اۋىل حالقىنىڭ الەۋەتىن ارتتىرۋعا باعىتتالعان قاناتقاقتى جوبا جەمىسىن بەرە باستادى. ال الەۋمەتتى جۇمىسپەن قامتۋ باعىتىندا قانداي جۇمىستار قولعا الىنىپ جاتىر؟
مەملەكەت باسشىسى قاسىم-جومارت توقاەۆ تۇرعىنداردى جۇمىسپەن قامتۋدىڭ ماڭىزدى ەكەنىن ۇدايى ايتىپ كەلەدى. بۇل رەتتە وبلىستىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەركىن كەلەسوۆ بىرقاتار دەرەكتى العا تارتتى. ونىڭ ايتۋىنشا, 2022 جىلى تۇرعىنداردى جۇمىسقا ورنالاستىرۋ جوسپارى 33 879 ادام بولسا, بۇل جوسپار 144,5 پايىزعا ورىندالىپ, جۇمىسپەن قامتىلعانداردىڭ سانى 48 944 ادامعا جەتكەن.
«پرەزيدەنت تاپسىرماسىنا سايكەس, 2022 جىلى 10 مىڭ تۇرعىنعا 100 جاڭا جۇمىس ورنىن قۇرۋدىڭ وبلىستىق جوسپارى 6,2 مىڭ جۇمىس ورنى بولىپ بەكىتىلسە, جىل قورىتىندىسىمەن وبلىستا 15,4 مىڭ جۇمىس ورنى قۇرىلىپ, جوسپار ارتىعىمەن ورىندالدى. نەگىزىنەن حالىقتى جۇمىسپەن قامتۋ ماسەلەلەرى 2022 جىلدان باستاپ كاسىپكەرلىكتى دامىتۋ جونىندەگى ۇلتتىق جوبا اياسىندا ىسكە اسىرىلىپ جاتىر. 2022 جىلى جۇمىسپەن قامتۋعا 49 500 ادامدى تارتۋ جوسپارلانعان, جوسپار 152,7 پايىزعا ورىندالىپ, 75 565 ادام جۇمىسپەن قامتۋدىڭ بەلسەندى شارالارىنا تارتىلدى», دەيدى باسقارما باسشىسى.
ونىڭ ايتۋىنشا, بۇعان قوسا, تۇراقتى جۇمىسقا 23 296 ادامدى ورنالاستىرۋ جوسپارلانىپ, بارلىعى 35 590 ادام تۇراقتى جۇمىسقا تۇرعان نەمەسە جوسپار 152,8 پايىزدى قۇراعان.
وڭىردە ۇلتتىق جوبا اياسىندا اتقارىلاتىن جۇمىستارعا ايرىقشا باسىمدىق بەرىلىپ وتىر. ايتالىق, جوبا شەڭبەرىندە ۇزىن-سانى الەۋمەتتىك جۇمىس ورىندارىنا 960 ادامعا 257,6 ملن تەڭگە قاراستىرىلىپ, 1 168 ادام جولدانعان. ونىڭ ىشىندە 1 100 ازامات تۇراقتى جۇمىسقا ورنالاسقان.
وبلىستا جاستار پراكتيكاسى ارقىلى تۇرعىنداردى جۇمىسپەن قامتۋ ماسەلەسى دە جولعا قويىلعان. باسقارما باسشىسىنىڭ سوزىنە سەنسەك, بۇگىندە 1 046 جاس تۇراقتى جۇمىسپەن قامتىلىپ وتىر. سونداي-اق اقىلى قوعامدىق جۇمىستارعا تارتۋ ماسەلەسى دە كۇن تارتىبىنەن تۇسكەن ەمەس. اتاپ ايتار بولساق, وڭىردە 7 266 ازاماتقا 4536,2 ملن تەڭگە قاراستىرىلىپ, قازىرگى تاڭدا 9 847 ازامات قوعامدىق جۇمىستارعا جولدانىپتى.
«جامبىل وبلىسىندا «باستاۋ-بيزنەس» جوباسى بويىنشا ونلاين وقىتۋ كۋرستارىنا 21 044 ازامات جولدانىپ, 16 180 ادام وقۋىن اياقتادى. سونىمەن قاتار ۇلتتىق جوبا اياسىندا كاسىپكەرلىكتى دامىتۋعا 2 634 ادامعا 400 اەك كولەمىندە 3 227,2 ملن تەڭگە مەملەكەتتىك قايتارىمسىز گرانت بەرىلدى. حالىقتى جۇمىسپەن قامتۋ باعىتىنداعى ماڭىزدى ءىس-شارالاردىڭ ءبىرى – جاستاردى جۇمىسپەن قامتۋ. پرەزيدەنت ءوز جولداۋىندا جاستارعا جان-جاقتى قولداۋ كورسەتۋ مەملەكەتىمىزدىڭ باستى مىندەتىنىڭ ءبىرى ەكەنىن ايتا وتىرىپ, ەڭبەكپەن قامتيتىن ءتۇرلى ءىس-شارالار ارقىلى كەلەسى جىلى 100 مىڭ جاسقا جۇمىس بەرىلەتىنىن جەتكىزدى. ناقتى قادامنىڭ العىشارتى رەتىندە جاستاردى جۇمىسپەن قامتۋ باعىتىندا ناقتى جوبالار جۇزەگە اسىپ جاتىر. كاسىپكەرلىكتى دامىتۋ جونىندەگى ۇلتتىق جوبا اياسىندا 2022 جىلى جۇمىسپەن قامتۋ ورگاندارىنىڭ ىقپالىمەن 29 جاسقا دەيىنگى جاستاردان 29 253 ادام جۇمىسپەن قامتۋدىڭ بەلسەندى ءىس-شارالارىنا تارتىلدى, 10 145 ادام بوس تۇرعان جۇمىس ورىندارىنا ورنالاسسا, 363 جاس قىسقا مەرزىمدى كاسىبي وقىتۋعا, 547 جاس ونلاين وقىتۋعا, 1 840 تۇلەك جاستار پراكتيكاسىنا, 193 جاس الەۋمەتتىك جۇمىس ورىندارىنا جولدانىپ, 2 025 جاس اقىلى قوعامدىق جۇمىستارعا تارتىلدى. سونداي-اق 32 جاس «ۇرپاقتار كەلىسىمشارتىنا», 185 جاس «العاشقى جۇمىس ورنى» جوباسىنا, 11 991 جاس «باستاۋ-بيزنەس» جوباسىمەن كاسىپكەرلىك نەگىزدەرىنە وقۋعا جولدانىپ, 1 932 جاس قايتارىمسىز گرانت الدى», دەيدى ە. كەلەسوۆ.
وڭىردەگى از قامتىلعان وتباسىلارعا جاردەماقى تولەۋ ماسەلەسى دە جولعا قويىلعان. ناقتىراق ايتار بولساق, اتاۋلى الەۋمەتتىك كومەكتەن ءۇمىتتى وتباسىلارعا قازان ايىنان باستاپ sms-حابارلامالار جولدانعان. ناتيجەسىندە, 218 وتباسىنا ءتيىستى ااك تاعايىندالعان. جالپى, 2022 جىلى وڭىردەگى 9 219 وتباسىنداعى 48 298 ازاماتقا اتاۋلى الەۋمەتتىك كومەك كورسەتۋ ءۇشىن 3,8 ملرد تەڭگە تولەنگەن.
«اتاۋلى الەۋمەتتىك كومەك الۋشىلاردى ماسىلدىق پيعىلدان ارىلتۋدىڭ ماڭىزى زور ەكەنىن تۇسىنەتىن كەز جەتتى. قانشا دەگەنمەن ەڭبەكپەن جەگەن نان ءتاتتى عوي. سوندىقتان دا ەڭبەككە جارامدى ازاماتتاردى جۇمىسقا تارتۋ ءىس-شارالارى قابىلدانىپ جاتىر. جىل باسىنان ااك الۋشىلار قاتارىنداعى ەڭبەككە جارامدى 2 591 ادام جۇمىسپەن قامتۋدىڭ بەلسەندى ءىس-شارالارىنا تارتىلىپ وتىر. ونىڭ ىشىندە تۇراقتى جۇمىس ورىندارىنا – 2 036 ادام, اقىلى قوعامدىق جۇمىسقا – 343 ادام, الەۋمەتتىك جۇمىس ورىندارىنا – 93, قىسقا مەرزىمدى وقۋ كۋرستارىنا – 69 ادام, جاستار پراكتيكاسىنا 9 ادام جولدانىپ, 41 ادام جاڭا بيزنەس-يدەيالارىن ىسكە اسىرۋ ءۇشىن قايتارىمسىز گرانت العان. ناقتى اتقارىلعان جۇمىستاردىڭ ناتيجەسىندە وتكەن جىلعى ەسەپتى مەرزىممەن سالىستىرعاندا ااك الۋشىلاردىڭ سانى 22,3%-عا تومەندەگەنىن ايتا كەتكەن ءلازىم», دەيدى باسقارما باسشىسى.
ونىڭ ايتۋىنشا, كەپىلدىك بەرىلگەن الەۋمەتتىك توپتامامەن ااك الۋشى وتباسىلارداعى 1 جاستان 6 جاسقا دەيىنگى 12 284 بالا قامتىلىپ, 722,1 ملن تەڭگە تولەندى. ەركىن كەلەسوۆتىڭ سوزىنە سەنسەك, ءوڭىر تۇرعىندارىن ماسىلدىق پسيحولوگيادان ارىلتۋ باعىتىندا وبلىستا اتقارىلاتىن جۇمىس از ەمەس. وسىلايشا, باسقارما باسشىسى ەڭبەككە جارامدى ازاماتتاردىڭ باسىم بولىگىنىڭ جۇمىسپەن قامتىلۋىنا كۇش سالۋدى كوكسەپ وتىر. ناتيجەسى قانداي بولاتىنىن ۋاقىت كورسەتە جاتار.
جامبىل وبلىسى