ءبىر وكىنىش ىشتە كەتتى – دەيدى ەركىن كۇرەستەن الەم چەمپيوناتىنىڭ ەكى دۇركىن جۇلدەگەرى داۋلەت نيازبەكوۆ

ەرەسەكتەر دۋىندا ونەر كورسەتكەن 12 جىل ارالىعىندا ەل چەمپيوناتتارىندا 55, 60 جانە 65 كيلو سالماق دارەجەلەرىندە ونەر كورسەتىپ, تەك ءبىر رەت قانا ۇتىلدىم. 2017 جىلى وتكەن بىرىنشىلىكتىڭ فينالىندا ساياتبەك وقاسوۆقا ەسە جىبەردىم. سەگىز رەت جەڭىس تۇعىرىنىڭ ەڭ بيىك ساتىسىنا كوتەرىلدىم

– داۋلەت, ەڭ ءبىرىنشى كەزەكتە وقىر­مان­­دارىمىز نە سەبەپتى با­لۋان­دىق ونەر­دى تاڭداعانىڭدى بىلگىسى كە­لەدى؟

– مەنىڭ انام ۇزاق جىلدار بويى جاڭاقورعانداعى سپورتتاعى دارىندى بالالارعا ارنالعان مەكتەپ-ينتەرناتتا جۇمىس ىستەدى. ءۇي شارۋاسىنان قولىم بوساعان كەزدە اناممەن بىرگە اتالعان ءبىلىم ورداسىنا ەرىپ باراتىنمىن. ول جەردە ابدەن ايىزىم قانعانشا ويناپ, ءوزىم قۇرالىپتاس بالالارمەن الىسىپ-ج ۇلىسامىن. سودان بىرتە-بىرتە كۇرەسكە قۇمارتا باستادىم. سپورتتىڭ وسى تۇرىنە قابىلەتىمنىڭ بارىن بايقاعان باپكەرلەر كوپ ۇزاماي مەنى ءوز قاراماقتارىنا الدى. اۋدان ورتالىعىندا العاشىندا بولات سابىرحانوۆتىڭ, ودان كەيىن ءابۋتالىپ امانوۆتىڭ قول استىندا جات­تىقتىم. شەبەرلىگىم شىڭدالا كەلە جارىستارعا قاتىسا باستادىم. ءتۇر­لى تۋرنيرلەردە جۇلدەلى ورىنداردى يە­لەنگەنىممەن, ءبىراز ۋاقىتقا دەيىن اۋىز تولتىرىپ ايتارلىقتاي تابىسقا قول جەتكىزە المادىم. 2006 جىلى مەكتەپ-ينتەرناتتى ءتامامداپ, الماتىعا اتتاندىم. قورعانىس مينيسترلىگىنە قاراستى ارمياشىلاردىڭ ورتالىق سپورت كلۋبىنىڭ (اوسك) كوللەدجىنە قابىلدانىپ, تانىمال باپكەر ولەگ ۋشانوۆتان ءتالىم-تاربيە الدىم. ءسوي­تىپ, الاتاۋ باۋرايىنا كەلىپ, جۇيەلى تۇردە جاقسىلاپ تۇرىپ جات­تىققاننان كەيىن جولىم اشىلدى.

– رەسپۋبليكالىق دەڭگەيدەگى دودالاردا ءوزىنىڭ تىرناقالدى تابىسىڭا قاي كەزدە قول جەتكىزدىڭ؟

– 2009 جىلى اقتوبەدە ۇيىمداس­تىرىلعان جاستار اراسىنداعى ەل بىرىن­شىلىگىندە كۇمىس مەدالدى يەلەندىم. تىر­ناقالدى تابىسىم سول.

– سودان ەرەسەكتەر دۋىنا تۇسە باس­تا­دىڭ. ول كەزدە سەن ونەر كورسەتكەن سال­ماقتا قاي بالۋاننىڭ دەسى باسىم بولدى؟

– ەلىشىلىك جارىستاردا دا, حالىق­ارالىق دودالاردا دا جەڭىل سالماق دارە­جەلەرىندە باسەكەلەستىك دەڭگەيى اركەز وتە جوعارى ەكەنىن جانكۇيەرلەر جاقسى بىلەدى. ماسەلەن, مەن ەرەسەكتەردىڭ ەل چەمپيوناتىنا العاش رەت 2010 جىلى قاتىستىم. قاراعاندىدا وتكەن جارىس­تا رۋسلان سەكسەنباەۆ, اسەت سەرىكباەۆ جانە اسلان جاناحانوۆ سىندى تانىمال بالۋانداردان باسىم ءتۇسىپ, باس جۇل­دەنى ولجالادىم. سول كەزدە سىر بويى جان­كۇيەرلەرىنىڭ شاتتانعاندارىن كور­سەڭىزدەر. سويتسەم, شيرەك عاسىردان اسا ۋاقىت بويى قىزىلوردا وبلىسىنان ەركىن كۇرەستەن ەل چەمپيونى شىقپاعان ەكەن. سول ۇزىلگەن ءداستۇردى جالعاستىرا العانىما قۋاندىم. سونداي-اق مەن ونەر كورسەتكەن سالماق دارەجەلەرىندە جو­عارىدا ەسىمدەرى اتالعان دۇلدۇلدەردەن بولەك, باۋىرجان ورازعاليەۆ, جاسۇلان مۇحتاربەك ۇلى, ساياتبەك وقاسوۆ, راسۋل قاليەۆ, عابيت تولەپباەۆ, تاعى باسقا ساڭلاقتار بولدى.

– سول كەزدەرى رەسپۋبليكامىزدىڭ باس كومانداسى ساپىنا قابىلدان­عا­نىڭمەن, حالىقارالىق ارەنادا بىراز­عا دەيىن باعىڭ جانباي ءجۇردى ەمەس پە؟

– ونىڭىز راس. قازاقستان چەمپيونى اتانعاننان كەيىن بىرقاتار بايراقتى باسەكەلەرگە قاتىستىم. بىراق جاۋاپتى جارىستاردا جەڭىلىستىڭ كەرمەك ءدامىن تاتتىم. ءسويتىپ, ءبىر جىل بويى ساتسىزدىكتىڭ شىرماۋىنان شىعا الماي ءجۇردىم. كەيىننەن ويلانىپ كورسەم, ونىڭ بارلىعى تاجىريبەنىڭ ازدىعىنان ەكەن. شىنى كەرەك, ول ۋاقىتتا مەن حالىقارالىق جارىستارعا تىم سيرەك قاتىساتىنمىن. جاستاردىڭ ازيا بىرىنشىلىگى مەن ياكۋتيادا وتەتىن دميتري كوركيننىڭ تۋرنيرىندە ءۇشىنشى ورىنعا تابان تىرەدىم. بار-جوعى وسى عانا. مىنە, سول كەزدە كەيبىر مىسىقتىلەۋ ادامدار سىرتىمنان الىپقاشپا سوزدەر ايتا باس­تادى. ولاردىڭ اڭگىمەلەرى «نيازبەكوۆ قازاقستان چەمپيوناتىن كەزدەيسوق ۇتتى» دەگەنگە سايدى. سول كەزدە مەنى ساناۋلى عانا ادامدار قولدادى. سولاردىڭ ءبىرى ءارى بىرەگەيى سادىق مۇستافاەۆ ەدى. قىزىلوردا وبلىستىق دەنە شىنىقتىرۋ جانە سپورت باسقارماسىن باسقارعان اعامىز مەنىڭ بارلىق شىعىنىمدى كوتەرىپ, داعىستانعا جىبەردى. ءسويتىپ, ەكى اي بويى سول جاقتا دايارلاندىم. داعىستاندىقتار دا قازاقتار سەكىلدى وتە قوناقجاي حالىق ەكەن. سول ەلدىڭ باپكەرلەرى جانە بالۋاندارىمەن تەز-اق ءتىل تابىستىم. بۇل ساپاردىڭ ماعان بەرگەنى كوپ. ەڭ باستىسى, مەن ءوز كۇرەسىمدى تاپتىم. كوپ كەشىكپەي, 2011 جىلى ورال­دا ۇيىمداستىرىلعان قازاقستان چەمپيو­ناتىندا بارلىق قارسىلاسىمدى ۇتىپ, التىن تۇعىرعا كوتەرىلدىم. سول جارىستىڭ جارتىلاي فينالىندا اسەت سەرىكباەۆقا سان سوقتىرسام, فينالدا راسۋل قاليەۆتى قاپى قالدىردىم.

– ەل چەمپيونى رەتىندە سەن 2011 جىلدىڭ مامىر ايىندا ازيا چەمپيو­ناتىنا قاتىسۋىڭ كەرەك ەدى. بىراق وزبەكستاننىڭ باس شاھارىندا بوي كورسەتپەدىڭ...

– ول كەزدە مەن ءار جارىس سايىن شامامەن سەگىز كيلوداي سالماق قۋا­تىنمىن. بۇل اعزاعا وتە اۋىر. سودان جەكە جاتتىقتىرۋشىممەن كەلىسە وتىرىپ, تاشكەنتكە بارۋدان باس تارتتىم. ايماقتىڭ سپورت باسشىسى سادىق مۇستافاەۆ ۇلتتىق قۇرامانىڭ باس باپكەرى التاي تاڭاباەۆقا جاعدايدى ءتۇسىندىردى. ول كىسى قارسىلىق بىلدىرگەن جوق. سودان مەن بارلىق شارۋانى ىسىرىپ قويىپ, الەمدىك دوداعا تىڭعىلىقتى دايارلاندىم.

– ەگەر تاريحقا ۇڭىلسەك, قازاقتىڭ ەركىن كۇرەس شەبەرلەرى اراسىنان تورت­كۇل دۇنيەنىڭ ەڭ مىقتى بالۋاندارى باس قوسقان باسەكەدە جۇلدە الۋ با­قى­تى جالعىز ماۋلەن مامىروۆقا عا­نا بۇيىرعان ەكەن. الاشتىڭ التىن اسىقتاي ۇلى 1997 جىلى كراس­نويارسكىدە وتكەن جارىستا قولا مە­دالدى ولجالادى. ارادا 14 جىل وت­كەن­­نەن سوڭ سەن ماۋ­لەننىڭ ەرلىگىن قاي­­تالاپ, سول بيىك­كە كوتەرىلدىڭ. ەندى سول مەرەيلى ءسات, ياعني 2011 جىلى ىس­تان­بۇلدا جالاۋى جەلبىرەگەن الەم چەم­پيو­ناتى جايىندا ەگجەي-تەگجەي اڭ­گىمەلەپ بەرسەڭ...

– انادولى ەلىندە وتكەن جارىسقا اتتانۋ ءۇشىن ماعان اۋەلى ەلىمىزدىڭ تاعى ءبىر بەلدى بالۋانى عابيت تولەپباەۆتان مىقتى ەكەنىمدى دالەلدەۋ قاجەت بولدى. باپكەرلەر سونداي تالاپ قويدى. سودان ەكەۋمىز كيەۆكە اتتاندىق. عابيت ۋكراي­نانىڭ استاناسىندا تۇساۋى كە­سىلگەن ءتۋرنيردىڭ العاشقى اينالىمىندا ءسۇرىندى. مەن باستاپقى ەكى با­سەكەدە باسىمدىق تانىتىپ, ءۇشىنشى كە­زەڭدە ەكى دۇركىن الەم چەمپيونى, ءۇش دۇركىن ازيا ويىندارىنىڭ جەڭىمپازى, وزبەكستاندىق ءدىلشود مانسۋروۆقا ەسە جىبەردىم. ال ءۇشىنشى ورىن ءۇشىن تارتىستا وليمپيا ويىندارىنىڭ قولا جۇلدەگەرى, الەم چەمپيونى, بولگاريالىق رادوسلاۆ ۆەليكوۆتى جەڭىپ, ءۇشىنشى ورىندى يە­لەندىم. وسىلايشا, ماعان دۇنيەجۇزىلىك دوداعا جول اشىلدى.

ىستانبۇلدا لوندون وليمپيا­دا­سىنىڭ ليتسەنزيالارى ساراپقا سالىن­عاندىقتان قاتىسۋشىلاردىڭ سانى دا وتە كوپ بولدى. 16 مىڭ كورەرمەنگە ەسەپتەلگەن «سينان ەردەم» ارەناسىندا 104 مەملەكەتتەن كەلگەن 900-دەن اسا بالۋا­ن كۇش سىناستى. باستاپقى باسەكەلەردە گرەكيالىق لوانيس يۆانيديس پەن قۇر­لىق چەمپيونى, الەم كۋبوگىنىڭ قولا جۇلدەگەرى, ازەربايجاندىق ماحمۋد ما­­گو­مەدوۆتەن باسىم ءتۇستىم. ودان كەيىن رەسەيدىڭ اتاقتى بالۋانى ۆيكتور لە­­بەدەۆتەن ۇتىلدىم. جۇبانىش بەل­دە­سۋىندە قىرعىزستاندىق نۇرلان مە­كە­ن­اليەۆتى جەڭىپ, قولا مەدال ءۇشىن سايىستا ارمەنيالىق ميحران جابۋرياندى ۇتتىم. كەلەسى كۇنى 60 كيلو سالماقتا باق سىناعان داۋرەن جۇماعازيەۆ تە ءۇشىنشى ورىنعا تۇراقتادى. وسىلايشا, قوس قازاق انادولى ەلىنەن ولجالى ورالدىق.

– سودان كەيىن ارادا سەگىز جىل وت­كەن­نەن سوڭ الەم چەمپيوناتىندا قاي­تا جەڭىس تۇعىرىنا كوتەرىلدىڭ. بۇل جولى كۇمىس جۇلدە بۇيىردى. بىراق نەسىنە جاسىرايىق, سول جارىستا كۇللى قازاقستاننىڭ جانكۇيەرلەرى سەنەن التىن مەدال كۇتكەن ەدى...

– مەنىڭ دە ماقساتىم سول ەدى. اس­تانادا التىن الىپ, كۇللى الاش جۇرتىن قۋانىش پەن شاتتىققا بولەسەم دەپ ارماندادىم. ءيا, اتالعان جارىستى وتە جاقسى باستادىم. تايپەيلىك يۋ-سۋن چان, گەرمانيالىق الەكساندر سەميسوروۆ, موڭعوليالىق تۋلگا تيمۋر وچير جانە ۇندىستاندىق باجرانگ پۋنيانى ۇتىپ, اقتىق سىندا كۇش سىناسۋ قۇرمەتىنە يە بولدىم. بىراق فينالدا رەسەيلىك گادجيمۋرات راشيدوۆقا ەسە جىبەردىم. شىنىمدا ايتسام, شەشۋشى تۇستا نە قىرسىق شالعانىن ءوزىم دە تۇسىنە المادىم. قۇلشىنىسىم كۇشتى بولعانىمەن, دەنەم مەنى مۇلدە «تىڭدامادى». ناتي­جەسىندە, قول-اياعىم تىرىسىپ, الەم چەم­پيوناتىنىڭ ەكى دۇركىن كۇمىس جۇلدەگەرى, ەۋروپانىڭ ەكى دۇركىن چەمپيونىنا جارىتىپ قارسىلىق كورسەتە المادىم.

– سپورتشى اتاۋلىنىڭ بار­لى­عى­نىڭ دا ارمانى – وليمپيا ويىندارىندا اتوي سالۋ. سەن 2012 جىلى لوندون جانە 2021 جىلى توكيوداعى دوداعا قاتىستىڭ. ەكى رەتىندە دە جەڭىس تۇعىرىنا سىنىق-سۇيەم قالعاندا ءسۇرىنىپ, بەسىنشى ورىندى قاناعات تۇت­تىڭ. بۇل باسەكەلەردە بابىڭ كەم بولدى ما, الدە باعىڭ جانبادى ما؟

– لوندوندا ءتورت كەزدەسۋ وتكىزدىم. 1/8 فينالدا امەريكالىق سەم حازەۆينكەلمەن ايقاستىم. ونىڭ اكەسى دەيۆ پەن اعاسى دجيم دە كەزىندە مىقتى كۇرەسكەن. ەكەۋى دە ەرتەرەكتە وليمپيا ويىندارىن­دا باق سىناعان ەكەن. حازەۆينكەلدى 5:1 ەسەبىمەن ۇتتىم. شيرەك فينالدا ءوزىمنىڭ قۇرداسىم احمەت پەكەرمەن كۇش سىناس­تىم. تۇركيانىڭ تاستۇلەگى جاستار اراسىندا ءۇش دۇركىن الەم چەمپيونى اتانىپ, ەرەسەكتەردىڭ ەۋروپا بىرىنشىلىگىندە قولا مەدالدى قورجىنعا سالعان. پەكەردى 3:1 ەسەبىمەن ەڭسەردىم. جارتىلاي فينالدا رەسەيلىك جامال ومارسۇلتانوۆپەن جولىقتىم. ءۇش دۇركىن ەۋروپا چەمپيو­نىن ەڭسەرە المادىم. ال قولا مەدال ءۇشىن باسەكەدە سولتۇستىك كورەيانىڭ وكىلى كيونگ يانگكە ەسە جىبەرىپ, بەسىنشى ورىندا قالىپ قويدىم. ول كەزدە سالماقتى دۇرىس قۋا المادىم. ساتسىزدىكتىڭ باستى سەبەبى سول دەپ ويلايمىن. توعىز كيلو ارتىق سالماقتان ارىلامىن دەپ, ءوز-ءوزىمدى قاتتى زورىقتىرىپ جىبەردىم. باستاپقى باسەكەلەردە نامىسقا تىرىسىپ, دىتتەگەن ماقساتىما قول جەتكىزگەنىممەن, شەشۋشى تۇستا قاتتى السىرەپ قالدىم.

توكيو وليمپياداسى قارساڭىندا باپكەرلەردىڭ «65 كيلو سالماقتا كىمدى كۇرەستىرسەك» دەپ, ءبىراز باس قاتىرۋلارىنا تۋرا كەلدى. نەگىزگى ۇمىتكەرلەر – مەن جانە ساياتبەك وقاسوۆ ەكەۋىمىز. ول كەزدە موينىما جا­رىقشاق ءتۇسىپ, سول دەرت قاتتى مازالاپ جۇرگەن. تىپتەن, اۋرۋحاناعا جاتۋعا دا تۋرا كەلدى. سوعان قاراماستان قالاي دا وليمپيا ويىندارىنا بارۋدى كوزدەدىم. باپكەرلەر ءبىراز ويلانا-تولعانا كەلە ەكەۋمىزدى پولشاداعى تۋرنيرگە اپارۋدى قۇپ كوردى. ول جارىستا ساياتبەك تە, مەن دە ءۇشىنشى ورىندى ەنشىلەدىك. سودان الماتىعا ورالعاننان سوڭ ەكەۋمىزدى ءبىر عانا جاتتىعۋ بارىسىندا ءۇش رەت كۇرەستىردى. بۇل باسەكەلەردىڭ بارلىعىن دا مەنىڭ مەرەيىم ۇستەم بولدى. سودان جاپونياعا جول تارتتىم. تۇساۋكەسەر كەزدەسۋدە الەم چەمپيوناتىنىڭ ەكى دۇر­كىن قولا جۇلدەگەرى, الەم كۋبوگى مەن پانامەريكا ويىندارىنىڭ جەڭىمپازى, ءوز قۇرلىعىنىڭ ءۇش دۇركىن چەمپيونى, كۋبالىق الەحاندرو ۆالدەستى 10 ۇپاي ايىرماشىلىعىمەن ۇتتىم. كەلەسى كەزدەسۋدە ريو وليمپياداسىنىڭ قولا جۇل­دەگەرى, الەم مەن ەۋروپانىڭ ءۇش دۇر­كىن چەمپيونى, ەۋروپا ويىندارىنىڭ جەڭىمپازى, ازەربايجاندىق گادجي اليەۆتىڭ وسال تۇسىن تابا المادىم. جۇبانىش بەلدەسۋدە سەنەگالدىق الام دياتتەنىڭ اياعىن كوكتەن كەلتىردىم. سول كەزدە موينىمداعى جاراقاتىمدى اسقىندىرىپ الدىم. سونىڭ سالدارىنان قولا مەدال ءۇشىن تارتىستا الەم چەمپيوناتىدا جۇلدە الىپ, ازيا ويىندارىندا الدىنا جان سالماعان ۇندىستاندىق باجرانگ پۋنياعا جول بەردىم.

– قازاقستان چەمپيوناتىندا قانشا رەت جەڭىمپاز اتاندىڭ؟

– ەرەسەكتەر دۋىندا ونەر كورسەتكەن 12 جىل ارالىعىندا ەل چەمپيوناتتارىندا 55, 60 جانە 65 كيلو سالماق دارەجەلەرىندە ونەر كورسەتىپ, تەك ءبىر رەت قانا ۇتىلدىم. 2017 جىلى وتكەن بىرىنشىلىكتىڭ فينالىندا ساياتبەك وقاسوۆقا ەسە جىبەردىم. سەگىز رەت جەڭىس تۇعىرىنىڭ ەڭ بيىك ساتىسىنا كوتەرىلدىم. تاعى ەكى جارىستان بوساتىلدىم.

– ۇلكەن سپورتپەن قوش ايتىسۋىڭا نە تۇرتكى بولدى؟

– سپورتتا از جۇرگەن جوقپىن. 32 جاسىما دەيىن كۇرەسىپ, بۇيىرعان نەسىبەمدى الدىم. بىراق سوڭعى كەزدەرى جاراقاتتار دا ءجيى مازالادى. سودان توكيو وليمپياداسى اياقتالعاننان كەيىن وسىنداي شەشىمگە كەلدىم. كوپ ۇزاماي رەسپۋبليكالىق كۇرەس فەدەراتسياسىنىڭ پرەزيدەنتى داۋلەت تۇرلىحانوۆتىڭ قول­داۋىمەن قازاقستاننىڭ جاس­وسپى­رىمدەر قۇراماسىنىڭ اعا جاتتىق­تىرۋشىسى بولىپ تاعايىندالدىم.

– داۋلەت, وسى جاۋاپتى قىزمەتتى اتقارىپ جۇرگەنىڭە ءبىر جىلدان اسا ۋاقىت ءوتتى. سول ارالىقتا سەن جاتتىق­تىرعان كوماندا قانداي جەتىستىكتەرگە قول جەتكىزدى؟

– جەتىستىگىمىز جامان ەمەس. 2022 جىلى بالعىن بالۋاندار (U-15) اراسىندا باحرەيندە وتكەن ازيا بىرىنشىلىگىنىڭ جالپى ەسەبىندە ءۇشىنشى ورىندى يەلەندىك. ول جارىستا ەكى ورەنىمىز جەڭىس تۇعىرىنا كوتەرىلدى. بىشكەكتەگى جاسوسپىرىمدەردىڭ (U-17) قۇرلىق بىرىنشىلىگىندە 2 التىن, 2 كۇمىس جانە 4 قولانى ولجالاپ, كومان­دالىق سايىستا ەكىنشى ساتىعا جاي­عاستىق. الاتاۋدىڭ ارعى بەتىندە نۇر­دانات ايتانوۆ (57 كيلو) پەن كاميل كرۋگليەۆ (92 كيلو) الدارىنا جان سالمادى. سودان تامىز ايىندا اپەننين تۇبەگىنە اتتاندىق. ريمدە جالاۋى جەل­بىرەگەن الەم بىرىنشىلىگىندە (U-17) ەكى جەرلەسىمىز باس جۇلدەنى ولجالادى. ولار – دارىن اسكەربەك (55 كيلو) پەن كاميل كرۋگليەۆ (92 كيلو). ءدال وسىنداي كورسەتكىشكە قازاقستاننىڭ ەركىن كۇرەس شەبەرلەرى سوناۋ 2011 جىلى قول جەت­كىزگەن ەكەن. 11 جىلدان كەيىن ءبىز سول ناتيجەنى قايتالادىق. ال ءدال وسى جاستاعىلاردىڭ دۇنيەجۇزىلىك دوداسىندا ءبىزدىڭ بالۋانداردىڭ دارالانا الماي جۇرگەنىنە توعىز جىل بولعان ەكەن.

– بۇرىن ەلىمىزدىڭ بەلدى بالۋان­دارىنىڭ ءبىرى ءارى بىرەگەيى بولساڭ, بۇگىنگى تاڭدا بىلىكتى باپكەر رەتىندە ءوزىڭدى مويىن­داتا باستادىڭ. وسى ورايدا, مامان رەتىندە سەنى كۇرەس سالا­سىندا قانداي ماسە­لەلەردىڭ تولعان­دىرا­تىنىن بىل­گىمىز كەلەدى؟

– ەڭ ءبىرىنشى كەزەكتە كادر ماسە­لەسىنە ءجىتى نازار اۋدارعان ءجون. كۇنى كەشە عانا ۇلكەن سپورتتان قول ۇزگەن اتاقتى سپورتشىلاردى باپكەرلىك قىز­مەتكە كوپتەپ تارتۋىمىز كەرەك. ءىرى دۇرمەكتەردە ىسىلىپ, ءدۇبىرلى دودالاردا دارالانعان بالۋانداردىڭ كورگەنى مەن بىلگەنى, كوڭىلگە تۇيگەندەرى كوپ. ولار جەڭىسكە جەتۋدىڭ جولىن جاقسى بىلەدى. جانە دە سونى جاستارعا ۇيرەتە الادى. ال جاس ورەندەر ءوز كەزەگىندە اككى سپورتشىلارعا قاراپ بوي تۇزەيدى. وزدەرىنىڭىز بايقاساڭىزدار, تارازداعى رۋسلان سەكسەنباەۆ, وسكەمەندەگى جان­بولات ماعزۇموۆ پەن الماتىداعى راسۋل قاليەۆتىڭ باپكەرلىكتىڭ قامىتىن كي­گەنىنە اسا كوپ ۋاقىت بولا قويعان جوق. سوعان قاراماستان بۇل جىگىتتەر قازىردىڭ وزىندە وتە جاقسى جۇمىس ىستەپ, مىقتى شاكىرتتەر تاربيەلەپ ءجۇر. بۇگىنگى تاڭدا حالىقارالىق ارەنادا ەل نامىسىن ابىرويلى قورعاپ جۇرگەن نۇرلان بەكجانوۆ, دانيار قايسانوۆ جانە تاعى باسقا بەلدى بالۋانداردىڭ ەرتە مە, كەش پە, ۇلكەن سپورتپەن قوش ايتىساتىنى انىق. سولاردى بىردەن جاتتىقتىرۋشىلىق قىزمەتكە تارتۋىمىز كەرەك. بۇل ءۇردىس بۇكىل الەمدە بار. بايقاساڭىزدار, جاپو­نيا, وڭتۇستىك كورەيا جانە ەۋروپانىڭ جەتەكشى مەملەكەتتەرىنىڭ ۇلتتىق قۇراما كومانداسىنداعى باپكەرلەرىنىڭ بارلىعى دا كەزىندە وليمپيا ويىندارىندا نەمەسە الەم چەمپيوناتىندا اتوي سالعان اپايتوستەر. بىزدە وسى تاجىريبەنى وزىمىزگە ەنگىزۋىمىز كەرەك.

– اڭگىمەڭە كوپ راحمەت, داۋلەت! باپ­كەرلىك كاسىپتە دە باعىڭنىڭ جانۋىنا تىلەكتەسپىن.

اڭگىمەلەسكەن

عالىم سۇلەيمەن,

«Egemen Qazaqstan»