دەپۋتاتتىقتان كىمدەر دامەلى؟

اتىراۋ وبلىستىق اۋماقتىق سايلاۋ كوميسسياسىنىڭ اقپارا­تى­­نا سۇيەنسەك, مۇنايلى وڭىر­دەن پارلامەنت ءماجىلىسىنىڭ دەپۋتات­تى­عى­نا بىرمانداتتىق سايلاۋ وكرۋگىنەن 1, ال ءار دەڭگەيدەگى 9 ماسليحاتقا 140 دەپۋتات سايلانادى. قازىر سايلاۋعا 496 كانديدات ۇسىنىلعان.

ساياسي دودانىڭ كورىگى ءماجى­لىس دەپۋتاتى ءۇشىن تالاستا قى­زا­تىنى بايقالادى. ويتكەنى اتى­راۋ وبلىسىنان تومەنگى پالاتا دەپۋتاتىن سايلاۋ جونىن­دەگى №13 بىرمانداتتىق سايلاۋ وكرۋگىنە 20 كانديدات ۇسى­نى­لىپ وتىر. ونىڭ ىشىندە ءوزىن-ءوزى ۇسىنعان 16 كانديدات بار. ءتورت كانديدات – «اmanat», «اق­جول», «اۋىل», جسدپ پار­تيا­لارىنىڭ وكىلى. ال ءماجى­لىس دەپۋتاتتىعىنان كان­ديدات­تاردىڭ باسىم بولىگى باس­شىلىق قىزمەت اتقارىپ ءجۇر. ءۇمىتىن ۇرلەپ, ساياسي دوداعا قاتى­سۋعا بىلەك تۇرگەندەردىڭ ەكى زەينەتكەردەن وزگەسىنىڭ جاسى نەگىزىنەن 34 پەن 60-تىڭ ارالىعىن قۇرايدى. ەڭ ۇلكەنى – 76, ەڭ كىشىسى – 34 جاستا. ەكى زەينەتكەرگە قوسا ءۇش جۇمىسسىز, ءبىر مە­حانيك, ءبىر مامان بار. باق-تىڭ ەكى وكىلى دە باق سىناماققا بەكىنگەن. كان­ديداتتاردىڭ بىرەۋى بۇرىن سە­نات­تىڭ, تاعى بىرەۋى ءماجىلىستىڭ دەپۋتاتى بولعان. ءوزىن-ءوزى ۇسىنعان بۇرىنعى دەپۋتات­تاردىڭ ەكەۋىنىڭ دە ما­مان­دىعى – زاڭگەر, قازىرگى ءال-فارابي اتىنداعى قازۇۋ-ءدىڭ تۇلەگى. ءماجىلىس دەپۋتاتتىعىنا كان­دي­دات­­تىڭ ءبىرى – اتىراۋ قالا­سى­نىڭ بۇ­رىنعى اكىمى. جاسى جەتپىستىڭ جەلكەنىن كەرگەن ەكس-اكىم دە ءوزىن-ءوزى ۇسىنىپ وتىر. بىراق زەينەتكەر بولعانىمەن, ءالى دە شەتەلدىك كومپانيادا باسشىنىڭ ورىنباسارى لاۋازىمىن اتقارادى.

سونداي-اق وبلىستىق ءماس­لي­حات­­تىڭ دەپۋتاتتارىنا 30 ورىن بولىن­گەن. ونىڭ ىشىندە تەڭ­ جار­تىسى ما­جوريتارلىق جۇ­­يە­مەن, قال­عا­نى پارتيالار ۇسىن­عان تىزىم­مەن سايلانعالى وتىر. اتىراۋ قالالىق ءماس­لي­حا­­تىنىڭ 25 دەپۋتاتى, 7 اۋداندىق ءماسليحاتتىڭ 85 دەپۋتاتى تولىقتاي ماجوريتارلىق تاسىلمەن سايلانادى. وبلىستىق ءماسليحاتتىڭ 15 دەپۋتاتىن پار­تيالىق تىزىممەن سايلاۋ كوز­­دەل­گەن. بۇل دا ساياسي پارتيا­لار اراسىنداعى باسەكەنى ورىس­تە­تەتىنى داۋسىز. سوندىقتان بو­لار, 6 ساياسي پارتيا­دان 15 مان­­دات ءۇشىن ۇسىنىلعان كاندي­دات­تار سانى – 68. ونىڭ ىشىندە «Amanat» پارتياسىنان 31 كانديدات بار. ال «اقجول» پارتياسى – 10, قازاقستان حالىق پارتياسى – 9, «اۋىل» پارتياسى 7 ۇمىتكەرىن قوسقان. ساياسات الاڭىنا ەندى عانا قادام باسىپ, بەلسەندى جۇمىس ناتيجەسىن كورسەتە قويماسا دا «بايتاق جاسىلدار» مەن «Respublica» پارتياسى دا بۇل دودادان قالىس قالعىسى كەلمەگەن. الدىڭعىسى پارتيالىق تىزىممەن – 6, سوڭعىسى 5 وكىلىن ۇسىنىپتى.

ءوڭىر بيۋدجەتىن بەكىتەتىن ءماس­ليحات دەپۋتاتتارىن سايلاۋ جونىن­دەگى 15 بىرمانداتتىق اۋماقتىق سايلاۋ وكرۋگىنە – 50, اتىراۋ قالالىق ءماسليحاتىنا – 84, جىلىوي اۋداندىق ءماسليحاتىنا – 52, يندەردە – 40, يساتايدا – 34, قۇرمانعازىدا – 42, قىزىلقوعادا – 37, ماقاتتا – 36, ماحامبەت اۋداندىق ءماس­لي­حاتىنا 33 كانديدات ۇسى­­نى­لىپ وتىر. باس­شىنىڭ پورت­فەلىن ۇستاعاندار دەپۋتات بولۋ­دان ۇمىتتىلەردىڭ قاتارىن تو­لىقتىردى. سايلاۋالدى با­سەكە ماقات اۋدانىندا وزگەشە قار­قىن الاتىنعا ۇقسايدى. ولاي دەۋىمىزگە مۇندا ءبىر ۇجىمنان ءبىر-بىرىمەن باسەكەلەس بولۋدى كوزدەگەن ۇجىمداستار كوپ. باسشى مەن ورىنباسارى, ءبولىم جەتەكشىسى لاۋازىمىمەن ءبىر ۇجىمدا جۇمىس ىستەيتىن ارىپ­تەس­تەر ءبىر سايلاۋ وكرۋگىندە توقاي­لاسقان. سوعان قاراعاندا, ولار ء«بىرى – ءبارى ءۇشىن, ءبارى – ءبىرى ءۇشىن» دەيتىن قاعيدانى ۇستاناتىن بولۋى كەرەك. ءسويتىپ, ءبىر مەكتەپتەن ءۇش مۇعالىمنىڭ, ءبىر كاسىپورىنداعى ءۇش مۇنايشى مەن اۋرۋحانانىڭ ءۇش دارىگەرى اراسىندا قانداي ۋاعدا بولعانى بەلگىسىز, ايتەۋىر, ارىپتەستەر ءبىر وكرۋگتەگى سايلاۋشىلاردىڭ دا­ۋىسىن ءوزارا بولىسۋگە تالپىنىپ كورمەك. باسشىنىڭ ءبارىن «Amanat» پارتياسى ۇسىنسا, ولاردىڭ باسە­كە­لەستەرى وزدەرىن ۇمىتكەرلەر ساپىنان كورگىسى كەل­گەن. ايتپاقشى, مۇندا اۋدان اكىمىنىڭ ورىنباسارى دا سايلاۋشىلاردىڭ كوڭىل كىلتىن تابۋعا شەشىم قابىلداپتى.

اتىراۋ وبلىسىنداعى 9 ءماسلي­حات­تىڭ دەپۋتاتتىعىنا كاندي­دات­تار­دىڭ اراسىندا ءار سالانىڭ وكىلى بارىن ايتقان ءلازىم. سوڭعى 10 جىلدان بەرى ۇزبەي دەپۋتات بولعان, بۇ­رىن مانداتىن ءوز ەركىمەن تاپسىرىپ كەتكەن ۇمىتكەر دە قايتادان دوداعا تۇسپەك. اسىرەسە ءبىلىم, مەديتسينا, مادەنيەت سالاسىنىڭ وكىلدەرى جەتەرلىك. مۇعالىم مەن دارىگەر, مەحانيك پەن دانەكەرلەۋشى, اۋدارماشى سەكىلدى قاراپايىم ماماندىقتىڭ يەلەرى دە بار. جۇمىسسىز جۇرگەندەر مەن زەينەتكەرلەر نەكەن-ساياق. جاستار­دىڭ ۇلەسى دە از ەمەس.

ايتا كەتەر ءبىر جايت, كاندي­دات­تاردىڭ تۇگەلگە جۋىعى – قازاق. ماجوريتارلىق جۇيەمەن دەپۋتات سايلاناتىن وكرۋگتەردەگى كانديداتتار توبىنان وزگە ەتنوستىڭ 5-6 وكىلىنىڭ عانا اتى-ءجونى كەزدەستى. دەگەنمەن بۇدان بۇرىنعى سايلاۋلاردا بايقالىپ جۇرگەندەي, كانديداتتار تىزىمىندە قاراپايىم ەڭبەك ادامىنان گورى جۇمساق ورىنتاقتى جامباسىنا باسقان باسشىلاردىڭ سانى وزىپ تۇر. ءبارىن ايت تا, ءبىر ايت, بۇل سايلاۋ­دا الاقانىن ىسقىلاپ وتىرعان باسشىلار وتە كوپ. ءبارىنىڭ ويى – دەپۋتات بولۋ.

اتىراۋ وبلىسى