توكيودا وتكەن پاراليمپيادا ويىندارىندا اتىراۋلىق ءۇش پارادزيۋدوشى كۇمىس جۇلدەگەر اتانعان ەدى. سونداي ساڭلاق سپورتشىنىڭ ءبىرى – ءانۋار ساريەۆ. قازىر ونى الەم تانيدى.
سپورتقا اڭسارى اۋعان ول مەكتەپتە دەنەشىنىقتىرۋ ساباعىن جاقسى كوردى. اسىرەسە دزيۋدونى جانىنا سەرىك ەتكىسى كەلدى.
– سپورتتىڭ قاي ءتۇرى دە وڭايلىقپەن باعىندىرا بەرمەيدى. ال دزيۋدو – ەڭ قيىن ءتۇرى. بەس مينۋتتىق بەلدەسۋ كەزىندە ءبىر سەكۋندقا عانا قاتەلىك جىبەرسەڭ, ورنى تولمايتىن وپىق جەپ قالاسىڭ. سوندىقتان حالىقارالىق سايىستارعا بارعاندا, ءوزىمنىڭ ەمەس, الدىمەن ەلدىڭ ابىرويىن ويلايمىن. ويتكەنى الەم نازارى اۋعان سايىستاردا جەڭىسكە جەتسەڭ, ەلدىڭ كوك بايراعى كوتەرىلىپ, ءانۇرانى شىرقالادى. سول كەزدە ەلىڭە, وتانىڭا دەگەن قۇرمەتىڭ ارتا تۇسەدى. الايدا قازاقتىڭ «باق شابا ما, باپ شابا ما؟» دەگەنىندەي, سپورتتا ۇنەمى جەڭىستىڭ بيىك تۇعىرىنا كوتەرىلۋ مۇمكىن ەمەس. بىردە جەڭىسكە جەتىپ, مەرەيلەنىپ تۇراسىڭ, ال كەيدە جەڭىلىستىڭ كەرمەك ءدامىن تاتۋعا تۋرا كەلەدى. جەڭىلگەن ساتتە «وزىمنەن ءۇمىت كۇتكەن باپكەرىمدى, بارشا جانكۇيەرىمدى, ەلىمدى ۇياتقا قالدىردىم-اۋ» دەگەن ويعا بەرىلەسىڭ. ارينە, جەڭىس تە, جەڭىلىس تە سپورتشىنىڭ كوڭىل كۇيىنە اسەر ەتەدى, – دەيدى توكيو پاراليمپياداسىنىڭ كۇمىس جۇلدەگەرى ءانۋار ساريەۆ.
پارادزيۋدوشى ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ دەنەشىنىقتىرۋ فاكۋلتەتىن بىتىرگەن. دزيۋدومەن بالا كەزىنەن اينالىسادى. بۇرىن قازاقستان قۇراما كومانداسىنىڭ ساپىندا جاتتىققان.
– دزيۋدودان ەل قۇراماسىنىڭ ساپىندا ءتۇرلى وقۋ-جاتتىعۋ جيىندارىنا قاتىسىپ ءجۇردىم. سول كەزدە ەلدوس سمەتوۆپەن, ايبەك يماشەۆپەن بىرگە جاتتىققان ەدىم. ايبەك ەكەۋمىز ءتۇرلى تۋرنيردە بىرگە كۇرەسىپ, ءبىر-بىرىمىزدەن ۇيرەنەتىنبىز. مۇنداي بەلدەسۋدىڭ شەبەرلىگىمىزدى شىڭداۋعا ىقپالى ءتيدى, – دەپ ەسكە الادى پارادزيۋدوشى.
الايدا ءومىردىڭ ءوز اعىمى بار. ونى ءوز دەگەنىڭە بەيىمدەۋ قيىن. جول اپاتىنا تۇسكەن ءانۋار ساريەۆ كوزىنەن جاراقات الىپ, باستاپقىدا دزيۋدودان قول ۇزۋىنە تۋرا كەلدى. بىراق تاعدىردىڭ سىناعىنا مويىماعان جاس جىگىت سپورتتى تاستاماۋدى ءجون كوردى.
– كولىك اپاتىنان كەيىن كوز جانارىما زاقىم كەلىپ, كورۋ مۇمكىندىگىم ناشارلاعانى راس. الايدا مەنىڭ مۇمكىندىگىم شەكتەلگەن جوق عوي. كەرىسىنشە, ءومىر سۇرۋگە, جەتىستىككە جەتۋگە قۇلشىنىسىم ارتا ءتۇستى. سول سەبەپتەن ءوزىمنىڭ ۇيرەنشىكتى سپورتىما قايتا ورالدىم. بۇدان بىلاي پارادزيۋدومەن اينالىسىپ, ەلىمنىڭ ابىرويىن اسقاقتاتا بەرەمىن دەگەن شەشىم قابىلدادىم, – دەيدى ءا.ساريەۆ.
ونىڭ باعى بار ەكەن. پارادزيۋدونى دامىتۋدى قولعا العان بىلىكتى باپكەر جاندوس قيانوۆ ونى ءوز باۋىرىنداي جانىنا تارتتى. باپكەرلىك كەڭەسىن بەرىپ, اعالىق اقىلىن ايتتى. جىگەرىن جانىپ, حالىقارالىق دودالارعا جەتەلەپ اپاردى.
– بالا كەزىمنەن سپورتتى, ونىڭ ىشىندە دزيۋدونى تاڭدادىم. سپورتشى بولعان سوڭ, ەلىمىزدىڭ كوك بايراعىن حالىقارالىق دودالاردا بيىكتە جەلبىرەتىپ, ءانۇرانىن شىرقاتۋدى ارمانداۋشى ەدىم. سول ارمانىمدى ورىنداۋ ءۇشىن ءالى دە جاتتىعىپ ءجۇرمىن, – دەيدى سپورتشى.
ءانۋار ساريەۆ – پارادزيۋدودان پاراليمپيادا ليتسەنزياسىن يەلەنگەن العاشقى قازاق سپورتشىسى. ارينە, ليتسەنزياعا قول جەتكىزۋ وڭاي بولعان جوق. بۇل ءۇشىن جاتتىعۋلارعا ۇزبەي قاتىسىپ, تەر توكتى. بىرنەشە حالىقارالىق دودادا باق سىنادى. سونداي سايىستىڭ ءبىرى – 2015 جىلى كورەيانىڭ سەۋل قالاسىندا وتكەن مۇمكىندىگى شەكتەۋلى سپورتشىلاردىڭ بۇكىلالەمدىك ويىندارى. سول سايىستا 60 كيلودا بەلدەسكەن پارادزيۋدوشى قولا مەدال يەلەنىپ, ريو-دە-جانەيرو پاراليمپياداسىنىڭ ليتسەنزياسىنا قول جەتكىزگەن ەدى.
– بۇل – العاش رەت قاتىسقان پاراليمپيادا. باسقا سايىستارعا قاراعاندا, ءتورت جىلدا ءبىر وتەتىن پاراليمپيادانىڭ ءجونى بولەك. سوندىقتان ءار سپورتشىدا قوبالجۋ بولاتىنىن جاسىرمايمىن. جاھان جۇرتى كوز تىككەن ءدۇبىرلى دودانىڭ شيرەك فينالىندا ازەربايجاندىق رامين يبراگيموۆكە ەسە جىبەرىپ الدىم. ال جۇبانىش بەلدەسۋىندە ارگەنتينالىق ەدۋاردو گاۋتونى ۇتىپ, قولا مەدال يەلەنۋگە ءبىر قادام جاقىنداي تۇسكەن ەدىم. بىراق قولا مەدال ءۇشىن تارتىستا ۋرۋگۆاي سپورتشىسى حەنري بورحەس جولىمدى كەسىپ كەتتى. ءسويتىپ, العاشقى پاراليمپيادادا ەل قورجىنىنا جۇلدە سالا الماعانىما وكىندىم, – دەيدى ءانۋار ساريەۆ.
الايدا بۇل ساتسىزدىك قايسار سپورتشىنى مۇقالتا قويعان جوق. شاربولاتتاي شيرىققان پارادزيۋدوشى جەكە باپكەرى جاندوس قيانوۆتىڭ كەڭەسىن بۇلجىتپاي ورىنداپ, جاتتىعۋعا بەل شەشە كىرىستى. ماقساتى – توكيو پاراليمپياداسىنان جۇلدە الۋ.
– توكيو پاراليمپياداسىندا 60 كيلوداعى مەنىڭ سالماعىمدا قارسىلاس كوپ بولدى. ءبىر سالماقتا مەنىمەن بىرگە 12 سپورتشى سىنعا ءتۇستى. ءبارى دە – ءوز ەلىنىڭ مىقتى سپورتشىسى. ءسال قاتەلىككە بوي الدىرساڭ, قاپىدا قالدىرۋعا دايىن تۇر. ونىڭ ىشىندە شەبەرلىگى شىڭدالعان ەڭ مىقتى پارادزيۋدوشىلار بار. اسىرەسە ماعان فينالداعى سايىس قيىنعا سوقتى. سەبەبى فينالدا ازەربايجان وكىلى ۆۋگار شيرينليمەن كەزدەستىم. ول 2017 جىلعا دەيىن دەنساۋلىعىندا كىناراتى جوق سپورتشىلار اراسىندا جارىستارعا قاتىسىپ, بەس ۇزدىك دزيۋدوشىنىڭ قاتارىنا كىرگەن. اقتىق سىندا الدىمەن قارسىلاسىم بازاري ۇپايىن ەنشىلەدى. «ەندى نامىسقا تىرىسۋ قاجەت» دەپ وي ءتۇيدىم. ءسويتىپ, ونىڭ وسال تۇسىن تاۋىپ, مەن دە بازاريگە قول جەتكىزدىم. بۇدان سوڭ ەكى رەت ءادىس قولدانۋعا تىرىستىم. بىراق ءادىسىم ءساتتى شىقپادى. باستاپقىدا قولىم ۇستاعان جەرىنەن سۋسىپ كەتتى. كەلەسىدە شيرينلي ايلالى ءادىسىمدى ورىنداۋعا مۇمكىندىك بەرمەدى. ءسال بوساڭسىعان ساتىمدە قارسىلاستىڭ قاقپانىنا ءتۇسىپ, ۋىستا تۇرعان التىن مەدالدى ەنشىلەي المادىم, – دەيدى توكيو پاراليمپياداسىنىڭ كۇمىس جۇلدەگەرى ءانۋار ساريەۆ.
پاراليمپيادانىڭ كۇمىس جۇلدەگەرى تاتاميگە قايتا ورالدى. ەندى ول پاريجدە وتەتىن پاراليمپيادانىڭ ليتسەنزياسىن يەلەنۋدى كوزدەپ وتىر. سالماعى بۇرىنعىشا 60 كيلو. بىلتىرعى جەلتوقساندا جاپونيادا پارادزيۋدودان «Tokyo open» حالىقارالىق تۋرنيرىندە باق سىنادى. بۇل جولى ول قولا جۇلدەنى مىسە تۇتتى.
ال جاقىندا پورتۋگاليانىڭ المادا قالاسىندا وتكەن پارادزيۋدودان گران-پري تۋرنيرىندە توپ جاردى. الدىمەن كورەيا, يسپانيا جانە گرۋزيا ەلدەرىنىڭ وكىلدەرىنەن باسىم ءتۇستى. اقتىق سايىستا گرۋزيننىڭ تاعى ءبىر بالۋانى نۋكريمەن بەلدەسۋ 11 مينۋتقا سوزىلدى. ەكى سپورتشى ءبىر-ءبىرىنىڭ وسال تۇسىن ىزدەپ, ابدەن شيرىقتى. جاتتىقتىرۋشىلاردىڭ دا, جانكۇيەرلەردىڭ دە دەگبىرىن تاۋىسقان تارتىستى كەزدەسۋ ءانۋاردىڭ پايداسىنا شەشىلدى. ءسويتىپ, ول گران-پري سايىسىنىڭ التىن مەدالىن يەلەندى.
– مەنىڭ ءبىر ارمانىم بار. ول – پاراليمپيادادا ەلىمىزدىڭ ءانۇرانىن شىرقاتىپ, كوك بايراقتى جەلبىرەتۋ, – دەپ الداعى ماقساتىمەن ءبولىستى پارادزيۋدوشى.
اتىراۋ وبلىسى