اۋىل شارۋاشىلىعى ءمينيسترى ەربول قاراشوكەەۆ جەكە قابىلداۋ وتكىزدى. جەكە قابىلداۋعا قازاقستاننىڭ بىرقاتار وڭىرىنەن تۇرعىندار جەر جانە جەر زاڭناماسىنىڭ ساقتالۋى, سونداي-اق ۆەتەريناريالىق قاۋىپسىزدىك ماسەلەلەرى بويىنشا تەكسەرۋلەر جۇرگىزۋ ماسەلەسىمەن كەلدى, دەپ حابارلايدى Egemen.kz.
كەزدەسۋگە قاتىسۋشىلاردىڭ ءبىرى جاڭادان اشىلعان جوعارى اقۋىزدى جەمشوپ قوسپالارىن شىعاراتىن زاۋىتىن تانىستىردى. كاسىپكەر قۇرىلىسقا 500 مىڭ اقش دوللارى كولەمىندە ينۆەستيتسيا سالعان. ونىڭ ايتۋىنشا, ءوندىرىستىڭ ەرەكشەلىگى - بۇل قوسپا ءىرى قارا مەن ۇساق مال تەرىسىنەن جاسالادى. زاۋىت كۇن سايىن 4 مىڭعا جۋىق تەرىنى وڭدەيدى جانە ايىنا 180 تونناعا دەيىن ءونىم شىعارا الادى. ءوندىرىستىڭ ءوزى قالدىقسىز, ال جەم قوسپاسى اقۋىزدىڭ جوعارى قۇرامىمەن جانە امينقىشقىلدارىنىڭ كەرەمەت قۇرامىمەن ەرەكشەلەنەدى.
«بۇگىندە تەرىنى قايتا وڭدەۋ ماسەلەسى وتە وزەكتى ەكەنىن اتاپ وتكەن ءجون. قازىرگى ۋاقىتتا ساپاسى تومەن بولعاندىقتان وندىرىلگەن تەرىلەردىڭ ەداۋىر بولىگى قايتا وڭدەۋ كاسىپورىندارىنا قابىلدانبايدى جانە ەكسپورتتالمايدى. وسىعان وراي ۇسىنىلعان جوبانى دايىن ءونىمدى وتكىزۋدىڭ تۇراقتى نارىقتارى بولعان جاعدايدا قولداۋعا بولادى», دەپ اتاپ ءوتتى مينيستر.
سونىمەن قاتار بيىلعى جىلعا ارنالعان ينۆەستيتسيالىق سۋبسيديالاۋ قاعيدالارىندا تەرىنى تەرەڭ وڭدەۋ بويىنشا كاسىپورىندار قۇرۋعا ارنالعان پاسپورت كوزدەلگەن جانە قويىلاتىن تالاپتارعا سايكەس كەلگەن جاعدايدا جوبا ءوز قۇنىنىڭ 25% مولشەرىندە ينۆەستيتسيالىق سۋبسيديالاۋعا ۇمىتكەر بولا الادى.
ەربول قاراشوكەەۆ قارالعان ءاربىر ءوتىنىش بويىنشا قۇرىلىمدىق بولىمشەلەردىڭ باسشىلارىنا ناقتى تاپسىرمالار بەردى, ول قابىلداۋعا كەلگەن قازاقستاندىقتاردى كوتەرىلگەن ماسەلەلەردى شەشۋدى ءوزىنىڭ جەكە باقىلاۋىنا الاتىنىنا سەندىردى.