ورالدىق «اقجايىق» فۋتبول كلۋبىنىڭ ويىنشىلارى جول اپاتىنان زارداپ شەككەن جانكۇيەرىنىڭ كوڭىلىن سۇراپ, اۋرۋحاناعا ىزدەپ باردى.
ميرا ەلەكەشەۆا ورال قالاسىنداعى جوعارى وقۋ ورىندارىنىڭ بىرىندە ساباق بەرەدى. ءوزى كوپ جىلدان بەرى ورالدىق «اقجايىق» كومانداسىنا جانكۇيەر بولىپ, ءوز الاڭىندا وتكەن ويىندارىن قۇر جىبەرمەيدى. ءتىپتى ستۋدەنتتەرىن ەرتىپ كەلىپ, الاڭداعى ويىنشىلارعا قىزۋ قولداۋ كورسەتىپ جۇرەدى. اسىرەسە كوماندا قۇرامىندا جەرگىلىكتى جاستاردىڭ بولعانىن جاقسى كورەدى. وسىنداي جانكۇيەرىن كوماندا مۇشەلەرى دە ابدەن تانىپ العان.
جاقىندا, اقپاننىڭ 7-ءسى كۇنى ميرا وقىستان جول اپاتىنا ءتۇسىپ قالدى. اۋىر جاراقات الىپ, قولى سىنعان وعان دارىگەرلەر 9 اقپان كۇنى وتا جاسادى. مۇنى ەستىگەن «اقجايىق» كومانداسىنىڭ ويىنشىلارى رىسبەك قوڭىروۆ, سامات بەرداۋلەتوۆ, رۋسلان حايروۆ, باۋىرجان وماروۆ جانە مەيرام ساپانوۆ اۋرۋحاناعا ارنايى كەلىپ, ميرامەن كەزدەستى.
– سۇيىكتى كوماندامىزدىڭ جانكۇيەرلەرى ءبىر ءۇيدىڭ بالاسىنداي بولىپ كەتكەنبىز عوي. ءاردايىم ءوزارا جاعداي سۇراسىپ تۇراتىنبىز. اۋرۋحانادا جاتقانىمدا نۇرالى ەسىمدى دوسىم حابارلاسىپ, پالاتادان تومەنگە ءتۇسۋىمدى ءوتىندى. سالەم-ساۋقات قابىلداۋ ورنىنا بارسام, سۇيىكتى كوماندامنىڭ ويىنشىلارى كەلىپ تۇر ەكەن. قاتتى تاڭعالىپ ءارى قۋانعانىمنان جۇرەگىم جارىلا جازدادى. ماۋسىم بارىسىندا ءبىز فۋتبولشىلاردى قولداساق, وسىنداي قيىن جاعدايعا تاپ بولعاندا ويىنشىلار مەنى ىزدەپ كەلىپتى. قاتتى قۋاندىم, – دەيدى ميرا ەلەكەشەۆا.
فۋتبولشىلار قۇر قول كەلمەپتى. جانكۇيەرگە مەيرام ساپانوۆ ويىن جەيدەسىن سىيلاسا, باۋىرجان وماروۆ جانكۇيەر شارفىن تارتۋ ەتتى. ولار ميرانىڭ تەزىرەك جازىلىپ شىعۋىنا تىلەك ءبىلدىردى.
باتىس قازاقستان وبلىسى