تالپىنعان جان تابىستى

جاتىپىشەر جالقاۋعا بۇي­رەگى بۇرىلا قويمايتىن قاتال نارىق­تىڭ تالابى انشەيىندە ءتاڭىر ءوزى جارىلقايدىنى كوپ ايتاتىن كەڭقولتىق اۋىل ادامدارىن دا قالىپ­قا تۇسىرە باستادى. جالعىز مال سۇمەسىمەن كۇن كورۋ – قيىننىڭ قيىنى. اۋىردىڭ ۇستىمەن, جەڭىلدىڭ استىمەن ءجۇرىپ جان باعاتىن زامان كەلمەسكە كەتكەن. قازىر كوپ­شى­لىك قولى قيمىلداسا, اۋزى قي­مىل­دايتىندى ءتۇسىنىپ, تىربانىپ تىرشىلىك ەتە باس­تادى. ءبىر جاق­سىسى, تاقا ماسىلدىق مەڭدەپ كەتپەسە, العا ۇمتىلعاندى قوس قول­تىعىنان پەرىشتەدەي جە­بەيتىن مەملەكەتتىك قامقورلىق شاش­ەتەكتەن. اۋىل ادام­دارى دا كاسىپ ۇيرەنىپ جاتىر. شاراپاتى دا از ەمەس. نەسىبە وزدەرىنە عانا ەمەس, بىرگە قاناتتاسىپ جۇمىس ىستەيتىن اۋىلداس­تارىنا دا بۇيىراتىن ءتۇرى بار. كۇنى كەشە جۇمىسسىز ادام بۇگىن جۇمىس بەرۋشىگە اينالعان.

شالعايداعى جاڭاقيما اۋىلى­نىڭ تۇرعىنى تىلەكتەس تۇرلىبەكوۆا ءبىلىم وشاعىندا وتىز جىلعا جۋىق تەحنولوگيا ءپانىنىڭ مۇعالىمى بولىپ ەڭبەك ەتتى. كۇندەردىڭ ءبىر كۇ­نىندە بيزنەسپەن اينالىسسام دەگەن ءۇمىتتىڭ جانىنا بايىز تاپ­تىر­ماعانى. قولعاناتى – قىزى. سەنەرى دە سول. كوز كورىپ, قول جات­تىقپاعان سوڭ, كۇمان دا از بولمايدى ەكەن. اۋەلى ءوز ءىسىن ەندى باستايتىن بولاشاق كاسىپكەرلەرمەن بىرگە ارنايى كۋرستاردا وقىدى. وڭى مەن سولىن تارازى باسىنا تارتتى. قولىنا قايتارىمسىز گرانت تيگەننەن كەيىن تىگىن ماشيناسىن ساتىپ الىپ, بولمەسىن جابدىقتادى.

– ەل ءىشى بولعان سوڭ سۇرانىس بولادى, – دەيدى كاسىپكەر تىلەكتەس تۇر­لىبەكوۆا, – ءبىزدىڭ ىسىمىزدەن قۇلاق­تانعاننان كەيىن اۋىلداستار كەلە باستادى. ءبىز توسەك جابدىقتارىن, كورپە, ءارتۇرلى ادەمى پەردەلەر تىگە­مىز. قۇراقكورپە تىگىپ بەرشى دەپ ءوتى­نىش ايتاتىندار بار. كيىم تىگۋگە تاپسىرىس تۇسە باستادى. ەڭ باستىسى, ادال جۇمىس ىستەۋ ءارى قىزمەتتىڭ قول­­­جە­تىمدىلىگىن دە ويلاعانىمىز ءجون.

جەرگىلىكتى جۇرت جاقسى ءىس جايلى بىردەن قۇلاقتانعان. پىسىق كەلىن­شەكتەر ءبىزدىڭ كەيىپكەرىمىز ءتارىزدى ءوز ءىسىن ۇيىمداستىرۋعا بەيىلدى. وسى اۋىلدىڭ تۇرعىنى ايمان سۇمە­نوۆانىڭ ايتۋىنا قاراعاندا, تىگىن­شىلىككە بەل بۋىپ وتىرعان جايى بار. العاشقى تابىستى ءىس شاعىن اۋىل­دا ەكى قولىن الدىنا سىيعىزا ال­ماي وتىرعان جاستارعا كادىمگىدەي وي سالعان. «كىم بىلگەن, بۇلاي دا تابىس تابۋعا بولادى ەكەن عوي», دەپ تاڭدانىسادى ولار. اۋداندا مەملەكەتتىك گرانتتىڭ كومە­گىمەن 10 ادام ءوز بيزنەسىن دوڭ­گەلەتىپ وتىر. ولار اۆتوكولىك جوندەيتىن ورتالىق, تىگىن تسەحى, جىلىجاي اشقان. ءتىپتى اعىلشىن ءتىلىن وقىتاتىن مەكتەپ تە پايدا بولىپتى. داتكە قۋاتى, ءوز كاسىبىڭدى اشىپ, ءوز قولىڭدى ءوز اۋزىما جەتكىزەمىن دەپ ۇمتىلعانداردىڭ اراسىندا مۇم­كىندىگى شەكتەۋلى ادامدار دا بار.

– ءار جىل سايىن بيزنەس اشۋعا بەرىلەتىن گرانت كولەمى ۇلعايىپ كە­لەدى. العاشقى جىلدارى 15-20 ملن تەڭگە كولەمىندە بولسا, وتكەن جى­لى 130 ملن تەڭگە باعىتتالدى. بيىل 180 ملن تەڭگە بەرىلمەك. جەرگىلىكتى بيۋدجەتتەن قوسىمشا 100 ملن تەڭگە قاراستىرىلىپ وتىر, – دەيدى وب­لىس­تىق كاسىپكەرلىك جانە تۋريزم باسقار­ماسىنىڭ باسشىسى ەربول وسپانوۆ.

شىنىندا دا, ءوز ءىسىن باستايمىن دەگەندەرگە كوپ-كورىم كومەك. ءبىر ايتا كەتەرلىگى, بولاشاعى بار بيزنەس-يدەيالاردىڭ ىشىندە ەڭ ۇتىمدىسى سارالانادى ەكەن. ءتيىمدى ءىستىڭ تىگىسى قاشاندا جاتىق بولادى ەمەس پە؟

اقمولا وبلىسى

جاقسى اۋدانى