«ورال» حالىقارالىق اۋەجايى – مەملەكەت مەنشىگىندە

ايدار مەنەەۆتىڭ ايتۋىنشا, ءدال قازىرگى ۋاقىتتا ستراتەگيالىق ماڭىزى بار نىساندار, ياعني حالىقارالىق اۋەجايدىڭ ۇشۋ-قونۋ جولاعى – يندۋستريا جانە ينفراقۇرىلىمدىق دامۋ مي­نيسترلىگى ازاماتتىق اۆياتسيا كوميتەتىنىڭ تەڭگەرىمىندە. ال بىلتىر عانا «قاراشىعاناق پە­تروليۋم وپەرەيتينگ ب.ۆ». كومپانياسىنان ءوڭىردى دامىتۋعا بولىنەتىن الەۋمەتتىك اۋدارىمدار ەسەبىنەن الىنعان 6,6 ملرد تەڭگەگە قايتا جاڭعىرتقان اۋەجاي تەرمينالى – «Aqjaiyq» اكك» اق تەڭگەرىمىندە. ياعني الاڭداۋعا نەگىز جوق.

جالپى, «ورال قالاسىنىڭ حالىقارالىق اۋەجايىنىڭ تەرمينالىن رەكونسترۋكتسيالاۋ جانە جاڭعىرتۋ» ينۆەستيتسيالىق جوباسى اياسىندا «Aqjaiyq» اكك» اق مەن «ورال» حالىقارالىق اۋەجايى» جشس اراسىندا بىر­لەسكەن قىزمەت تۋرالى شارت (كونسورتسيالدى كەلىسىم) 2018 جىلدىڭ ناۋرىزىندا جاسالعان.

ءسويتىپ, «ورال» حالىقارالىق اۋەجايى» جشس جولاۋشىلار تەرمينالىن (اۋەجاي عيماراتىن) ازىرلەنگەن جوبالاۋ-سمەتالاۋ قۇ­جاتتاماسىمەن «Aqjaiyq» اكك» اق مەنشىگىنە بەردى.

«Aqjaiyq» الەۋ­مەتتىك-كا­سىپ­كەرلىك كورپوراتسياسى ءوز كە­زەگىندە قاراشىعاناق اليان­­سىنىڭ قارجىسىنا تەرمينالدى جاڭعىرتىپ, 2022 جىلعى 6 ساۋىردە عيماراتتى «ورال» حا­لىقارالىق اۋەجايى» جشس-نىڭ سەنىمدى باسقارۋىنا قايتا بەرگەن.

– قولدا بار اقپاراتقا ساي­كەس كەيىنگى جىلدارى «ورال» حالىقارالىق اۋەجايى» جشس اۋە­جايلاردى باسقارۋعا مامان­داندىرىلعان سەرىكتەستەردى بەل­سەندى تۇردە ىزدەۋمەن بولعان. ءسويتىپ, اۋەجايلاردى دامىتۋدا تا­جىريبەسى بار «ورال اەروپورت حولدينگ» جشس باسقارۋشى كومپانياسى ينۆەستور رەتىندە تارتىلعان. كومپانيانىڭ نەگىزگى قاتىسۋ ۇلەسى قازاقستان تاراپىنا تيەسىلى, – دەيدى ا.مەنەەۆ.

دالىرەك ايتساق, «ورال اە­روپورت حولدينگ» جشس-نىڭ ءۇش قوجايىنى بار, ونىڭ ەكەۋى – قازاقستاندىق, بىرەۋى – رەسەيلىك ينۆەستور. رەسەيلىك قوجايىن – 49%, ال قازاقستاندىقتار 51% ۇلەسكە يە.

جوعارىداعى سپيكەرلەر «ورال اەروپورت حولدينگ» جشس ورال حالىقارالىق اۋەجايىنىڭ جۇمىسىن عانا سەنىمگەرلىكپەن باسقارۋعا العانىن, ناقتى ۇشۋ جولاعى مەن اۋەجاي عيماراتى مەملەكەت مەنشىگىندە قالعانىن قايتا-قايتا ايتۋمەن بولدى. ال جاڭا ينۆەستورلار كەلىسىمشارت نەگىزىندە الداعى ءۇش جىل ىشىندە تەرمينالدى جاڭعىرتۋعا كەتكەن 6,6 ملرد تەڭگەنى بىرتىندەپ مەملەكەتكە قايتارۋعا مىندەتتى بولادى.

نۇرجان وتەپباەۆ جاڭا ينۆەستورلاردىڭ الدىنا م.ما­­مەتوۆا اتىنداعى «ورال» حا­لىق­­­ارالىق اۋەجايىن جانە ونىڭ ينفراقۇرىلىمىن ودان ءارى دامىتۋ ءۇشىن «يانتار» را­ديو­اكتيۆتى ماتەريالداردى انىقتاۋدىڭ ستاتسيونارلى جۇيە­سىن جانە لەنتالى ترانسپور­تەر ورناتىپ, كونتەينەرلەر مەن پاللەتتەردى تاسىمالداۋعا ار­نالعان اربالارمەن قامتۋ, حا­لىقارالىق اۋەجايدا جولاۋ­شى­لاردى ۇشاق­قا/ۇشاقتان جەتكىزۋگە ارنال­عان اۆتوبۋس­تار جۇرگىزىپ, جولاۋشىلاردى تا­سىمالداۋعا ارنالعان امبۋليفت ورناتۋ, بقو تۇرعىندارىنىڭ ىسكەرلىك جانە تۋريستىك بايلانىستارىن كەڭەيتۋ, بيلەت قۇنىن ارزانداتۋ ءۇشىن اۆياكومپانيالار, اۋە قاتىناستارى مەن باعىتتار سانىن ۇلعايتۋ جونىندە تالاپتار قويىلعانىن ايتتى. سونداي-اق تەرمينالدىڭ جۇك اۆياكارگوسىن سالۋ جانە ۇيىمداستىرۋ مۇم­كىندىگى ءۇشىن اۋەجايدىڭ ين­فرا­قۇرىلىمىن جاڭعىرتۋ دا كەرەك.

– وسى ايتىلعان مىندەتتەردى شەشۋ ناتيجەسىندە جاڭا جۇ­مىس ورىندارىن قۇرۋ, تاۋارلار, جۇمىستار مەن قىزمەتتەر جا­ساقتاۋ, الەمدىك بەلگىلى برەندتەر دۇكەندەرىنىڭ اۋتلەتى, تۋريستىك باعدارلامالار, قوناقۇيلەر, دەمالىس ايماقتارىن دامىتۋ جولىمەن پارمەندى ەكونوميكالىق تيىمدىلىك بولادى دەپ كۇتەمىز, – دەدى «Aqjaiyq» اكك» اق باسقارما توراعاسى.

دەگەنمەن جۋرناليستەردىڭ كوپتەگەن سۇراعى جاۋاپسىز قالدى. مىسالى, تەرمينال­دى جاڭ­عىرتۋعا جۇمسالعان قار­جىنىڭ مەملەكەتكە قايتارىلۋ ءتارتىبى, ناقتى كەستەسى بەلگىسىز. ينۆەستورلاردىڭ ورال اۋەجايىن دامىتۋ بويىنشا ناقتى جوسپارى جەرگىلىكتى بيلىككە ءالى تانىستىرىلماعان. اۋەجايدى وسى كۇنگە دەيىن باسقارىپ كەلگەن «بەركۋت اەروپورت» جشس مەن جاڭا باسقارۋشى «ورال اەروپورت حولدينگ» جشس اراسىنداعى كەلىسىمشارت ءماتىنى حالىققا جا­ريالانباعان. «ول جەردە كوم­مەرتسيالىق قۇپيا دەرەكتەر بار», دەدى ن.وتەپباەۆ. سونداي-اق قازاق­ستاننىڭ ستراتەگيالىق نىسان­ىن سەنىمگەرلىكپەن باسقارۋعا رە­سەي­­لىك ينۆەستورلاردىڭ تارتىلۋى حالىقارالىق اۋەجايدىڭ جۇ­مىسىنا الەمدىك سانكتسيا قاۋ­پىن تۋدىرماي ما دەگەن ساۋالىمىز دا جاۋاپسىز قالدى.

باتىس قازاقستان وبلىسى