№2 قالالىق كوپسالالى اۋرۋحانانىڭ دارىگەرلەرى ناۋقاستىڭ ءومىرى ءۇشىن 35 كۇن بويى كۇرەسكەن. ءبىر تاۋلىك ىشىندە ونىڭ جۇرەگى 53 رەت توقتاپ قالعان, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
ناۋقاس 6 قاڭتار كۇنى ميوكارد ينفاركتىسى بويىنشا جەدەل جاردەم كولىگىمەن وتە اۋىر جاعدايدا №2 كوپبەيىندى اۋرۋحاناعا شۇعىل تۇردە جەتكىزىلدى. تۇسكەن ساتتەن كەيىن 10 مينۋت ىشىندە وعان وتا (كاروناروگرافيا جانە ستەنتتەۋ) جاسالدى.
قان اينالىمى ۇنەمى توقتاپ تۇردى. دارىگەرلەر كۇنى-ءتۇنى ناۋقاستىڭ جۇرەگىن قالپىن كەلتىرۋمەن اينالىستى. جۇرەك قاعىسى ءبىر كۇندە 53 رەت توقتادى. جاساندى جۇرەك پەن وكپە قىزمەتىن اتقاراتىن ەكMO (ەكستراكورپورالدى مەمبرانالىق وتتەگىمەن قانىقتىرۋ) قوسۋعا تۋرا كەلدى.
دارىگەرلەر 35 كۇن بويى پاتسيەنتتىڭ جانىنان كەتپەدى, تۇراقتى باقىلاۋ جۇرگىزىلدى. وسى ۋاقىت ىشىندە قان كەتۋ بولدى, سودان كەيىن قابىنۋ رەاكتسياسى, سەپسيس جانە جۇيەلىك كوپ مۇشەلىك جەتكىلىكسىزدىك پايدا بولدى.
«ناۋقاستى و دۇنيەدەن بىرنەشە رەت قايتارىپ الۋ, ونى اياققا تۇرعىزىپ قانا قويماي, دەنەنىڭ بارلىق قىزمەتىن ساقتاۋ مۇمكىن بولدى. مۇنداي وپەراتسيالاردى ءتىپتى بىرنەشە رەت جاساعان تاجىريبەلى رەانيماتولوگتار «مەديتسينالىق عاجايىپ» دەپ اتايدى», دەپ اتاپ ءوتتى كارديو بيت ءبولىمىنىڭ مەڭگەرۋشىسى راسۋل ساعىناەۆ.
قازىرگى ۋاقىتتا ناۋقاس تۇراقتى جانە ينتەرۆەنتسيالىق كارديولوگيا بولىمىنە اۋىستىرىلدى.
«ناۋقاس امان قالدى, قۋانىشىمىزعا وراي, ميىنا زيان كەلگەن جوق. ول ءۇشىن قابىلداۋ بولمەسى دارىگەرلەرىنىڭ, ينتەرۆەنتسيالىق كارديولوگتاردىڭ, كارديوحيرۋرگتاردىڭ, كارديو بيت كەزەكشى دارىگەرلەرىنىڭ (رۋسلان قاليەۆ, قاسقىر ناۋرىز, لۋنارا قادىروۆا, ريشات ايتقالي), مەدبيكەلەر مەن سانيتارلاردىڭ ۇلكەن كوماندالىق جۇمىسى جاسالدى. ءبىز ءۇشىن بۇل ۇلكەن جەڭىس», دەپ اتاپ ءوتتى اعا كارديو ورديناتورى ءسابيت اينامقۇلوۆ.