قارۋلى كۇشتەردىڭ سپورتشىلارى ازيا چەمپيوناتىندا ءۇش التىن الدى

اسكەر سپورتشىسى نادەجدا دۋبوۆيتسكايا ايەلدەر اراسىنداعى بيىكتىككە سەكىرۋ جارىستارىندا چەمپيون اتاندى. جەڭىل اتلەتىمىز 1,89 مەتر بيىكتىكتى ەڭسەردى.

ءدال وسى سايىس تۇرىنەن بارلىق جۇلدەلى ورىنداردى قازاقستاندىق سپورتشىلار يەلەندى. كريستينا وۆچيننيكوۆا اتالعان بيىكتىكتى بىرنەشە تالپىنىستان سوڭ باعىندىرىپ, كۇمىس جۇلدەگەر اتاندى. قولا جۇلدە دە ەل ەنشىسىندە قالىپ, قازاقستاندىق ەليزاۆەتا ماتۆەەۆاعا بۇيىردى. كورسەتكەن ناتيجەسى – 1,84 مەتر.

ەرلەر اراسىنداعى ەستافەتالىق جارىستا ءبىزدىڭ جەڭىل اتلەتتەرىمىز اندرەي سوكولوۆ, ەلنور مۋحيتدينوۆ, ۆياچەسلاۆ زەمس جانە ميحايل ليتۆين 3:09.15 ەسەبىمەن ازيا چەمپيوندارى اتاندى. كۇمىس جۇلدە كاتار كومانداسىنا (3:09.26), ال قولا – تاجىكستان قۇراماسىنا  (3:34.45) بۇيىردى. التىن ولجالاپ, چەمپيون اتانعان ميحايل ليتۆين – قر قارۋلى كۇشتەرىنىڭ قىزمەتكەرى.

كەدەرگىلەرمەن 60 مەترگە جۇگىرۋدە ەرلەر اراسىندا جوعارى ناگراداعا يە بولعان مەرزىمدى قىزمەتتەگى سارباز داۆيد ەفرەموۆكە تەڭ كەلەر ەشكىم بولمادى. ول قاشىقتىقتى 7,65 سەكۋندتا جۇگىرىپ ءوتتى. تۇعىردىڭ ەكىنشى ساتىسىن قىتايلىق سپرينتەر چەن كۋەي-رۋ (7,68), ءۇشىنشىسىن جاپوندىق شۋكەي يسيكاۆا (7,70) يەلەندى.

سونىمەن قاتار ەرلەر اراسىندا 400 مەتر قاشىقتىقتى باعىندىرۋدا ورتالىق سپورت كلۋبىنىڭ سپورتشىسى ميحايل ليتۆين سوڭعى جارىستا كاتارلىق جەلاياق اممار يسمايل ياحيا يبراحيمگە (46,25) عانا ەسە جىبەرىپ, 46,39 ۇپايمەن كۇمىس جۇلدە يەلەندى. قولا قىتاي سپورتشىسى فان تيانرۋيگە (47.30) بۇيىردى.