ەكسپورت مارشرۋتىن ءارتاراپتاندىرۋ ماقساتىندا قازاقستان بىرنەشە بالاما باعىتتى قاراستىرىپ وتىرعانى بەلگىلى. وسى رەتتە ءبىز ءۇشىن ترانسكاسپي باعىتىنىڭ ماڭىزى اسا جوعارى. بىلتىردان بەرى مەملەكەت وسى باعىت بويىنشا تاسىمالدى جانداندىرۋعا ەرەكشە كوڭىل ءبولىپ جاتىر. ونىڭ ناتيجەسى دە جوق ەمەس. 2022 جىلى ترانسكاسپي حالىقارالىق كولىك باعدارى ارقىلى جۇك تاسىمالداۋ كولەمى 2,5 ەسە ءوسىپ, 1,5 ملن تونناعا جەتكەن.
بۇل تۋرالى الماتىدا وتكەن «ترانسكاسپي حالىقارالىق كولىك باعدارى» (تحكب) حالىقارالىق قاۋىمداستىعى جالپى جينالىسىنىڭ وتىرىسىندا ايتىلدى. مارشرۋت قاتىسۋشىلارى قاۋىمداستىقتىڭ 2022 جىلعى قىزمەتىن قورىتىندىلادى. تحكب بويىنشا تاسىمالداۋدىڭ وڭ قارقىنى جانە ونىڭ قازىرگى گەوساياسي جاعدايداعى ءرولىنىڭ ارتقانى اتاپ ءوتىلدى.
2022 جىلى جۇك تاسىمالداۋ كولەمى ايتارلىقتاي ءوسىپ, كولەمى 2 تونناعا تاياپ تا قالدى. بۇل رەتتە وتاندىق جۇك ەكسپورتى 2021 جىلمەن سالىستىرعاندا 6,5 ەسە ۇلعايىپ, 891 مىڭ توننانى قۇراعان. سونىمەن قاتار كونتەينەرلەردە 33,6 مىڭ جيىرما فۋتتىق ەكۆيۆالەنت تاسىمالدانىپتى. بۇل وتكەن جىلدىڭ سايكەس كەزەڭىمەن سالىستىرعاندا 33 پايىزعا ارتىق.
2023 جىلعا ارنالعان مارشرۋت بويىنشا جۇكتەردى تاسىمالداۋ كولەمىن ۇلعايتۋ, تۇراقتى تۇردە شاتتل-پويىزبەن بەكىتىلگەن كەستە بويىنشا ءجۇرۋ جانە بىرىڭعاي ترانزيتتىك ءونىمدى قۇرۋ ماسەلەلەرى بويىنشا ۋاعدالاستىقتارعا قول جەتكىزىلدى.
ترانسكاسپي حالىقارالىق كولىك باعىتى (تحكب) قىتاي, قازاقستان, كاسپي تەڭىزى اكۆاتورياسى, ازەربايجان, گرۋزيا, تۇركيا جانە قارا تەڭىزى ارقىلى ەۋروپا ەلدەرىنە وتەدى. «تحكم» قاۋىمداستىعى مۇشەلەرىنىڭ قاتارىندا تەمىرجول اكىمشىلىكتەرىن, پورتتاردى, 8 مەملەكەتتىڭ كەمە جانە لوگيستيكالىق كومپانيالارىن قوسقاندا, 20 كومپانيا بار.
جالپى, 2025 جىلعا قاراي وسى كولىك ءدالىزىنىڭ كومەگىمەن تاسىمالداناتىن جۇك كولەمىن 10 ملن تونناعا جەتكىزۋ جوسپارى بار. بۇعان دەيىن ترانسكاسپي باعىتىنا قاتىسى بار مەملەكەتتەر – قازاقستان, ازەربايجان, تۇركيا جانە گرۋزيا مەملەكەتتەرىنىڭ سىرتقى ىستەر, سونداي اق كولىك ماسەلەلەرىنە جاۋاپتى مينيسترلەرى باس قوسىپ, ناقتى ءىس-قيمىلدار ايقىندالعان جول كارتاسىنا قول قويعان بولاتىن. تاراپتار الداعى بەس جىلدا وزدەرىنە قاتىستى اۋماقتا پورتتاردى كەڭەيتىپ, بەلگىلەنگەن جوبالاردى جۇزەگە اسىرۋدى كوزدەپ وتىر.