قر پرەمەر-ءمينيسترىنىڭ ورىنباسارى التاي كولگىنوۆ ۇلىتاۋ وبلىسىنا جۇمىس ساپارى اياسىندا «اۋىل اماناتى», «اۋىلدىق دەنساۋلىق ساقتاۋدى جاڭعىرتۋ», «جايلى مەكتەپ» ۇلتتىق جوبالارىنىڭ ۇزاق قۇرىلىستارىمەن جانە ىسكە اسىرىلۋ بارىسىمەن تانىستى, دەپ حابارلايدى Egemen.kz.
ساتباەۆ قالاسىندا ۆيتسە-پرەمەر التاي كولگىنوۆ بىرنەشە جىل بۇرىن قۇرىلىسى باستالعان 320 ورىندىق وقۋشىلار سارايى مەن بالاباقشا قۇرىلىسىنىڭ بارىسىمەن تانىستى.
سونداي-اق تەرەكتى ستانتسياسىندا مەكتەپ سالىنىپ جاتىر. بۇل وقۋ ورنى وقۋ ءۇشىن قولايلى جاعداي جاساۋعا مۇمكىندىك بەرەدى, ويتكەنى قازىر بالالار اپاتتىق مەكتەپتە وقۋعا ءماجبۇر. ۇلىتاۋ وبلىسى مەن قاراعاندى وبلىسىنىڭ اكىمدىكتەرى ورتالىق مەملەكەتتىك ورگاندارمەن بىرلەسىپ, ۇزاققا سوزىلعان قۇرىلىستاردىڭ پايدا بولۋىنا جول بەرمەۋ جانە باستالعان الەۋمەتتىك نىسانداردى اياقتاۋ بويىنشا جۇمىس كەشەنىن جانداندىرۋ قاجەت.
پرەمەر-ءمينيستردىڭ ورىنباسارى ۇلتتىق جوبالاردىڭ ىسكە اسىرىلۋ بارىسىمەن دە تانىستى. ماسەلەن, «اۋىلدىق دەنساۋلىق ساقتاۋدى جاڭعىرتۋ» باعدارلاماسى بويىنشا ۇلىتاۋ وبلىسىندا 20 العاشقى مەديتسينالىق-سانيتارلىق كومەك نىسانى سالىنادى, ونىڭ ىشىندە پەريناتالدىق ورتالىق بوي كوتەرەدى.
«مەملەكەت باسشىسىنىڭ تاپسىرماسى بويىنشا ەلىمىزدىڭ وڭىرلەرىندە 12 پەريناتالدىق ورتالىق سالىنادى. ولاردىڭ قاتارىنا جەزقازعانداعى پەريناتالدىق ورتالىق كىرەدى, ويتكەنى قالادا مۇنداي مەديتسينالىق مەكەمەلەر بويىنشا تاپشىلىق بار. بۇل ماسەلە – ۇكىمەتتىڭ باقىلاۋىندا. اۋىلدىق دەنساۋلىق ساقتاۋدى جاڭعىرتۋ شەڭبەرىندە ەل وڭىرلەرىندە جانە شالعاي اۋىلداردا بارلىعى 650-دەن استام مەديتسينالىق-سانيتارلىق العاشقى كومەك نىسانى سالىنادى. بيىل وڭىرلەر مساك-تىڭ 300 نىسانىن سالۋعا كىرىسۋى ءتيىس», دەدى ۆيتسە-پرەمەر التاي كولگىنوۆ.
سونداي-اق وڭىردە «جايلى مەكتەپ» جوباسىن ىسكە اسىرۋ شەڭبەرىندە 7 وقۋ ورنىن سالۋ جوسپارلانسا, جەزقازعان جوعارى پوليتەحنيكالىق كوللەدجىنىڭ بازاسىندا تەحنيكالىق جوو قۇرۋ قولعا الىنباقشى. سونىمەن قاتار ۆيتسە-پرەمەر ساتباەۆ قالاسىنىڭ سپورتتىق-ساۋىقتىرۋ كەشەنىنە باردى. ءوڭىر اكىمدىگى سپورت كەشەنىنىڭ اۋماعىندا وليمپيادالىق رەزەرۆتەگى مەكتەپ-ينتەرنات سالۋدى ۇسىندى. وڭىردەگى سپورت سەكتسيالارىندا 7 جاستان 15 جاسقا دەيىنگى 5 مىڭنان استام بالا سپورتپەن اينالىسادى. قۇرىلىسقا قاجەتتى جەر ۋچاسكەسى بار. بۇل شارالار بالالار مەن جاستاردى سپورتپەن قامتۋدى ارتتىرۋعا مۇمكىندىك بەرەدى.
التاي كولگىنوۆ كەڭگىر كەنتىندە فەرمەرلەرمەن دە كەزدەستى. كەزدەسۋ بارىسىندا «اۋىل اماناتى» اۋىل تۇرعىندارىنىڭ تابىسىن ارتتىرۋ جوباسىن ىسكە اسىرۋ ماسەلەلەرى تالقىلاندى. ۇلىتاۋ وبلىسىندا وتكەن جىلى قاتىسۋشىلارعا نەسيە بەرۋ ءۇشىن 570 ملن تەڭگە بەرىلدى, بيىل قوسىمشا 2 ملرد 800 ملن تەڭگە بولىنەدى. قولدانىستاعى وندىرىستەردى قولداۋ جانە جاڭا وندىرىستەردى اشۋ ءوڭىردى ازىق-ت ۇلىك قاۋىپسىزدىگىمەن قامتاماسىز ەتۋگە مۇمكىندىك بەرەدى. «اۋىل اماناتى» جوباسى بيىلدان باستاپ وڭىرلەردىڭ ەرەكشەلىگى مەن الەۋمەتتىك-ەكونوميكالىق دامۋىن ەسكەرە وتىرىپ, بۇكىل ەل بويىنشا ماسشتابتالاتىن بولادى.
جۇمىس ساپارى ۇلىتاۋ جانە اباي وبلىستارى, قاراعاندى جانە شىعىس قازاقستان وبلىستارى اكىمدەرىنىڭ ورىنباسارلارىنىڭ, دەنساۋلىق ساقتاۋ, ەڭبەك جانە الەۋمەتتىك قورعاۋ, عىلىم جانە جوعارى ءبىلىم, اۋىل شارۋاشىلىعى, ۇلتتىق ەكونوميكا جانە ت.ب. ۆيتسە-مينيسترلەردىڭ قاتىسۋىمەن وتكەن كەڭەسپەن اياقتالدى.