بۇگىن ۇكىمەت ۇيىندە مينيسترلەر كابينەتى تۇرعىن ءۇي-كوممۋنالدىق ينفراقۇرىلىمدى دامىتۋ ماسەلەسىن تالقىلادى, دەپ حابارلايدى Egemen.kz.
تكش جۇيەلەرىن جاڭعىرتۋ تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ باياندادى.
ءبىرىنشى كەزەكتە ۆەدومستۆو باسشىسى 2022 جىلدىڭ قورىتىندىسى, الداعى ماقساتتار جانە وسى جىلعا ارنالعان مىندەتتەر تۋرالى باياندادى. ونىڭ ايتۋىنشا, بىلتىر ەلىمىزدە 15,4 ملن شارشى مەتر نەمەسە 130 مىڭنان استام تۇرعىن ءۇي سالىندى. تۇرعىن ءۇي قۇرىلىسىنا ينۆەستيتسيالار وتكەن جىلمەن سالىستىرعاندا 16,8%-عا ءوسىپ, 2,9 ترلن تەڭگەگە جەتكەن. مەملەكەتتىك ينۆەستيتسيالار ەسەبىنەن 17 مىڭ 300 پاتەر سالىنىپ, 10,5 مىڭ جەڭىلدەتىلگەن نەسيە بەرىلگەن.
تۇرعىن ءۇيدى ىسكە قوسۋدىڭ جالپى رەسپۋبليكالىق جوسپارلى كورسەتكىشى 101,8%-عا ورىندالعان. استانا جانە الماتى قالالارىنىڭ اكىمدىكتەرى جوسپارلى كورسەتكىشتى اسىرا ورىنداعان. 8 ءوڭىر تۇرعىن ءۇيدى پايدالانۋعا بەرۋدىڭ جوسپارىن ورىنداي المادى. ونىڭ ىشىندە ۇلىتاۋ, سولتۇستىك قازاقستان جانە اتىراۋ وبلىستارىنىڭ كورسەتكىشتەرى وتە تومەن.
«وسى جىلى 15,3 ملن شارشى مەتر تۇرعىن ءۇيدى پايدالانۋعا بەرۋ جوسپارلانعان. جوسپارلى كورسەتكىشتەر وڭىرلەرگە جەتكىزىلدى», دەدى م. قاراباەۆ.