ەندى ازاماتتار Halyk Homebank موبيلدىك قوسىمشاسى ارقىلى نەكە قيۋدى تىركەۋگە ءوتىنىش بەرە الادى, دەپ حابارلايدى Egemen.kz.
ادىلەت مينيسترلىگى Digital Justice جوبالار پورتفەلى شەڭبەرىندە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, مەملەكەتتىك قىزمەتتەردىڭ سمارتفوندار ارقىلى قولجەتىمدىلىگىن قامتاماسىز ەتۋ بويىنشا جۇمىس جۇرگىزىپ جاتىر.
ادىلەت مينيسترلىگى Halyk Bank-پەن بىرلەسىپ Halyk Homebank موبيلدىك قوسىمشاسى ارقىلى نەكە قيۋدى تىركەۋگە ءوتىنىش بەرۋ بويىنشا سەرۆيسىن ىسكە قوستى. بۇل تۋرالى قر ادىلەت مينيسترلىگىنىڭ رەسمي وكىلى تالعات ءۋالي مالىمدەدى.«Halyk Homebank موبيلدىك قوسىمشاسى ارقىلى قىزمەتتى الۋ ءۇشىن «مەمقىزمەتتەر» بولىمىندە ءوتىنىشتى تولتىرىپ, مەملەكەتتىك باج (1 اەك – 3 450 تەڭگە) تولەۋى جانە ەكىنشى قىزمەت الۋشى 48 ساعات ىشىندە ءوتىنىمدى راستاۋى قاجەت. 15 كۇنتىزبەلىك كۇن وتكەننەن كەيىن احات ورگاندارى جاس جۇبايلاردىڭ قاتىسۋىمەن نەكە قيۋدى تىركەيدى. ەستەرىڭىزگە سالا كەتەيىن, بۇرىن بۇل مەرزىم 1 ايدى قۇراعان ەدى», دەدى تالعات ءۋالي.