ەلوردانىڭ اۋداندارى مەن ەلدى مەكەندەرىنىڭ ءبارىن ساپالى بايلانىسپەن جانە ينتەرنەت جەلىسىمەن قامتاماسىز ەتۋ بويىنشا بەلسەندى جۇمىس ءجۇرىپ جاتىر. بۇل تۋرالى ونلاين-بريفينگتە استانا قالاسى تسيفرلاندىرۋ جانە مەملەكەتتىك قىزمەتتەر باسقارماسىنىڭ باسشىسى مەيرامبەك اشىربەكوۆ ايتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ەلوردادا 16 ەلدى مەكەن بار, ولاردىڭ بەسەۋى, اتاپ ايتقاندا تەمىرجولشىلار, زارەچنىي, پريگورودنىي, ۇركەر, كوكتال-1 جوعارى جىلدامدىقتى ينتەرنەتپەن قامتاماسىز ەتىلگەن. تاعى 9 ەلدى مەكەندە (كوكتال-1, اگروقالاشىق, ينتەرناتسيونالنىي, وڭتۇستىك-شىعىس, پرومىشلەننىي, تەلمان, ميچۋرينو, قازقالاشىق, كيرپيچنىي) وپتيكالىق بايلانىس جەلىلەرىنىڭ قۇرىلىسى بويىنشا جۇمىس ءجۇرىپ جاتىر, ۇشەۋىندە (قوياندى, كۇيگەنجار, ءوندىرىس) ينۆەستورلار تارتىلىپ جاتىر. قالاعا جۇمىلدىرىلعان ينۆەستيتسيالاردىڭ جالپى سوماسى 1,5 ملرد تەڭگەنى قۇرايدى.
ماسەلەن, سارىارقا اۋدانىندا «كازاحسكيە دوماشنيە سەتي» جشس ينۆەستورى كوكتال-1, 2, اگروقالاشىق ەلدى مەكەندەرىنىڭ تۇرعىندارى ءۇشىن ينتەرنەت جەلىسىنە قولجەتىمدىلىكتى قامتاماسىز ەتەدى.
كوكتال-2-دە 16 كم كوشە كابەلى تارتىلدى. مۇندا العاشقى ابونەنتتەر وتكەن جىلدىڭ قاراشا ايىندا قوسىلدى. كوكتال-1-گە 7 كم-دەن استام كابەل تارتىلدى, ابونەنتتەردى قوسۋ 2023 جىلدىڭ ناۋرىزىنا دەيىن جوسپارلانعان.
«كوكتال-2 شاعىن اۋدانىنىڭ العاشقى ابونەنتتەرى ينتەرنەتكە قوسىلدى. تۇرعىندارعا تالشىقتى-وپتيكالىق بايلانىس جەلىلەرى ارقىلى جوعارى جىلدامدىقتى ينتەرنەت جانە ساندىق تەلەديدار قىزمەتتەرى ۇسىنىلادى. زاماناۋي GPON تەحنولوگياسى جارىقتاندىرۋ باعانالارى مەن ەلەكتر جەلىلەرى ارقىلى وتەدى. بارشىن, قۇلانوتپەس, ساۋمالكول, ايدارلى, اقمولا, ۇلىتاۋ جانە باسقا دا كوشەلەردەگى 200 ءۇي قوسىلۋعا دايىن», دەدى مەيرامبەك اشىربەكوۆ.
ەسىل اۋدانىنىڭ ۇركەر, تەلمان ەلدى مەكەندەرىندە بۇل جۇمىستى Synergy Telecom جشس ينۆەستورى جۇرگىزەدى. ماسەلەن بۇگىندە ۇركەردە 20 كم كوشە كابەلى تارتىلدى. 50 ابونەنت قوسىلدى, 70 ءوتىنىم بويىنشا جۇمىس ءجۇرىپ جاتىر.
- «قازاقتەلەكوم» اق-مەن بىرلەسىپ ۇركەر ەلدى مەكەنىندە 290-نان استام ءۇيدى قامتيتىن كوشەلەردە ميكروتۇتىكشەلەردى پايدالانا وتىرىپ جەلىلەر سالۋ بويىنشا جۇمىس جۇرگىزىلدى. بۇل مالايسارى باتىر, تاۋكەنت, ەر توستىك, ءمادي, مۇرىن جىراۋ, ومبا, سىرىم باتىر, بويتۇمار, جاسىباي, سماعۇل سادۋاقاسوۆ كوشەلەرى», - دەدى سپيكەر.
سونىمەن قاتار «استانا-اەك» اق-مەن بىرلەسىپ ينۆەستورلاردى تولىق قارجىلاندىرۋ ەسەبىنەن ەلوردانىڭ ەلدى مەكەندەرىندە ەلەكتر بەرۋ جانە جارىقتاندىرۋ تىرەكتەرى بويىنشا وپتيكالىق بايلانىس جەلىلەرىن جۇرگىزۋ ماسەلەسى پىسىقتالدى.