ءىلياس بايدۋاليەۆ الماتىدا قاڭتار وقيعاسى كەزىندە ايىرباستاۋ پۋنكتتەرىنىڭ ءبىرىنىڭ جانىندا قازا تاپقان قالەجان نىعمەتجانوۆتى قاساقانا ءولتىردى دەپ ايىپتالدى. كەزەكتى سوت پروتسەسى سوت ساراپشىسىنان جاۋاپ الۋدان باستالدى, دەپ حابارلايدى Egemen.kz.
ءىس الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالىپ جاتىر, بۇل وسىمەن بەسىنشى وتىرىس. الدىڭعى تىڭداۋلاردا ايىپتاۋشى مەن قورعاۋشى تاراپىنان جاۋاپ الىنعان ەدى. الماتى پوليتسيا دەپارتامەنتى ينكاسساتورعا قازاقستان رەسپۋبليكاسى قىلمىستىق كودەكسىنىڭ 99-بابى 2-بولىگىنىڭ 15-تارماعى بويىنشا قاساقانا كىسى ءولتىردى دەگەن ايىپ تاقتى. سونداي-اق ايىرباستاۋ پۋنكتىنە شابۋىل جاساۋعا قاتىسقان ءتورت ادامعا قاتىستى قىلمىستىق ءىس قوزعالدى.
ايىپتالۋشىنىڭ قورعاۋشىسى وقيعا كەزىندە وق ابايسىزدا اتىلعان دەپ, «ابايسىزدا ادام ءولتىرۋ» بابىن تالاپ ەتىپ وتىر.
بۇگىنگى سوت پروتسەسى سوت-مەديتسينالىق ساراپشى مۇرات نۇرلىباەۆتان جاۋاپ الۋدان باستالدى. ول مارقۇمنىڭ دەنەسىنە زەرتتەۋ جۇرگىزىپ, ونىڭ قايتىس بولۋ سەبەبىن انىقتاعان. ساراپتامانىڭ قورىتىندىسى كورسەتكەندەي, قازا تاپقان ازامات اتىلعان وقتان قايتىس بولعان. الايدا مارقۇمنىڭ دەنەسىنەن وق تابىلماعان.
«وق ارتىنان اتىلىپ, تومەننەن جوعارى بويلاپ, شامامەن 6 سم تەرەڭدەگەن. جاراقات العاننان كەيىن قانداي دا ءبىر شارالار قابىلدانىپ, مەديتسينالىق كومەكتەر كورسەتىلگەن بولۋى مۇمكىن. ءمايىت وقيعا ورنىنان مايىتحاناعا جەتكىزىلىپ, ەكسگۋماتسيا جۇرگىزىلدى. بولجام بويىنشا, وق قايتىپ شىققان نەمەسە بىرەۋ ونى سۋىرىپ العان بولۋى مۇمكىن», دەدى مۇرات نۇرلىباەۆ.
سوت-مەديتسينالىق ساراپشىسى جاراقات ۋاقىتىن انىقتاۋ مۇمكىن ەمەس ەكەنىن ايتتى. ويتكەنى ساراپتاما ەكسگۋماتسيادان كەيىن جۇرگىزىلگەن.
سونىمەن قاتار سوت پروتسەسىندە كۋاگەرلەردىڭ ايعاق بەينەماتەريالدارى مەن وقيعا بولعان جەردەگى بەينەجازبالار قارالدى.
بۇعان دەيىن ادۆوكات الما مۋسينا ءوزىنىڭ Facebook پاراقشاسىندا 2022 جىلدىڭ 5 قاڭتارىندا ساعات 22:00 شاماسىندا ينكاسساتورلار ايىرباستاۋ پۋنكتىنە كەلىپ, ونى بەس ادام توناپ جاتقانىن كورگەنى تۋرالى جازعان. ونىڭ ايتۋىنشا, ينكاسساتورلار توناۋشىلاردى ءوز بەتىنشە ۇستاۋعا تىرىسقان. پوليتسياعا حابارلاسۋ مۇمكىن بولماعان سوڭ, ۇستالعانداردىڭ قۇجاتتارى مەن تەلەفوندارىن الىپ, ولاردى قۇقىق قورعاۋ ورگاندارىنا مۇمكىندىگىنشە تەزىرەك بەرۋ ءۇشىن كولىگىن بازاعا شىعارۋ تۋرالى شەشىم قابىلداعان. ءبىر ساتتە ۇرىلاردىڭ ءبىرى ءارى جابىرلەنۋشى نىعمەتجانوۆ قاشىپ كەتۋگە تىرىسقان. قاشىپ بارا جاتىپ, ءسۇرىنىپ قۇلاعان. ونى بايدۋاليەۆ قۇلاعان ورنىنان تۇرعىزباق بولعان كەزدە ابايسىزدا وق اتىلعان.
كەيىن قالەجان نىعمەتجانوۆتىڭ 6 قاڭتاردا قايتىس بولعانى بەلگىلى بولدى. ال ءىلياس بايدۋاليەۆكە قاساقانا كىسى ءولتىردى دەگەن ايىپ تاعىلدى.
ايتولعان ءجۇنىسحان,
ل.ن. گۋميلەۆ اتىنداعى ەۇۋ ستۋدەنتى