«قۇقىقتىق كومەك» قاناتقاقتى جوباسىنىڭ زاڭگەرلەرى اتىراۋ وبلىسىنا ارنايى بارىپ, ءوڭىر تۇرعىندارىن تولعاندىرعان ماسەلەلەرگە قۇلاق ءتۇردى.
ايتا كەتەيىك, «قۇقىقتىق كومەك» – «Amanat» پارتياسىنىڭ مۇرىندىق بولۋىمەن ىسكە قوسىلعان جوبا. اۋىل, اۋداندا تۇراتىن قاراپايىم حالىقتىڭ قۇقىعىن قورعايتىن جوبا شەڭبەرىندە بەلگىلى قۇقىق قورعاۋشى ابزال قۇسپان باستاعان ءبىر توپ زاڭگەر جاقىندا اتىراۋ وبلىسىندا بولدى.
ولار سوتتا جانە تاعى باسقا جاعدايدا تالاپ-ارىز تولتىرۋ, وكىلەتتىك ەتۋ, ءوزىن قورعاۋ ماسەلەلەرى بويىنشا يساتاي, يندەر, ماقات, جىلىوي اۋداندارى مەن اتىراۋ قالاسىندا ازاماتتارعا كەڭەس بەردى.
قابىلداۋعا كەلگەن ازاماتتاردى تۇرعىن-ءۇيدى جەكەشەلەندىرۋ, جەكە سوت ورىنداۋشىلارىنىڭ قىزمەتى, ەڭبەك داۋلارى, اليمەنت تولەمەۋ ماسەلەلەرى تولعاندىرادى. جالپى, زاڭگەرلەر 100-دەن استام ادام قابىلدادى.
«Amanat» پارتياسى قولعا العان جاڭا جوبا ەڭ الدىمەن اۋىل تۇرعىندارىنا قۇقىقتىق كومەك كورسەتۋگە ارنالىپ وتىر. جاسىراتىنى جوق, قۇقىقتىق سيپاتتاعى ماسەلەنى شەشۋ كەزىندە قالا تۇرعىندارى كوپ مۇمكىندىككە يە. ال اۋىل تۇرعىندارىنىڭ ساپالى قۇقىقتىق كومەك الۋعا دەگەن مۇمكىندىگى ۇدايى بولا بەرمەيدى. سوندىقتان بۇل پارتيالىق جوبانىڭ ءمانى مەن ماڭىزى ەرەكشە», دەدى ابزال قۇسپان.
ول سونداي-اق اتالعان باستاما تۇرعىندار ءجيى ۇشىراساتىن زاڭداعى قاراما-قايشىلىقتاردى انىقتاۋعا مۇمكىندىك بەرەتىنىن جەتكىزدى. ماسەلەن, ءبىر توپ ازامات زاڭگەرلەرگە 2020 جىلى اتىراۋ مۇناي وڭدەۋ زاۋىتىندا قىزمەت ەتىپ جۇرگەن كەزدە زاڭسىز قىسقارتۋعا ۇشىراعاندارىن جەتكىزدى.
ءوز ماسەلەسىن ايتا كەلگەن تۇرعىننىڭ ءبىرى ۇزاق ۋاقىت بويى قۇزىرلى ورگانداردىڭ تابالدىرىعىن توزدىرىپ ءجۇر. سەبەبى ونىڭ اتىنا ءىس جۇزىندە ول يەلىك ەتپەيتىن اۆتوكولىك رەسىمدەلىپتى.
ءبىر توپ ايەل پاتەرلەردى جەكەشەلەندىرۋ كەزىندە پايدا بولعان ماسەلەلەر بويىنشا شاعىم ايتتى. ولاردىڭ ايتۋىنشا, تۇرۋعا جارامسىز ەسكى ۇيلەر بەرىلگەن. جالعا بەرىلگەن پاتەرلەردە ءومىر ءسۇرۋ مۇمكىن ەمەس. ال ءۇي ءىشىن ءوز بەتىنشە قالىپقا كەلتىرىپ, جوندەۋ جۇمىسىن جۇرگىزۋ ءۇشىن ولار وسى پاتەرلەردى جەكەشەلەندىرگىسى كەلەدى.
«شالعايداعى ەلدى مەكەن تۇرعىندارى ءۇشىن بۇل جوبانىڭ پايداسى كوپ. بىزگە وبلىس ورتالىعىنا بارىپ, مامان ىزدەۋدىڭ قاجەتى جوق. «Amanat» پارتياسىنىڭ ۇيىمداستىرۋىمەن بىلىكتى مامان بىزگە ءوزى كەلىپ, قاجەتتى كەڭەس بەردى», دەپ اتاپ ءوتتى ءوڭىر تۇرعىنى گۇلنار جۇماعۇلوۆا.
ءوز كەزەگىندە, زاڭگەرلەر ءاربىر ءوتىنىشتى مۇقيات قاراپ, قۇجاتتارمەن تانىسىپ, ءارى قاراي قالاي ارەكەت ەتۋ كەرەك ەكەنى جونىندە كەڭەس بەردى.
كەلىپ تۇسكەن ساۋالداردى ەسكەرە وتىرىپ, كەلەشەكتە جۇمىستى WhatsApp-تاعى اۆتوماتتاندىرىلعان چات-بوت ارقىلى ونلاين رەجىمدە جۇرگىزۋ جوسپارلانىپ وتىر. بوت 2000-نان استام زاڭگەر تىركەلگەن zan.bar ءموبيلدى قوسىمشاسىنىڭ ادۆوكاتتار بازاسىمەن ءوزارا ارەكەتتەسەدى. ءسويتىپ, پارتيا ساپالى قىزمەتتەرگە قول جەتكىزە المايتىن وتانداستارىمىزدىڭ قۇقىعىن تسيفرلاندىرۋدىڭ كومەگىمەن قورعاۋدى كوزدەپ وتىر.
اتىراۋ وبلىسىندا قاناتقاقتى رەجىمدە باستاۋ العان «Amanat» پارتياسىنىڭ «قۇقىقتىق كومەك» جوباسى ەلىمىزدىڭ بارلىق وڭىرىندە جالعاسادى.
اتىراۋ وبلىسى