رەسپۋبليكالىق جولداردىڭ كوكتەمگى سۋ تاسقىنى كەزەڭىنە دايىندىعى تالقىلاندى

يدم باسشىسى سۋ تاسقىنى كەزەڭىنە دايىندىق ەرەكشە باقىلاۋدا ەكەنىن, سونداي-اق ىقتيمال قاۋىپتى ۋاقتىلى الدىن الىپ, جويۋ ءۇشىن سۋ تاسقىنىنا قارسى ءىس-شارالار جوسپارلارى بەكىتىلگەنىن, ورتالىق جانە وڭىرلىك دەڭگەيلەردە كوميسسيالار قۇرىلعانىن جەتكىزدى. اۆتوجولداردا تاۋلىك بويى كەزەكشىلىك ۇيىمداستىرىلىپ, جول قۇرىلىستارىنا كۇندەلىكتى ءپاترۋلدى باقىلاۋ جۇرگىزىلىپ كەلە جاتقانى بەلگىلى بولدى.

الدىڭعى جىلدارداعى سۋ تاسقىنى مەزگىلىندەگى دەرەكتەردى ەسكەرە وتىرىپ, رەسپۋبليكالىق اۆتوجولدار جەلىسىندە ايرىقشا قاداعالاۋدى تالاپ ەتەتىن 387 قاۋىپتى ۋچاسكە, 74 كوپىر جانە 818 سۋ وتكىزۋ قۇبىرى ايقىندالدى. بۇل نىساندارعا 500-گە جۋىق جول-تازارتۋ تەحنيكاسى بەكىتىلگەن. اقپان ايىنان باستاپ 5 742 سۋ وتكىزۋ قۇبىرىن قاردان تازارتۋ بويىنشا پروفيلاكتيكالىق جۇمىستاردى ۇيىمداستىرۋ جوسپارلانعان.

«قازىر 13 مىڭ تەكشە مەتر قۇم, 3 مىڭ تەكشە مەتر تاس, 11 مىڭ تەكشە مەتر قيىرشىق تاس جانە قۇم-قيىرشىق تاس قوسپاسىمەن تولتىرىلعان 15 مىڭداي قاپ, سونداي-اق 244 مىڭ ليتر جاعارماي دايىندالدى. قاجەتتى ماتەريالداردىڭ دايىندىعى 50% قۇرايدى. 15 اقپانعا دەيىن قاجەتتى ماتەريالداردى دايىنداۋ 100%-عا دەيىن جەتكىزىلەدى», دەدى مينيستر.

ۆەدومستۆو باسشىسى كەيىنگى 3 جىلدا اۆتوكولىك جولدارىن جاڭعىرتۋ جۇمىستارى اياسىندا سۋ تاسقىنى قاۋپى بار ۋچاسكەلەر سانى 472-دەن 387-گە دەيىن ازايعانىن اتاپ ءوتتى.

مارات قاراباەۆتىڭ ايتۋىنشا, بۇل باعىتتاعى جۇمىس ەلىمىزدىڭ تەمىرجولدارىندا دا مىقتاپ قولعا الىندى. پويىزداردىڭ ۇزدىكسىز قوزعالىسىن قامتاماسىز ەتۋ, سونداي-اق جولدار مەن جاساندى قۇرىلىستاردى ۋاقتىلى دايىنداۋ ءۇشىن «قتج» ۇك» اق №957-تسز بۇيرىعىن بەكىتىپ, سوعان سايكەس سۋ تاسقىنى كەزەڭىندە قاجەتتى ۇيىمداستىرۋ-تەحنيكالىق ءىس-شارالار قاراستىرىلىپ وتىر.

الدىڭعى جىلدارداعى تاجىريبەنى تالداۋ نەگىزىندە بارلىق ءوڭىر بويىنشا 673 قاۋىپتى ورىن انىقتالىپ, سۋ تاسقىنى كەزەڭىندە اتالعان ايماقتاردا تاۋلىكتىك كەزەكشىلىك پەن اينالما جولدى ۇيىمداستىرۋ كوزدەلگەن.

قازىر ەلىمىزدەگى سۋ قويمالارى مەن اگروتەحنيكالىق بوگەتتەردىڭ جاعدايىنا تەكسەرۋ باستالىپ, كوپىرلەردىڭ, قۇبىرلاردىڭ, درەناجدىق قۇدىقتاردىڭ ساڭىلاۋلارىن قاردان تازارتۋ, سول سياقتى تاۋ جانە سۋ بۇرۋ ارىقتارىن, ناۋالار مەن جىرالاردى (كيۋۆەتتەردى) اشۋ بويىنشا دايىندىق جۇمىستارى جۇرگىزىلىپ جاتىر. سونداي-اق وبلىستىق تج بولىمشەلەرىمەن ءوزارا ءىس-قيمىل بويىنشا ارنايى شارالار پىسىقتالۋدا.

«شويىنتاس پەن رەلس پاكەتتەرى, سونداي-اق كونديتسياسىز تەمىربەتوندى شپالدارى قاراستىرىلعان اعىنعا قارسى 45 پويىز قۇرامى جاساقتالىپ جاتىر. 61 مىڭ ادامدى ەۆاكۋاتسيالاۋعا شاقتالعان 1 713 لوكوموتيۆ پەن 1 603 ۆاگون دايىندالدى. سونىمەن قاتار 84 ءورت ءسوندىرۋ پويىزى مەن قالپىنا كەلتىرۋگە ارنالعان كران, تراكتور جانە بۋلدوزەر سىندى تەحنيكالار تۇراقتى دايىندىقتا تۇر. قازىر جول قاشىقتىعى بويىنشا 2,4 مىڭ تەكشە مەتر تاس پەن 8 مىڭ كونديتسياسىز تەمىربەتون شپالدارى دايىندالدى», دەدى م.قاراباەۆ.