قىزىلوردادا وبلىس اكىمى نۇرلىبەك نالىباەۆتىڭ توراعالىعىمەن كادرلىق وزگەرىستەرگە بايلانىستى اكتيۆ وتىرىسى ءوتتى. جيىندا وبلىستىق قوعامدىق دامۋ باسقارماسىنىڭ باسشىسى تانىستىرىلدى.
قازاقستان رەسپۋبليكاسى پرەزيدەنتى اكىمشىلىگى جانە قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ كەلىسىمدەرى بويىنشا وبلىس اكىمىنىڭ وكىمىنە سايكەس, مەريتوكراتيا قاعيداتىمەن وبلىستىق قوعامدىق دامۋ باسقارماسىنىڭ باسشىسى لاۋازىمىنا ەسماحانوۆ الماسبەك ابىلقاسىم ۇلى تاعايىندالدى.
وبلىس اكىمى جاڭا باسقارما باسشىسىن قۇتتىقتاپ, وعان الداعى ۋاقىتتا اتقارىلۋى ءتيىس ماڭىزدى مىندەتتەردى تاپسىردى.
الماسبەك ەسماحانوۆ 1982 جىلى تۋعان. قىزىلوردا گۋمانيتارلىق ۋنيۆەرسيتەتىن «قارجى جانە نەسيە», قازتۇتىنۋوداعىنىڭ قاراعاندى ەكونوميكالىق ۋنيۆەرسيتەتىن «زاڭتانۋ» ماماندىقتارى بويىنشا بىتىرگەن.
ەڭبەك جولىن 2006 جىلى قىزىلوردا قالالىق ەكونوميكا جانە بيۋدجەتتىك جوسپارلاۋ ءبولىمىنىڭ مامانى رەتىندە باستاعان. 2006-2012 جىلدارى جەرگىلىكتى اتقارۋشى ورگانداردا ءتۇرلى دەڭگەيدە جاۋاپتى قىزمەتتەردە بولعان.
2012-2022 جىلدار ارالىعىندا قىزىلوردا قالاسى قاراۋىلتوبە اۋىلدىق وكرۋگىنىڭ اكىمى, وبلىس اكىمى اپپاراتىنىڭ ۇيىمداستىرۋ - ينسپەكتورلىق جۇمىس جانە ايماقتىق دامۋ ءبولىمىنىڭ باسشىسى, شيەلى اۋدانى اكىمىنىڭ ورىنباسارى, قىزىلوردا قالاسى اكىمى اپپاراتىنىڭ, قالالىق مادەنيەت جانە تىلدەردى دامىتۋ, كاسىپكەرلىك, ونەركاسىپ جانە تۋريزم, ىشكى ساياسات بولىمدەرىنىڭ باسشىسى قىزمەتتەرىن اتقارعان.
2022 جىلدىڭ قىركۇيەك ايىنان باستاپ وسى كەزگە دەيىن قىزىلوردا وبلىسىنىڭ قوعامدىق دامۋ باسقارماسى باسشىسىنىڭ ورىنباسارى قىزمەتىن اتقارىپ كەلەدى.