تۇرعىنداردىڭ تۇرمىسىنا دا, كوڭىل كۇيىنە دە اسەر ەتەتىن جايتتىڭ ءبىرى – تاريف. سول سەبەپتەن ءتاريفتى ينۆەستيتسياعا ايىرباستاۋ جوباسى ىسكە اسىرىلماق. الايدا جىل سايىن ەلەكتر ەنەرگياسىمەن, سۋمەن جانە جىلۋمەن قامتۋ ءۇشىن بىرنەشە ميلليون, ءتىپتى ميلليارد تەڭگەنىڭ ينۆەستيتسياسىن سالىپ وتىرمىز دەيتىن كومپانيالار كەلىسە مە؟
تابيعي مونوپوليالاردى رەتتەۋ كوميتەتى اتىراۋ وبلىسى بويىنشا دەپارتامەنتىنىڭ باسشىسى الىبەك تولەپتىڭ ايتۋىنشا, مەملەكەت باسشىسىنىڭ جولداۋىندا ء«تاريفتى ينۆەستيتسياعا ايىرباستاۋ» جوباسىن ىسكە اسىرۋ قوزعالعان. مۇنىڭ تۇپكى سەبەبى نەدە؟
ماسەلەن, اتىراۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى سەرىكقالي قاناپيننىڭ دەرەگىنە سۇيەنسەك, مۇنايلى وڭىردە 567,7 شاقىرىم جىلۋ جەلىسى بار. قازىر اتالعان جەلىنىڭ 58,7 پايىزى توزعان. دەمەك بۇل جەدەل جاڭارتۋدى قاجەت ەتەتىن جىلۋ جەلىلەرىنىڭ جارتىسىنان استامىن قۇراپ وتىر. ال 14 352 شاقىرىم ەلەكتر جەلىلەرىنىڭ توزۋ دەڭگەيى 40 پايىزعا جەتكەن. سۋمەن جابدىقتايتىن 4 263 شاقىرىم قۇبىردىڭ 29 پايىزى توزعانى انىقتالعان.
– ءتاريفتى ينۆەستيتسياعا ايىرباستاۋ جوباسىن ىسكە اسىرۋدىڭ نەگىزگى ماقساتى – وڭىردەگى ەلەكتر قۋاتىمەن قامتاماسىز ەتۋ جانە سۋ قۇبىرى جەلىلەرىنىڭ, جىلۋ كوممۋنيكاتسياسىنىڭ توزۋ دەڭگەيىن تومەندەتۋگە قول جەتكىزۋ. وتكەن جىلدىڭ جەلتوقسان ايىندا اتالعان تاپسىرما بويىنشا جاڭا زاڭعا قول قويىلدى. زاڭ اياسىندا بىرنەشە پروبلەمانى وڭ شەشۋ كوزدەلگەن. ەڭ باستىسى, وڭىردەگى مونوپوليست كومپانيالاردىڭ قۇزىرىنداعى جەلىلەردىڭ توزۋ دەڭگەيىن تومەندەتۋ. بۇل ءۇشىن الدىمەن مونوپوليست كومپانيالاردىڭ ينۆەستيتسيالىق باعدارلامالارىن ۇلعايتۋ كەرەك. جەلىلەردىڭ ەسكىرۋى – ءبىر كۇندە پايدا بولعان ماسەلە ەمەس. ال ونى تومەندەتۋ دە ءبىر جىلدا اياقتالمايتىنى انىق. سوندىقتان قازىرگى ماقساتىمىز – مونوپوليست كومپانيالارعا تيەسىلى جەلىلەردىڭ توزۋ دەڭگەيىن 15%-عا دەيىن تومەندەتۋ. بۇل جۇمىس كەزەڭ-كەزەڭىمەن ىسكە اساتىن بولادى, – دەيدى ءا.تولەپ.
مۇنايلى شاھار تۇرعىندارىن «اتىراۋ وبلىسى سۋ ارناسى» كمك اۋىز سۋمەن قامتاماسىز ەتۋدى جۇزەگە اسىرىپ وتىر. وسى سالاداعى جالعىز كاسىپورىن تۇتىنۋشىلارعا جەتكىزىلەتىن اۋىز سۋدىڭ ءبىر تەكشە مەترى ءۇشىن 64 تەڭگەدەن الادى. سۋدى جايىق وزەنىنەن الاتىن كاسىپورىن ەندى ءتاريفتى 100 پايىزعا كوتەرۋدى كوزدەپ وتىر. سول سەبەپتەن تابيعي مونوپوليالاردى رەتتەۋ كوميتەتىنىڭ اتىراۋ وبلىسى بويىنشا دەپارتامەنتىنە ءوتىنىم بەردى. وتىنىمدە الداعى 5 جىلعا ارنالعان سۋ ءتاريفىن كوتەرۋدى سۇراعان.
– ءبىز ءتاريفتى كوتەرۋ ءۇشىن ءوتىنىم بەردىك. ۇسىنىسىمىز قولداۋ تاۋىپ, ءتاريفتى كوتەرەمىز دەگەن ءۇمىتىمىز بار. ويتكەنى سۋ ءتاريفى سوڭعى رەت 2015 جىلى كوتەرىلگەن. سودان بەرى تاريف كوتەرىلگەن جوق. كەرىسىنشە, وسى جىلدار ىشىندە مونوپولياعا قارسى ۆەدومستۆو ءبىزدىڭ ءتاريفىمىزدى 2 ەسەگە جۋىق تومەندەتتى, – دەپ ءتۇسىندىردى «اتىراۋ وبلىسى سۋ ارناسى» كمك ديرەكتورى ارمان كەنجەعاليەۆ.
ونىڭ ايتۋىنشا, كاسىپورىن تۇتىنۋشى تولەگەن قارجىدان پايدا تاپپاي وتىر. ويتكەنى قارجىلاي كىرىس تەك جالاقى, سالىقتار, كوممۋنالدىق قىزمەتتەر جانە باسقا دا اۋدارىمدار سەكىلدى اعىمداعى شىعىنداردى جابۋعا عانا جەتەدى.
– تۇتىنۋشىلاردى اۋىز سۋمەن ۇزدىكسىز قامتاماسىز ەتۋىمىز قاجەت. بۇل ءۇشىن ءبىزدىڭ كاسىپورىننىڭ سۋ جەتكىزەتىن جەلىلەرى مەن ءتۇرلى جابدىقتارىندا اقاۋ بولماعانى ءجون. ءدال قازىر بىزدەگى جەلىلەر مەن جابدىقتار توزعان. ونى جەدەل اۋىستىرۋ قاجەت. بۇگىنگى تومەن تاريفپەن مۇنى ىسكە اسىرۋ مۇمكىن ەمەس, – دەيدى ا.كەنجەعاليەۆ.
اتىراۋ وبلىسى